Read Iban Pengulu 1 Bible Online

Pengulu 1 - Iban bible

Pengulu 1

¹Udah bekau pemati Josua, orang Israel lalu betanya ngagai TUHAN, “Sapa deka bejalai nguluka kami nyerang orang Kanaan?”

²Ku TUHAN nyaut, “Raban bansa Judah deka nguluka kita. Aku udah meri menua nya ngagai jari sida.”

³Ku raban bansa Judah bejaku enggau raban bansa Simeon, “Aram mansang sama enggau kami ngagai menua ti udah diberi ngagai kami, ngambika kitai sama nyerang orang Kanaan. Udah nya baru kami bejalai enggau kita, ngagai menua ti udah diberi ngagai kita.” Nya alai raban bansa Simeon

⁴enggau raban bansa Judah lalu sama mansang nyerang. TUHAN ngasuh sida menang ngelaban orang Kanaan enggau orang Peris, lalu sida ngalahka sepuluh ribu iku munsuh di Besek.

⁵Sida tetemuka Adonibesek di Besek, lalu nyerang iya.

⁶Adonibesek rari, tang sida ngagai iya, nangkap iya, lalu netak semua tunjuk indu jari enggau tunjuk indu kaki iya.

⁷Ku Adonibesek bejaku, “Tujuh puluh iku raja, ti udah ditetak tunjuk indu jari enggau tunjuk indu kaki, udah beputikka pemakai di baruh mija aku. Diatu Allah Taala udah ngereja ngagai aku utai ti udah dikereja aku ngagai sida.” Adonibesek lalu dibai ngagai Jerusalem, lalu iya mati dia.

⁸Raban bansa Judah nyerang Jerusalem, lalu ngalahka nengeri nya.

⁹Udah nya sida nyerang orang Kanaan ti diau di menua ti bebukit, ba kaki bukit, enggau di menua ti rangkai di selatan.

¹⁰Sida nyerang orang Kanaan ti diau di nengeri Hebron, ti dikumbai Kiriat-arba dulu menya. Dia sida ngalahka raban peturun Sheshai, Ahiram enggau Talmai.

¹¹Raban bansa Judah angkat ari nya, lalu nyerang nengeri Debir, ti dikumbai Kiriat-seper lebuh maya nya.

¹²Siku ari bala sida ke benama Kalep lalu bejaku, “Aku deka ngasuh anak dara aku Aksah jadi enggau lelaki ke ulih ngalahka Kiriat-seper.”

¹³Otnil anak Kenas, lalu ngalahka nengeri nya. Nyadi Kenas nya adi Kalep. Kalep lalu meri anak dara iya Aksah ngagai Otnil nyadika bini Otnil.

¹⁴Ba hari seduai iya nikah, Otnil lalu ngasuh Aksah [1] minta ari apai iya Kalep sebidang tanah. Aksah nurun ari keledai iya, lalu Kalep nanyaka utai ti dikedekaka iya.

¹⁵Ku Aksah nyaut, “Aku minta mata ai, laban tanah ti udah diberi nuan ngagai aku rangkai nadai ai.” Nya alai Kalep meri ngagai Aksah mata ai ti di ulu enggau ti di ili.

¹⁶Bala peturun mentua Moses, iya nya orang Ken, lalu mansang sama enggau orang Judah ari Jeriko, iya nya nengeri ti mayuh kayu engkerema, ngagai menua puang tunga ke selatan nengeri Arat di menua Judah. Sida lalu ngentapka diri dia begulai enggau orang Amalek.

¹⁷Raban bansa Judah mansang enggau raban bansa Simeon, lalu sida ngalahka orang Kanaan ti diau di nengeri Sepat. Sida nyumpah nengeri nya, ngerusak lalu meri nama Hormah [2] ngagai nengeri nya.

¹⁸TUHAN nyaup raban bansa Judah, lalu sida ngalahka menua ti bebukit. Tang sida enda ngalahka [3] Gasa, Askelon, tauka Ekron, tauka menua ti ngelingi nengeri nya. Orang nya diau ba sebelah tebing tasik, bisi kerita perang ti digaga ari besi. Nya kebuah orang Judah enda ulih muru sida ari menua nya.

²⁰ Munyi ti udah diatur Moses, Hebron diberi ngagai Kalep, lalu Kalep muru tiga bengkah raban peturun Anak ari nengeri nya.

²¹ Tang raban bansa Benjamin enda muru orang Jebus ti diau di Jerusalem, lalu bansa orang nya agi mengkang diau begulai enggau orang Benjamin kenyau ari maya nya menya.

²²Raban bansa Epraim enggau Manasi nyerang nengeri Betel, ti dikumbai Lus lebuh maya nya menya. TUHAN nyaup sida. Sida ngasuh orang matau nengeri nya.

²⁴Lebuh bala pematau nya meda siku orang pansut ari nengeri nya, sida lalu bejaku enggau iya, “Padahka ngagai kami chara tama ngagai nengeri tu, ngambika kami enda ngemediska nuan.”

²⁵Orang nya lalu madahka ngagai sida. Raban bansa Epraim enggau raban bansa Manasi lalu munuh semua orang dalam nengeri nya, tang sida enda munuh orang nya tauka sida sebilik.

²⁶Orang nya lalu mansang ngagai menua orang Iti, ngaga sebuah nengeri dia, lalu meri nama nengeri nya Lus. Nama nya mengkang nyentuk ngagai sehari tu.

²⁷ Raban bansa Manasi enda muru bansa orang ke diau dalam nengeri Bet-sean, Taanak, Dor, Iblim, Megido, enggau nengeri ti mit ti semak dia. Orang Kanaan agi mengkang diau di nengeri nya.

²⁸Lebuh orang Israel nyau mansang kering agi, sida mejalka orang Kanaan bekereja ke sida, tang sida mengkang enda muru semua orang Kanaan ari menua nya.

²⁹ Raban bansa Epraim enda muru orang Kanaan ti diau di nengeri Geser. Nya alai orang Kanaan agi mengkang diau dia begulai enggau sida.

³⁰Raban bansa Sebulun enda muru orang ke diau di nengeri Kitron, enggau Nahalal. Nya alai orang Kanaan agi mengkang diau dia begulai enggau sida, lalu dipejalka sida bekereja ke sida.

³¹Raban bansa Aser enda muru orang ke diau dalam nengeri Ako, Sidon, Ahlap, Aksip, Helbah, Apek enggau Rehob.

³²Raban bansa Aser diau begulai enggau orang Kanaan ti nguan menua nya, laban sida enda muru orang Kanaan ari menua nya.

³³Raban bansa Naptali enda muru orang ke diau dalam nengeri Bet-semes enggau Bet-anat. Sida diau begulai enggau orang Kanaan ti nguan menua nya, tang sida mejalka orang Kanaan bekereja ke sida.

³⁴Orang Amor mejalka raban bansa Dan diau di menua ti bebukit, lalu enda nyagi sida nurun ngagai menua emperan.

³⁵Orang Amor majak diau di Aijalon, Sa-albim, enggau di Har-heres, tang raban bansa Epraim enggau Manasi merintah sida, lalu mejalka sida bekereja ke sida.

³⁶Tunga ke utara Sela, garis entara menua orang Edom [4] ti di utara, ngerenchah Genting Akrabim.