Read Iban Pengulu 10 Bible Online

Pengulu 10 - Iban bible

Pengulu 10

¹Lebuh Abimelek udah mati, Tola anak Puah, uchu Dodo, datai ngelepaska orang Israel. Iya datai ari raban bansa Isakar, lalu iya diau di Samir, di menua ti bebukit di Epraim.

²Iya nyadi tuai orang Israel dua puluh tiga taun. Udah nya iya mati, lalu dikuburka di Samir.

³Udah bekau Tola, Jair lalu datai ari Giliat. Iya nguluka orang Israel dua puluh dua taun.

⁴Iya bisi tiga puluh iku anak lelaki, ke nepan tiga puluh iku keledai. Sida bisi tiga puluh buah nengeri di menua Giliat. Nengeri nya agi dikumbai Tumpuk Pendiau Jair.

⁵Jair mati, lalu dikuburka di Kamon.

⁶Orang Israel lalu bedosa baru ngelaban TUHAN, laban sida nyembah Baal enggau Astarte, sereta nyembah mayuh bengkah petara orang Siria, petara orang Sidon, petara orang Moap, petara orang Amon, enggau petara orang Pilistin. Sida ninggalka TUHAN, lalu badu agi nyembah Iya.

⁷Nya alai TUHAN ringat ngagai orang Israel, lalu nejuka orang Pilistin enggau orang Amon ngalahka sida.

⁸Lapan belas taun bansa orang nya nekanka pengidup sereta merinsaka semua orang Israel ti diau di menua orang Amor di timur Sungai Jordan, di menua Giliat.

⁹Orang Amon meraka Sungai Jordan nyerang raban bansa Judah, Benjamin, enggau Epraim. Israel balat amat tusah.

¹⁰Udah nya orang Israel nyabak ngangauka TUHAN, ku sida, “Kami udah bedosa ngelaban Nuan, laban kami udah ninggalka Nuan ti Allah Taala kami, lalu udah nyembah bala petara Baal.”

¹¹TUHAN lalu nyaut sida munyi tu: “Orang Ejip, orang Amor, orang Amon, orang Pilistin,

¹²orang Sidon, orang Amalek, enggau orang Maon udah nekanka pengidup kita dulu menya, lalu kita nyabak ngangauka Aku. Kati Aku nadai udah kala ngelepaska kita ari jari sida?

¹³Tang taja pia, kita mengkang ninggalka Aku, lalu nyembah petara bukai. Nya alai, Aku enggai agi ngelepaska kita.

¹⁴Kangauka bala petara ti udah dipilih kita. Awakka sida ngelepaska kita ari penusah.”

¹⁵Tang ku orang Israel bejaku enggau TUHAN, “Kami udah bedosa. Kereja meh sebarang utai ti deka dikereja Nuan, tang lepaska kami sehari tu.”

¹⁶Nya alai sida muai semua petara orang bansa bukai, lalu nyembah TUHAN. TUHAN lalu ringat meda pemerinsa orang Israel.

¹⁷Udah nya bala soldadu orang Amon sedia deka nyerang, lalu nirika kem di Giliat. Orang Israel lalu begempuru, lalu nirika kem sida di Mispah, di menua Giliat.

¹⁸Dia orang Israel enggau bala tuai sida nanya pangan diri, “Sapa deka nguluka kitai ngelaban orang Amon? Barang sapa nguluka kitai, deka nyadi tuai ke semua orang di Giliat.”