Read Iban Pengulu 11 Bible Online

Pengulu 11 - Iban bible

Pengulu 11

¹Jeptah, siku soldadu ti berani, ke datai ari Giliat, nya anak indu sundal. Apai iya benama Giliat

²lalu Giliat bisi anak lelaki bukai ari bini iya empu, lalu lebuh bala anak iya mansang besai, sida muru Jeptah ari rumah. Ku sida bejaku enggau iya, “Nuan enda tau bempu reta tengkira apai kami laban nuan tu anak indu bukai.”

³Jeptah lalu rari ari bala menyadi iya, lalu diau di menua Top. Dia iya ulih narit ati bala orang ke nadai guna, lalu sida belelang enggau iya.

⁴Nyau ke lama udah bekau nya, orang Amon nyerang orang Israel.

⁵Lebuh perang nya nyadi, bala tuai orang di Giliat mansang ngambi Jeptah pulai ari menua Top.

⁶Ku sida bejaku enggau iya, “Kami minta nuan nguluka kami ngelaban orang Amon.”

⁷Tang ku Jeptah nyaut, “Kita udah balat amat begedika aku, datai ke kita nyau muru aku ari rumah apai aku. Nama kebuah kita datai ngagai aku diatu, lebuh kita dituntung penusah?”

⁸Ku sida nyaut Jeptah, “Kami nguing ngagai nuan diatu laban kami deka ngasuh nuan bejalai enggau kami ngelaban orang Amon, lalu nguluka semua orang di Giliat.”

⁹Ku Jeptah nyaut sida, “Enti kita mai aku pulai, lalu ngasuh aku ngelaban orang Amon, lalu TUHAN ngasuh aku menang, aku deka merintah kita.”

¹⁰Ku sida nyaut, “Kami besetuju. Awakka TUHAN nyadika saksi kami.”

¹¹Jeptah lalu mupuk enggau bala tuai orang Giliat. Orang Giliat lalu ngasuh iya merintah sereta nyadi tuai sida. Jeptah lalu nyebut, di Mispah, utai ti dikedekaka iya ari orang Giliat, di mua TUHAN.

¹²Udah nya Jeptah lalu ngasuh bala seruan bejalai ngagai raja menua Amon, ngasuh sida nyebut munyi tu: “Nama laya nuan enggau kami? Nama kebuah nuan nyerang menua kami?”

¹³Raja menua Amon lalu nyaut jaku ti dibai bala seruan Jeptah, “Lebuh orang Israel pansut ari menua Ejip, sida ngerampas menua aku, kenyau ari Sungai Arnon nyentuk ngagai Sungai Jabok, enggau Sungai Jordan. Diatu kita enda tau enda meri menua nya pulai baru ngagai aku ngena chara ti alus.”

¹⁴Jeptah lalu ngasuh bala seruan iya betemu enggau raja menua Amon baru

¹⁵mai saut tu, “Nuan enda tau ngumbai orang Israel udah ngerampas menua Moap tauka menua Amon.

¹⁶Baka tu ku gaya utai ti udah nyadi. Lebuh orang Israel pansut ari menua Ejip, sida bejalai nengah menua puang ngagai Teluk Akaba, lalu datai di Kades.

¹⁷ Sida lalu ngasuh bala seruan betemu enggau raja menua Edom, minta pemendar bejalai meraka menua iya. Tang raja menua Edom enggai ngemendarka sida. Sida mega minta pemendar ari raja menua Moap, tang iya mega enggai ngemendarka sida nengah menua iya. Nya alai orang Israel diau di Kades.

¹⁸ Udah nya sida lalu bejalai nengah menua puang, ngelaungka menua Edom, enggau menua Moap, datai ke sida nyau datai ba tisi menua Moap muak ari timur, di seberai Sungai Arnon. Sida lalu nirika kem sida dia, tang sida enda meraka Sungai Arnon, laban sungai nya nyadika garis entara menua orang Moap.

¹⁹ Udah nya orang Israel lalu ngasuh bala seruan bejalai ngagai Sihon, raja orang Amor ke merintah di Hesbon, minta iya ngemendarka sida bejalai nengah menua iya.

²⁰Tang Sihon enggai ngemendarka orang Israel meraka. Iya lalu ngempuruka semua bala soldadu iya, nirika kem sida di Jahas, lalu nyerang orang Israel.

²¹Tang TUHAN Allah Taala ke disembah orang Israel, nyerahka Sihon enggau bala soldadu iya ngagai jari orang Israel, lalu orang Israel ngalahka sida. Nya alai orang Israel lalu bempu semua menua orang Amor ti diau di menua nya.

²²Sida nguan semua menua orang Amor berengkah ari Arnon di selatan nyentuk ngagai Sungai Jabok di utara, enggau ari menua puang ti di timur nyentuk ngagai Sungai Jordan di barat.

²³Nya alai, TUHAN Allah Taala ke disembah orang Israel muru orang Amor ngarika bala nembiak Iya, iya nya orang Israel.

²⁴Kati nuan nguji ngambi menua nya pulai baru? Nuan tau bempu sebarang menua ti udah diberi petara nuan Chemos ngagai nuan. Tang kami deka bempu semua menua ti udah dialahka TUHAN Allah Taala kami, ke kami.

²⁵ Kati nuan ngumbai diri manah agi ari Balak anak Sipor, raja orang Moap? Kati iya bisi udah kala nyakap orang Israel? Kati iya bisi udah kala beperang ngelaban kami?

²⁶Orang Israel udah nguan Hesbon enggau Aroer tiga ratus taun, enggau semua nengeri ti mit ti ngelingi dua buah nengeri nya, enggau semua nengeri ti ba tebing Sungai Arnon. Nama kebuah nuan enda ngambi semua nengeri nya ngelamatu?

²⁷Aku nadai udah ngereja utai ti salah ngagai nuan. Nuan empu ti ngereja utai ti salah, laban nuan ngepunka perang tu ngelaban aku. Awakka TUHAN, ti nyadi Hakim, meri pemutus penemu sehari tu entara orang Israel enggau orang Amon.”

²⁸Tang raja menua Amon enggai mendingka pesan ti dikirumka Jeptah.

²⁹Roh TUHAN lalu nurun ngagai Jeptah. Jeptah lalu bejalai nengah menua Giliat enggau Manasi, lalu pulai ngagai Mispah di menua Giliat, lalu mansang terus ngagai Amon.

³⁰Jeptah udah besemaya enggau TUHAN: “Enti Nuan deka ngasuh aku menang ngelaban orang Amon,

³¹aku deka nyerahka orang ke terubah-rubah pansut ari rumah aku, ti deka ngambat aku lebuh aku pulai menang beperang. Aku deka meri orang nya ngagai nuan nyadika piring.”

³²Nya alai Jeptah meraka sungai nya mansang nyerang orang Amon, lalu TUHAN ngasuh Jeptah menang.

³³Iya nyerang sida berengkah ari Aroer nyentuk ngagai menua ti ngelingi Minit, dua puluh buah nengeri semua iya, nyentuk ngagai Abel Keramim. Mayuh amat orang dibunuh sida, lalu orang Amon alah laban orang Israel.

³⁴Lebuh Jeptah pulai ngagai Mispah, anak dara iya lalu pansut ngambat iya, betanda sereta nebah tamborin. Iya anak tunggal Jeptah.

³⁵ Lebuh Jeptah meda iya, iya lalu nyarikka gari diri laban iya tusah ati. Ku iya, “O anak! Nuan tu ngenusahka ati aku! Nama kebuah nuan enggai enda ngenusahka ati aku? Aku udah besumpah enggau TUHAN, nya alai aku enda ulih matak semaya diri!”

³⁶Ku anak dara iya bejaku enggau iya, “Enti nuan udah ngaga semaya enggau TUHAN, kereja aja meh utai ti deka dikereja nuan ngagai aku, laban TUHAN udah ngasuh nuan malas ngagai munsuh nuan orang Amon.”

³⁷Tang anak dara iya minta siti utai ari apai iya, “Kereja utai siti tu ke aku: awakka aku diau kediri dua bulan, ngambika aku ulih bejalai enggau bala pangan aku ba sebelah bukit, lalu natka diri ke tusah ati deka mati agi dara bungas baka tu.”

³⁸Jeptah ngemendarka iya bejalai dua bulan. Iya enggau bala iya lalu bejalai niki ngagai bukit, lalu natka diri tusah ati laban iya deka mati sebedau iya belaki, lalu nadai anak.

³⁹Ba ujung dua bulan nya, iya lalu pulai baru ngagai apai iya. Apai iya lalu ngereja utai ti udah disemaya iya enggau TUHAN. Nya alai anak iya mati lebuh iya agi dara bungas. Tu meh pun adat asal di menua Israel

⁴⁰alai sida ke indu deka bejalai empat hari dalam setaun, ngulitka anak dara Jeptah ari Giliat.