Read Iban Pengulu 12 Bible Online

Pengulu 12 - Iban bible

Pengulu 12

¹Orang Epraim ditesau mansang beperang. Sida meraka Sungai Jordan ngagai Sapon, lalu ku sida bejaku enggau Jeptah, “Nama kebuah nuan meraka garis entara menua mansang ngelaban orang Amon lalu enda mai kami? Diatu kami deka nunu rumah kita!”

²Tang ku Jeptah bejaku enggau sida, “Bala aku enggau aku empu bisi laya ti besai enggau orang Amon. Aku bisi mesanka kita, tang kita enggai ngelepaska aku ari kuasa orang Amon.

³Lebuh aku nemu kita enggai, aku lalu berambunka nyawa diri, lalu meraka garis entara menua mansang ngelaban sida, lalu TUHAN udah ngasuh aku menang ngelaban sida. Nya alai, nama kebuah kita datai ngagai aku lalu ngelaban aku diatu?”

⁴Udah nya Jeptah ngempuruka semua bala orang Giliat, ngelaban orang Epraim lalu ngalahka sida. (Orang Epraim udah nyebut, “Kita orang Giliat ke di menua Epraim enggau di menua Manasi, kita tu rari ninggalka orang Epraim!”)

⁵Orang Giliat lalu nan ba pemeraka Sungai Jordan, ngambika orang Epraim enda ulih rari. Lebuh orang ari raban bansa Epraim minta pemendar meraka lalu nguji ngerarika diri, orang Giliat nanya, “Kati nuan tu orang Epraim?” Enti orang nya nyebut, “Ukai,”

⁶sida deka ngasuh iya nyebut “Shibbolet.” Tang orang nya deka nyebut “Sibolet,” laban iya enda terus nyebut leka jaku nya, lalu iya ditangkap, lalu dibunuh dia ba pemeraka di Sungai Jordan. Empat puluh dua ribu iku orang Epraim dibunuh lebuh maya nya.

⁷Jeptah nguluka orang Israel enam taun. Udah nya iya mati, lalu dikuburka di nengeri iya empu di Giliat.

⁸Udah bekau Jeptah nyadi tuai, Ipsan ari Betlehem lalu nguluka orang Israel.

⁹Iya bisi tiga puluh iku anak lelaki enggau tiga puluh iku anak indu. Iya ngasuh bala anak indu iya jadi enggau orang ke ari luar suku raban bansa sida empu, lalu iya ngambi tiga puluh iku indu ke biak ari luar suku raban bansa sida empu jadi enggau bala anak lelaki iya. Ipsan nguluka orang Israel tujuh taun.

¹⁰Udah nya iya mati, lalu dikuburka di Betlehem.

¹¹Udah bekau Ipsan, Elon ari Sebulun nguluka orang Israel sepuluh taun.

¹²Udah nya iya mati, lalu dikuburka di Aijalon di menua Sebulun.

¹³Udah bekau Elon, Apdon anak Hilel ari Piraton nguluka orang Israel.

¹⁴Iya bisi empat puluh iku anak lelaki enggau tiga puluh iku uchu. Sida tu nepan tujuh puluh iku keledai. Apdon nguluka orang Israel lapan taun.

¹⁵Udah nya iya mati, lalu dikuburka di Piraton di menua Epraim, ba menua ti bebukit ti diempu orang Amalek.