Read Iban Pengulu 13 Bible Online

Pengulu 13 - Iban bible

Pengulu 13

¹Orang Israel lalu bedosa baru ngelaban TUHAN, lalu Iya nejuka orang Pilistin merintah sida empat puluh taun.

²Nyadi lebuh maya nya bisi siku orang ke benama Manoah, ari nengeri Sorah. Iya datai ari raban bansa Dan. Bini iya mandul, nadai anak.

³Melikat TUHAN pegari di mua bini Manoah, lalu bejaku, “Nuan mandul, tang enda lama da agi nuan deka ngandung, lalu ngadaka anak lelaki siku.

⁴Nuan enda tau ngirup wain tauka ai ti bisa, tauka makai pemakai ti enda tau diempa.

⁵ Lalu lebuh anak nuan ada ila, nuan enda tau nguntin buk iya, laban kenyau ari maya iya ada, iya deka diserahka ngagai Allah Taala nyadi Nasir.[16] Iya deka ngepunka pengawa ngelepaska orang Israel ari jari orang Pilistin.”

⁶Udah nya indu nya lalu madahka utai nya ngagai laki iya. Ku iya, “Siku nabi udah datai ngagai aku, lalu gamal iya baka gamal melikat, lalu ati aku balat takut. Aku enda nanyaka penatai iya, lalu iya pen enda mega madahka nama diri ngagai aku.

⁷Tang iya bisi madahka aku deka ngandung, lalu ngadaka anak lelaki siku. Iya enda ngasuh aku ngirup wain tauka ai ti bisa, tauka makai pemakai ti enda tau diempa, laban anak mit nya deka diserahka ngagai Allah Taala nyadi Nasir seumur idup.”

⁸Udah nya Manoah besampi ngagai TUHAN. Ku iya, “TUHAN, asuh nabi nya pulai kitu baru ngagai kami, ngambika iya madahka ngagai kami utai ti patut dikereja kami lebuh anak mit nya ada ila.”

⁹Allah Taala lalu ngereja utai ti dipinta Manoah. Melikat Allah Taala lalu datai baru ngagai indu nya lebuh iya benung duduk di umai. Nyadi laki iya nadai enggau iya,

¹⁰nya alai indu nya lalu belanda tekala nya, lalu madahka ngagai laki iya, “Peda nuan! Orang ke datai ngagai aku suba, bisi pegari baru ngagai aku.”

¹¹Manoah angkat lalu nitihka bini iya. Iya mansang ngagai orang nya, lalu nanya, “Kati nuan tu orang ke bejaku enggau bini aku suba?” “Aku meh nya,” ku iya nyaut.

¹²Udah nya Manoah lalu bejaku, “Lebuh jaku nuan dikamatka ila, nama utai ti patut dikereja nembiak nya? Baka ni ku gaya pengidup iya ila?”

¹³Melikat Allah Taala lalu nyaut, “Bini nuan enda tau enda ngereja semua utai ti udah dipadahka aku ngagai iya.

¹⁴Iya enda tau makai utai ti datai ari batang anggur. Iya enda tau ngirup wain tauka ai ti bisa, tauka makai pemakai ti enda tau diempa. Iya enda tau enda ngereja semua utai ti udah dipadahka aku ngagai iya.”

¹⁵Laban Manoah enda nemu orang nya melikat TUHAN, nya alai iya bejaku enggau iya, “Anang guai mupuk. Awakka aku manduk siku kambin ti biak ke nuan.” Tang ku melikat nya bejaku, “Enti aku diau ditu, aku enda makai pemakai nuan nya. Tang enti nuan deka nyendiaka pemakai nya, tunu pemakai nya nyadika piring ti diberi ngagai TUHAN.”

¹⁷Ku Manoah nyaut, “Uji padahka nama nuan ngagai kami duai, ngambika kami duai ulih ngemesaika nuan lebuh jaku nuan nya dikamatka ila.”

¹⁸Melikat nya lalu nanya, “Nama kebuah nuan keran deka nemu nama aku? Nama nya nyelai.”

¹⁹Manoah lalu ngambi siku kambin ti agi biak, enggau gandum mimit, lalu meri utai nya ba atas batu alta, ngagai TUHAN ti ngereja utai ti nyelai.

²⁰Lebuh api nyau mau ba alta nya, Manoah enggau bini iya lalu meda melikat nya niki ke serega dalam api nya. Nya baru Manoah nemu orang nya melikat TUHAN. Iya enggau bini iya lalu nyungkurka diri ke tanah. Seduai iya nadai meda melikat nya agi.

²²Ku Manoah bejaku enggau bini iya, “Tua tentu deka mati, laban tua udah meda Allah Taala!”

²³Tang ku bini iya nyaut, “Enti TUHAN bisi ati deka munuh tua, iya tentu enggai nyambut piring tua. Iya tentu enggai nunjukka semua utai tu, tauka madahka utai ti baka nya ngagai tua diatu.”

²⁴Bini Manoah lalu ngadaka anak lelaki siku, lalu iya meri iya nama Samson. Anak mit nya mansang besai, lalu TUHAN merekatka iya.

²⁵Kuasa TUHAN lalu belabuh ngasuh Samson kering lebuh iya diau entara Sorah enggau Esta-ol dalam kem Dan.