Read Iban Pengulu 17 Bible Online

Pengulu 17 - Iban bible

Pengulu 17

¹Nyadi di menua ti bebukit di menua Epraim bisi siku lelaki benama Mikah.

²Ku iya madahka ngagai indai iya, “Lebuh orang ngenchuri seribu seratus singkap duit pirak nya ari nuan, nuan nyumpah perumpak nya. Aku empu ninga nuan nyumpah iya. Duit nya disimpan aku. Aku empu ke ngenchuri duit nya.” Ku indai iya bejaku, “Awakka TUHAN merekatka nuan, anak!”

³Iya lalu meri duit nya pulai baru ngagai indai iya, lalu ku indai iya bejaku, “Aku nyerahka duit tu ngagai TUHAN, ari jari anak aku empu, kena ngaga engkeramba ari kayu lalu disampak enggau pirak; nya alai diatu aku mulaika duit pirak tu ngagai jari nuan.”

⁴Lebuh iya meri duit nya pulai baru ngagai indai iya, indai iya lalu ngambi dua ratus singkap ari duit pirak nya, lalu meri dua ratus singkap duit nya ngagai siku tukang besi, ke lalu ngaga siku engkeramba, ari kayu, lalu nyampak engkeramba nya enggau pirak nya. Engkeramba nya lalu disimpan dalam rumah Mikah.

⁵Nyadi Mikah endang bisi endur alai iya empu besembiang. Iya ngaga engkeramba enggau siti epod, lalu nyiri siku ari bala anak lelaki iya nyadi imam.

⁶ Menua Israel endang nadai raja lebuh maya nya. Semua orang ngereja utai nitihka peneka ati sida empu.

⁷Nyadi lebuh maya nya mega, bisi siku orang bujang ari peturun Lewi, ti diau di nengeri Betlehem, di menua Judah.

⁸Iya ninggalka nengeri Betlehem, ngiga endur bukai alai diau. Lebuh iya benung bejalai, iya datai ba rumah Mikah di menua ti bebukit di menua Epraim.

⁹Mikah lalu nanya iya, “Ari ni penatai nuan?” Orang bujang nya lalu nyaut, “Aku tu orang Lewi ari nengeri Betlehem, di menua Judah. Aku ngiga endur alai diau.”

¹⁰Ku Mikah bejaku enggau iya, “Diau enggau aku, lalu nyadi penyanding penemu sereta nyadi imam aku, lalu aku deka meri ngagai nuan sepuluh singkap duit pirak setaun, gari, enggau pemakai.

¹¹Orang bujang nya besetuju deka diau enggau Mikah, lalu iya nyadi baka anak Mikah empu.

¹²Mikah ngasuh iya nyadi imam, lalu iya diau dalam rumah Mikah.

¹³Ku Mikah bejaku, “Diatu aku nemu TUHAN deka ngasuh aku mujur, laban aku bisi siku orang Lewi nyadika imam aku.”