Read Iban Pengulu 18 Bible Online

Pengulu 18 - Iban bible

Pengulu 18

¹Menua Israel nadai raja lebuh maya nya kelia, lalu raban bansa Dan agi benung begigaka menua ti tau diambu sida alai sida tau ngentapka diri, laban sida apin diberi menua.

²Nya alai orang ari raban bansa Dan milih lima iku orang ke tau dikarapka[20] ari suku raban bansa sida empu, lalu meri atur ngasuh sida bejalai ari nengeri Sorah enggau ari nengeri Esta-ol lalu matau menua nya. Lebuh sida datai ba menua ti bebukit di menua Epraim, sida lalu diau ba rumah Mikah.

³Lebuh sida benung dia, sida ninga orang Lewi nya bejaku. Sida mansang lalu nanya iya, “Nama pengawa nuan ditu? Sapa mai nuan kitu?”

⁴Ku orang Lewi nya nyaut, “Aku diau ditu ari atur Mikah; iya ngaji aku nyadi imam iya.”

⁵Ku sida bejaku enggau iya, “Saup kami nanya ngagai Allah Taala enti pejalai kami tu deka mujur tauka enda.”

⁶Ku imam nya nyaut, “Kita nadai utai ngawa. TUHAN deka ngintu kita dalam pejalai kita.”

⁷Sida lima iku nya lalu mupuk, mansang ngagai nengeri Lais. Sida meda orang di nengeri nya diau likun baka orang Sidon. Orang nengeri nya diau bebaik enggau orang bukai, lalu nadai laya enggau orang bukai. Sida bisi semua utai ti dipeguna sida. Sida diau jauh ari orang Sidon, lalu nadai kaul enggau orang bansa bukai.

⁸Lebuh sida lima nya pulai ngagai Sorah enggau ngagai Esta-ol, orang mayuh lalu nanyaka utai ti ditemu sida.

⁹“Aram kitai nyerang Lais,” ku sida nyaut.” Kami udah meda menua nya. Tanah dia manah. Anang diau ditu lalu nadai ngereja apa-apa. Aram mupuk enggau jampat lalu ngambi menua nya!

¹⁰Lebuh kita datai din ila, kita deka nemu orang dia nadai ngadang utai bisi deka nyadi ba sida. Menua nya besai, sereta bisi semua utai ti dipeguna kita, lalu Allah Taala udah meri menua nya ngagai kita.”

¹¹Enam ratus iku bala lelaki ari suku raban bansa ti diturunka Dan lalu angkat ari Sorah enggau ari Esta-ol mai senyata perang sida.

¹²Sida lalu nirika kem sida tunga ke barat ari Kiriat-jearim di menua Judah. Nya kebuah endur nya agi dikumbai Kem Dan nyentuk ngagai diatu.

¹³Sida angkat ari endur nya lalu datai ba rumah Mikah, di menua ti bebukit di menua Epraim.

¹⁴Udah nya orang lima iku ti udah meresa menua ngelingi Lais lalu bejaku enggau bala pangan sida, “Kati kita nemu, dalam sebuah rumah ditu bisi engkeramba ti digaga ari kayu lalu disampak enggau pirak? Engkeramba bukai pen bisi, lalu epod pen bisi. Nama utai ti patut dikereja kitai, dalam pikir kita?”

¹⁵Sida lalu mansang ngagai rumah Mikah, ti alai orang Lewi nya diau, lalu nanya ngagai iya pasal pengidup iya.

¹⁶Nyadi lebuh maya nya, enam ratus iku bala soldadu ari raban bansa Dan benung bediri ba pintu penama, sedia deka nyerang.

¹⁷Pematau ke lima iku nya lalu terus mansang ngagai rumah nya, lalu ngambi engkeramba ti digaga ari kayu sereta disampak enggau pirak, enggau engkeramba ti bukai, enggau epod nya. Nyadi imam nya benung bediri enggau enam ratus iku bala soldadu ba mua pintu penama.

¹⁸Lebuh orang lima iku nya tama ngagai rumah Mikah, lalu ngambi engkeramba nya, imam nya lalu nanya, “Nama pengawa kita tu?”

¹⁹Ku sida madahka ngagai iya, “Anang bemunyi. Anang bejaku. Mupuk aja enggau kami, lalu nyadi imam enggau nyadi penyanding penemu kami. Kati nuan rindu agi nyadi imam ke siti suku raban bansa, ari ti nyadi imam ke siti raban bansa orang Israel?”

²⁰Imam nya lalu lantang ati ninga jaku nya. Iya lalu ngambi engkeramba nya, lalu mupuk enggau sida.

²¹Sida nguing lalu angkat ari endur nya. Bala anak sida, jelu tupi, enggau reta tengkira sida dibai dulu ari sida.

²²Lebuh sida udah jauh ngejangka rumah nya, Mikah lalu mesanka orang ke berimbai pendiau enggau iya, mai sida mansang beperang. Lebuh sida nyau ulih tepegaika raban bansa Dan

²³sida lalu ngangau. Orang Dan nguing lalu nanya Mikah, “Nama kebuah nuan mai ngemayuh nya orang datai ditu?”

²⁴Disaut Mikah, “Kita nabanka imam aku enggau engkeramba ti udah digaga aku, lalu mupuk, datai ke aku nyau nadai utai agi, lalu kita nanya, ‘Nama kebuah’?”

²⁵Orang Dan lalu madahka ngagai Mikah, “Manah nuan badu agi bejaku, enggai ke bala orang tu ringat, lalu nyerang nuan. Enti sida nyerang nuan, nuan enggau semua kita sebilik tetap mati.”

²⁶Udah nya raban bansa Dan majakka pejalai sida, lalu lebuh Mikah nemu sida enda ulih dialahka iya, iya nguing, lalu pulai.

²⁷Lebuh orang Dan udah ngerampas imam enggau engkeramba ti udah digaga Mikah, sida lalu nyerang Lais lalu nunu nengeri sida.

²⁸Orang di nengeri nya nadai orang nulung, laban sida jauh ari nengeri Sidon, lalu sida nadai kaul enggau orang bukai. Nengeri sida nya ba lebak semak nengeri Bet-rehop. Orang Dan lalu ngaga nengeri nya baru, lalu ngentapka diri dia.

²⁹Sida lalu nukar nama nengeri nya ngagai nama Dan, ngangkatka nama aki ini sida ke benama Dan anak Jakop.

³⁰Orang Dan lalu nirika engkeramba nya ngambika bisi disembah sida, lalu Jonatan anak Gersom, uchu Moses, bekereja nyadi imam ke raban bansa Dan, lalu peturun iya nyadika imam sida nyentuk ngagai maya sida ditabanka ngagai menua bukai.

³¹Sida lalu nirika engkeramba ti udah digaga Mikah, seagi-agi Langkau Kain Allah Taala meruan di Siloh.