Read Iban Pengulu 2 Bible Online

Pengulu 2 - Iban bible

Pengulu 2

¹Melikat TUHAN bejalai ari Gilgal ngagai Bokim, lalu bejaku enggau orang Israel, “Aku udah mai kita pansut ari menua Ejip, lalu udah mai kita ngagai menua ti udah disemaya Aku ngagai aki ini kita. Ku Aku, ‘Aku enggai mungkir ari sempekat Aku enggau kita.

² Kita enda tau sekali-kali ngaga sempekat enggau orang ke diau di menua tu. Kita enda tau enda ngeruntuhka alta sida.’ Tang kita enda ngereja utai ti diasuh Aku, tang ngereja utai ti enda disagi Aku!

³Nya alai Aku madahka ngagai kita diatu, Aku enggai muru bansa orang tu ari mua kita lebuh kita nyerang. Sida deka nyadi munsuh kita, lalu kita deka disintak panjuk sida lalu nyembah petara sida.”

⁴Lebuh melikat nya udah nyebut nya, semua orang Israel lalu belabuh nyabak magang.

⁵Nya kebuah endur nya dikumbai Bokim.[5] Sida lalu ngenjuk piring ngagai TUHAN ba endur nya.

⁶Josua lalu ngasuh orang Israel mupuk. Sida mupuk lalu ngambu menua ti udah diungkupka ngagai sida.

⁷Lebuh Josua agi idup, orang Israel majak nyembah TUHAN. Indah lebuh iya udah mati, deh sida agi nyembah TUHAN, seagi-agi orang ke tuai agi meruan idup, iya nya orang ke udah meda semua pengawa ti besai ti udah dikereja TUHAN ti orang Israel.

⁸Josua anak Nun, ke nembiak TUHAN, mati lebuh umur iya seratus sepuluh taun.

⁹ Iya dikuburka ba tanah iya empu di Timnat-serah, di menua ti bebukit di menua Epraim, tunga ke utara Bukit Gaas.

¹⁰Orang ke rebak iya udah mega mati magang, lalu rebak orang ke nangkanka sida enda agi ingatka TUHAN, tauka pasal utai ti udah dikereja TUHAN ti orang Israel.

¹¹Udah nya orang Israel bedosa ngelaban TUHAN, lalu belabuh nyembah Baal.

¹²Sida ninggalka TUHAN Allah Taala aki ini sida, Allah Taala ti udah mai sida pansut ari menua Ejip, lalu sida belabuh nyembah petara bukai, iya nya petara bansa orang ke diau ngelingi sida. Sida meremi ngagai petara nya, lalu TUHAN ringat.

¹³Sida ninggalka TUHAN, lalu nyembah Baal enggau Astarte.

¹⁴Nya alai TUHAN pedis ati ngagai orang Israel, lalu nejuka bala perumpak nyerang lalu ngerumpak sida. Iya nejuka munsuh ti ngelingi sida ngalahka sida, lalu orang Israel enda ulih nyaga diri agi.

¹⁵Genap kali sida mansang beperang, TUHAN ngelaban sida, munyi ti udah dipadahka Iya. Sida amat merinsa.

¹⁶Udah nya TUHAN meri orang Israel tuai ke ngelepaska sida ari kuasa bala perumpak.

¹⁷Tang orang Israel enggai mendingka bala tuai sida. Orang Israel enda tetap ati ngagai TUHAN, lalu sida nyembah petara bukai. Aki ini sida udah ngasika pesan TUHAN, tang rebak ti baru tu jampat amat badu ngasika pesan TUHAN.

¹⁸Lebuh TUHAN meri siku tuai ngagai orang Israel, TUHAN nyaup tuai nya, lalu ngelepaska orang Israel ari jari munsuh sida, seagi tuai nya meruan idup. TUHAN kasihka sida, laban sida bedemuh natka pemerinsa ditekanka orang.

¹⁹Tang lebuh tuai nya mati, orang Israel lalu pulai baru ngagai pendiau sida ke lama, lalu nyadi jai agi ari rebak ti dulu ari sida. Sida meremi lalu nyembah petara bukai, lalu majak kieh ati nitihka jalai sida ke jai.

²⁰Udah nya TUHAN lalu pedis ati ngagai orang Israel. Ku Iya, “Bansa orang tu udah ngelanggar sempekat ti udah diasuh Aku titihka bala aki ini sida. Nya alai laban sida enda ngasika Aku,

²¹Aku enggai agi muru bansa ti agi diau di menua tu lebuh Josua mati.

²²Aku deka ngena bansa orang nya ngabas sekalika orang Israel deka nitihka jalai Aku, baka aki ini sida, tauka enggai.”

²³Nya alai TUHAN nejuka bansa orang nya mengkang diau di menua nya. TUHAN enda nyagi Josua menang ngelaban sida, lalu Iya pen enda mega muru bansa orang nya lebuh Josua udah mati.