Read Iban Pengulu 20 Bible Online

Pengulu 20 - Iban bible

Pengulu 20

¹Semua orang Israel, kenyau ari Dan di utara, nyentuk ngagai Beer-seba di selatan, enggau orang ari menua Giliat di timur, bela begempuru di mua TUHAN di Mispah.

²Bala tuai semua raban bansa orang Israel bisi enggau ba gempuru bala nembiak Allah Taala nya, empat ratus ribu iku bala soldadu ke bejalai kaki, ke besenyataka pedang.

³Nyadi orang Benjamin bisi ninga pasal orang Israel ke begempuru di Mispah. Orang Israel lalu nanya, “Padahka ngagai kami, baka ni ku utai ti jai tu nyadi?”

⁴Orang Lewi ke bempu indu simpan nya lalu nyaut, “Aku enggau bini simpan aku datai di Gibe-ah di menua Benjamin, lalu deka bemalam dia.

⁵Bala lelaki ari Gibe-ah datai ngamuk aku, lalu ngelulung rumah ti alai kami diau malam nya. Sida deka munuh aku, tang enda nyadi. Sida lalu ngereja bini simpan aku, lalu iya mati.

⁶Aku lalu mai bangkai bini simpan aku, ngelampang tubuh iya, lalu ngirumka siti-siti lampang ngagai dua belas raban bansa orang Israel, laban bala orang nya udah ngereja utai ti jai sereta kamah di menua Israel.

⁷Semua kita orang Israel, baka ni ku penemu kita pasal pekara tu?”

⁸Semua orang lalu angkat sereta, lalu bejaku, “Nadai siku kitai tau pulai ngagai langkau kain kitai, tauka ngagai rumah diri.

⁹Tu utai ti deka dikereja kitai ngagai orang Gibe-ah: kitai deka nyerang sida ngena chara bechabut undi.

¹⁰Sepuluh peratus ari bala orang Israel deka meri bekal ngagai bala soldadu, lalu sida ti bukai deka mansang lalu ngukum Gibe-ah [22] laban orang Gibe-ah udah ngereja pengawa ti kamah di menua Israel.”

¹¹Nya alai semua orang lelaki di menua Israel lalu begempuru, semua seati magang deka nyerang nengeri Gibe-ah.

¹²Raban bansa orang Israel lalu ngasuh bala seruan bejalai ngagai serata menua Benjamin mai jaku tu: “Naka meh pemesai penyai ti udah dikereja kita!

¹³Nya alai, serahka orang ke jai ari nengeri Gibe-ah, ngambika kami munuh sida, lalu muai penyai tu ari menua Israel.” Tang orang Benjamin enggai mendingka jaku bala menyadi sida, iya nya orang Israel ti bukai.

¹⁴Orang Benjamin lalu datai ari semua nengeri sida lalu mansang ngagai nengeri Gibe-ah, deka ngelaban orang Israel.

¹⁵Orang Benjamin ngempuruka dua puluh enam ribu iku soldadu ari semua nengeri sida sehari nya, nambahka tujuh ratus iku orang ari nengeri Gibe-ah nya empu.

¹⁶Tujuh ratus iku ari semua bala orang Benjamin nya chawit, ke ulih nyelinting lambar buk ngena pangwang sida, lalu enda kala salah.

¹⁷Semua orang Israel ti bukai ngempuruka empat ratus ribu iku soldadu; semua sida nya endang orang ke tau serang magang.

¹⁸Orang Israel lalu mansang ngagai Betel, lalu betanya ngagai TUHAN, “Sapa ari bala kami deka terubah ngelabuhka jari nyerang orang Benjamin?” TUHAN lalu nyaut, “Raban bansa Judah.”

¹⁹Bala orang Israel lalu mupuk pagi hari siti, lalu nirika kem sida semak nengeri Gibe-ah.

²⁰Sida lalu mansang nyerang bala soldadu orang Benjamin; sida ngerintai bala sida nunga nengeri nya.

²¹Bala soldadu Benjamin lalu pansut ari nengeri Gibe-ah, lalu sebedau lemai nya, sida udah ulih munuh dua puluh dua ribu iku soldadu orang Israel.

²²Tang orang Israel mengkang berani, lalu ngerintai bala sida ba endur nya baru, ba alai sida ke udah berintai ba hari ti keterubah.

²³Orang Israel lalu nyabak di mua TUHAN nyentuk ngagai lemai; sida lalu betanya ngagai TUHAN, “Kati tau kami mansang baru lalu nyerang bala menyadi kami orang Benjamin?” “Tau,” ku TUHAN nyaut.

²⁴Nya alai, ba hari ti kedua orang Israel lalu nyerang bala soldadu orang Benjamin kedua kali.

²⁵Ba hari ti kedua nya orang Benjamin pansut baru ari nengeri Gibe-ah, lalu munuh lapan belas ribu iku bala soldadu orang Israel ke endang udah chukup dilatih.

²⁶Udah nya semua orang Israel mansang ngagai Betel, lalu ngulit. Sida duduk dia di mua TUHAN, lalu bepasa nyentuk ngagai lemai nya. Sida ngenjuk piring pemaik, lalu nunu piring ti segala ngagai TUHAN.

²⁷Lalu orang Israel betanya ngagai TUHAN (laban Peti Lampang Batu Adat Allah Taala bisi dia lebuh maya nya,

²⁸lalu Pinehas, anak Eleasar, uchu Aron, nyadi tuai ngemataka utai nya lebuh maya nya). Ku sida, “Kati tau kami mansang baru lalu nyerang bala menyadi kami orang Benjamin, tauka kami badu nyerang sida?” Lalu ku TUHAN nyaut, “Tau; laban Aku deka nyerahka sida ngagai jari kita pagila.”

²⁹Nya alai orang Israel lalu ngeramka ipa ngelingi Gibe-ah.

³⁰Ba hari ti ketiga, orang Israel lalu mansang nyerang orang Benjamin, lalu ngerintaika bala sida baka ke dulu ari nya.

³¹Orang Benjamin pansut lalu ngelaban orang Israel, lalu sida diumpan pansut lalu ngejangka diri ari nengeri nya, lalu baka ke dulu, sida belabuh munuh sekeda orang Israel ba jalai raya ti nuju ngagai Betel, enggau ba jalai raya ti nuju ngagai Gibe-ah, enggau di menua pesisir. Kira tiga puluh iku orang Israel mati laban sida.

³²Ku orang Benjamin bejaku, “Kitai udah ngalahka sida baka ke dulu ari tu.” Tang ku orang Israel bejaku, “Aram kitai rari, ngambika sida nitihka kitai ngagai jalai raya.”

³³Semua orang Israel lalu angkat ari endur sida, lalu berintai di Baal-tamar, lalu bala soldadu sida ke ngeramka ipa ari barat nengeri Gibe-ah, pansut ari endur sida.

³⁴Sepuluh ribu lelaki, ke endang udah dipilih ari semua orang Israel, lalu nyerang Gibe-ah. Balat amat sida belaban. Tang bala orang Benjamin enda nemu diri deka alah.

³⁵TUHAN lalu ngalahka orang Benjamin di mua orang Israel; lalu orang Israel munuh 25,100 iku orang Benjamin sehari nya; semua sida nya endang orang ke udah chukup dilatih magang.

³⁶Nya baru orang Benjamin nemu diri udah alah. Bala soldadu orang Israel endang sengaja nyurutka diri ari bala soldadu orang Benjamin, laban sida ngarapka orang ke udah ngeramka ipa, ngalahka Gibe-ah.

³⁷Bala orang ke ngeramka ipa lalu beguai-guai tama ngagai nengeri Gibe-ah; sida munuh semua orang dalam nengeri nya.

³⁸Bala orang Israel, enggau bala soldadu ke ngeramka ipa udah besetuju ngena siti tanda, iya nya, lebuh bala soldadu ke ngeramka ipa udah nunu nengeri nya lalu asap ti tebal pansut ari nengeri nya,

³⁹bala orang Israel enda tau enda mutar lalu ngelaban orang Benjamin. Lebuh maya nya orang Benjamin baru udah munuh kira tiga puluh iku orang Israel, lalu ku sida bejaku, “Sida tentu alah laban kitai, baka ke dulu.”

⁴⁰Tang lebuh asap ti tebal belabuh bebalun pansut ari nengeri nya, orang Benjamin malik kebelakang, lalu meda semua nengeri nya diempa api.

⁴¹Orang Israel lalu mutar; bala orang Benjamin lalu takut, laban sida nemu diri baru deka alah.

⁴²Sida lalu nyurutka diri ari orang Israel, lalu rari tunga ngagai menua puang, tang sida ulih digagai orang Israel, lalu bala soldadu orang Israel ke pansut ari nengeri, munuh sida.

⁴³Orang Israel ngelulung bala orang Benjamin. Sida begagaika orang Benjamin, lalu ngalahka sida kenyau ari Nohah, nyentuk ngagai siti endur ti tunga ke timur nengeri Gibe-ah.

⁴⁴Lapan belas ribu iku bala soldadu Benjamin mati; semua sida nya endang bujang berani magang.

⁴⁵Sida ke bukai nguing lalu rari tunga ngagai menua puang nuju ngagai Batu Rimon. Lima ribu iku sida dibunuh di rantau jalai nya. Orang Israel majak begagaika sida ngagai Gidom, lalu munuh dua ribu iku sida.

⁴⁶Nya alai dua puluh lima ribu iku bala soldadu Benjamin mati sehari nya. Semua sida nya endang bujang berani magang.

⁴⁷Tang enam ratus iku orang Benjamin ngerarika diri ngagai menua puang, ngagai Batu Rimon, lalu sida diau dia empat bulan.

⁴⁸Orang Israel nikal, lalu munuh semua orang Benjamin ti lelaki, ti indu, enggau bala anak mit, nyengkaum jelu tupi sida. Sida nunu semua nengeri ti mit di menua nya.