Read Iban Pengulu 21 Bible Online

Pengulu 21 - Iban bible

Pengulu 21

¹Nyadi lelaki orang Israel udah besumpah di Mispah, ku sida, “Nadai siku kita tau ngasuh anak indu kitai jadi enggau orang Benjamin.”

²Nya alai sida mansang ngagai Betel, lalu duduk dia duie-duie nyabak di mua TUHAN nyentuk ngagai lemai. Ku sida:

³“O TUHAN Allah Taala ke disembah orang Israel, nama kebuah utai tu nyadi di menua tu, datai ke siti raban bansa kami nyau abis lus di menua tu?”

⁴Tumu pagi hari siti bala orang Israel angkat lalu ngaga siti alta ba endur nya. Sida ngenjuk piring pemaik, lalu nunu piring segala.

⁵Sida lalu nanya, “Raban bansa ni ti nadai datai ngagai gempuru besai di mua TUHAN di Mispah?” (Sida nyebut nya laban sida udah besumpah madahka orang ke nadai datai enggau begempuru di Mispah, deka diukum bunuh.)

⁶Orang Israel lalu berasai tusah ati ke menyadi sida ke ari raban Benjamin. Ku sida, “Sehari tu siti raban bansa orang Israel udah lenyau.

⁷Baka ni ku kita ngiga bini ke lelaki orang Benjamin ti agi idup? Kitai udah besumpah di mua TUHAN madahka kitai enggai nyerahka anak indu kitai ngagai sida.”

⁸Lalu ku sida bejaku, “Raban bansa ni ti nadai datai di mua TUHAN di Mispah?” Nya baru sida nemu, nadai siku orang ari Jabes ti di menua Giliat datai ngagai gempuru besai nya.

⁹Laban lebuh orang ngangauka nama bala soldadu, nadai siku orang ari Jabes nyaut.

¹⁰Nya alai bala orang ke begempuru nya lalu ngasuh dua belas ribu iku bala soldadu sida ke pemadu berani mansang ngagai Jabes. Ku sida, “Alai kita mansang ngagai Jabes; lalu bunuh semua orang di Jabes; bunuh mega sida ke indu enggau sida ke mit.

¹¹Bunuh semua orang ke lelaki, enggau semua indu ke ukai dara bungas.”

¹²Sida lalu tetemuka empat ratus iku dara bungas ari bala orang ke diau di Jabes. Sida lalu mai sida indu dara nya ngagai kem di Siloh, di menua Kanaan.

¹³Udah nya semua orang ke begempuru dia lalu ngirumka pesan ngagai orang Benjamin ti diau ba Batu Rimon, mai sida badu agi beperang.

¹⁴Orang Benjamin pulai ari Batu Rimon, lalu orang Israel ti bukai meri sida bala indu ke biak ari Jabes, ti enda dibunuh sida. Tang sida indu nya enda chukup ba semua bala sida.

¹⁵Nya alai orang mayuh berasai sinu ati ke orang Benjamin laban TUHAN udah mechahka penyerakup entara raban bansa orang Israel.

¹⁶Nya alai bala tuai ke bisi ba gempuru dia lalu bejaku, “Orang Benjamin nadai agi indu. Nama utai ti deka dikereja kitai kena kitai meri bini ngagai lelaki orang Benjamin ti agi idup?”

¹⁷Israel enda tau ngelenyauka sebarang raban bansa ari dua belas raban bansa iya. Kitai enda tau enda ngiga jalai kena ngidupka raban bansa Benjamin,

¹⁸tang kitai enda tau nejuka sida jadi enggau anak indu kitai, laban kitai udah nyumpah orang ke nejuka orang Benjamin jadi enggau anak indu kitai.”

¹⁹Udah nya sida berunding, “Gawai ninting taun ke TUHAN di Siloh nyau deka nyadi enda lama da agi.” (Nyadi Siloh nya tunga ke utara Betel, ari selatan Lebonah, lalu tunga ke timur jalai raya ari Betel ngagai Sekem.)

²⁰Sida lalu bejaku enggau orang Benjamin, “Mupuk kita lalu belalai ba kebun anggur,

²¹lalu nganti dia. Lebuh indu ari Siloh pansut deka mansang betanda, kita lalu mansutka diri ari kebun anggur. Genap iku kita lalu ngerampas siku indu ari bala sida nyadika bini kita, lalu bai sida pulai enggau kita ngagai menua Benjamin.

²²Enti apai tauka menyadi lelaki sida datai ngagai kita[23] lalu madahka diri enda besetujuka utai nya, kita[24] tau bejaku enggau sida munyi tu: ‘Kami minta kita kasihka kami lalu ngawakka kami bempu sida, laban kami ukai ngerampas sida ari kita nyadika bini kami lebuh beperang. Nyadi laban kita ukai meri sida ngagai kami, kita enda salah, laban kita ukai mungkir ari semaya kita.’ ”

²³Orang Benjamin lalu ngereja nya. Genap iku sida bela milih siku indu ke biak ke betanda di Siloh, lalu mai indu nya nyadika bini iya. Udah nya sida pulai ngagai menua diri empu, ngaduka nengeri sida, lalu diau dia.

²⁴Lebuh maya nya orang Israel ti bukai lalu mupuk. Genap iku sida pulai ngagai raban bansa diri empu, ngagai ruang bilik diri empu enggau ngagai tanah diri empu.

²⁵ Menua Israel nadai raja lebuh maya nya, lalu genap iku orang bela ngereja utai nitihka peneka ati diri empu.