Read Iban Pengulu 3 Bible Online

Pengulu 3 - Iban bible

Pengulu 3

¹Nya alai TUHAN nejuka sekeda orang bansa bukai diau di menua nya, kena Iya nguji orang Israel ti enda teleba beperang di menua Kanaan.

²Iya ngereja nya ngambika genap serak orang Israel nemu beperang, kelebih agi sida ke nadai kala beperang.

³Orang bansa bukai ti agi diau di menua nya nyengkaum orang Pilistin ke mengkang diau dalam lima buah nengeri, semua orang Kanaan, orang Sidon, enggau orang Ibi ti diau ba Bukit Lebanon berengkah ari Bukit Baal Hermon nyentuk ngagai Lebo-hamat.

⁴Sida nya dikena nguji orang Israel, kena nemu enti sida deka tauka enggai ngasika pesan ti udah diberi TUHAN ngagai aki ini sida, ngena Moses.

⁵Nya alai orang Israel ngentapka diri diau begulai enggau orang Kanaan, orang Iti, orang Amor, orang Peris, orang Ibi, enggau orang Jebus.

⁶Sida jadi enggau bansa orang nya, lalu nyembah petara sida.

⁷Orang Israel enda agi ingatka TUHAN Allah Taala sida. Sida bedosa ngelaban Iya, lalu nyembah engkeramba Baal enggau Aserah.

⁸Nya alai TUHAN ringat ngagai orang Israel, lalu nejuka Raja Kusan-risataim ari menua Mesopotamia ngalahka sida, lalu iya merintah sida lapan taun.

⁹Udah nya orang Israel nyabak ngangauka TUHAN. Iya lalu ngasuh siku orang ngelepaska sida. Orang nya Otnil, anak adi Kalep ke benama Kenas.

¹⁰Roh TUHAN bekuasa ba Otnil, lalu iya nyadi tuai orang Israel. Otnil ngayau, lalu TUHAN ngasuh iya menang ngelaban raja menua Mesopotamia.

¹¹Menua nya lalu nadai agi pengachau empat puluh taun. Otnil lalu mati.

¹²Orang Israel lalu bedosa baru ngelaban TUHAN. Ketegal nya, TUHAN ngasuh Eglon ti nyadi raja orang Moap kering agi ari orang Israel.

¹³Eglon lalu beserakup enggau orang Amon sereta enggau orang Amalek. Sida ngalahka orang Israel lalu ngerampas Jeriko, iya nya nengeri ti mayuh kayu engkerema.

¹⁴Orang Israel diperintah Eglon lapan belas taun.

¹⁵Udah nya orang Israel nyabak ngangauka TUHAN, lalu Iya ngasuh siku orang ngelepaska sida. Orang nya Ehut anak Gera. Orang nya chawit. Iya datai ari raban bansa Benjamin. Orang Israel lalu ngasuh Ehut betemu enggau Eglon, raja Moap, mai pemeri ngagai iya.

¹⁶Ehut lalu ngaga siti pedang ti bemata dua; pemanjai pedang nya kira 50 sentimeter. Iya nanchangka pedang nya ba rusuk kanan iya, dilamun pekayan iya.

¹⁷Udah nya iya mai pemeri ngagai Eglon. Nyadi Eglon tu orang ke gemu amat.

¹⁸Lebuh Ehut udah meri pemeri ngagai Eglon, Ehut lalu ngasuh orang ke udah mai pemeri nya pulai.

¹⁹Tang lebuh Ehut datai ba batu ti udah diukir, iya nikal baru ngagai Eglon, lalu bejaku enggau iya, “Tuan Raja, aku bisi pesan ti resia ti deka dipadahka aku ngagai nuan.” Raja nya lalu ngasuh bala orang gaji iya pansut, ninggalka seduai iya Ehut kediri.

²⁰Ehut lalu datai semak ngagai raja ke benung duduk. Ehut lalu bejaku, “Aku bisi pesan ari Allah Taala ke nuan.” Raja lalu bediri.

²¹Ehut lalu nyintak pedang ari rusuk kanan iya ngena jari kiba, lalu ngerejangka pedang nya ngagai perut raja.

²²Pedang nya ampuh, ngebuska tubuh raja, datai ke ulu pedang nya nyau ampuh ke dalam lemak raja. Ehut nejuka pedang nya mengkang ba perut raja.

²³Ehut lalu pansut, nikupka pintu bilik raja lalu ngunchi pintu nya.

²⁴Lebuh bala orang gaji datai, sida nemu pintu nya dikunchi. Tang sida ngumbai raja bisi di dalam, agi dalam bilik mandi.

²⁵Sida lalu nganti, tang lebuh raja mengkang enda muka pintu, sida ngambi kunchi lalu muka pintu nya, lalu tepedaka raja sida mati garing-garing ba geladak.

²⁶Sekumbang bala orang gaji benung nganti raja muka pintu, Ehut majak ngerarika diri. Iya mansa batu ti udah diukir nya, lalu rari ngagai Seirah.

²⁷Lebuh iya datai di Seirah, di menua ti bebukit di menua Epraim, iya lalu nyepu terumpit kena iya megau orang Israel, deka mai sida mansang beperang. Udah nya iya lalu nguluka sida nurun ari menua ti bebukit nya.

²⁸Ku iya, “Titihka aku, laban TUHAN udah nyerahka orang Moap ngagai jari kitai.” Sida lalu nitihka Ehut, lalu ngalahka orang Moap ba pemeraka Sungai Jordan. Nadai siku munsuh ditejuka sida meraka sungai nya.

²⁹Sehari nya sida munuh kira sepuluh ribu iku bala soldadu orang Moap ti pemadu kering. Nadai siku sida ulih ngerarika diri.

³⁰Nya meh hari sida ngalahka orang Moap. Menua lalu nadai agi pengachau lapan puluh taun.

³¹Tuai ke nangkanka Ehut nya Samgar anak Anat. Samgar mega ngelepaska orang Israel. Iya ngereja pengawa nya lebuh iya munuh enam ratus iku orang Pilistin ngena tungkat ti dikena iya ngibun sapi.