Read Iban Pengulu 4 Bible Online

Pengulu 4 - Iban bible

Pengulu 4

¹Lebuh Ehut udah mati, orang Israel lalu bedosa baru ngelaban TUHAN.

²Nya alai TUHAN nejuka sida dialahka Jabin, siku raja orang Kanaan ke merintah di nengeri Hasor. Orang ke nyadi tuai ke bala soldadu iya nya Sisera, ti diau di Haroset-ha-goiim.

³Jabin bisi semilan ratus buah kerita perang ti digaga ari besi, lalu iya balat amat nekan sereta merinsaka orang Israel lebuh iya merintah sida dua puluh taun. Udah nya orang Israel nyabak ngangauka TUHAN.

⁴Nyadi Deborah, bini Lapidot, nya nabi, lalu iya bekereja nyadi hakim ke orang Israel lebuh maya nya menya.

⁵Iya selalu duduk di baruh sepun kayu engkerema, ba entara nengeri Ramah enggau nengeri Betel, di menua ti bebukit di menua Epraim, lalu orang Israel datai kia minta iya ngatur pekara sida.

⁶Nyadi sekali Deborah mesanka Barak anak Abinoam datai ngagai iya ari nengeri Kedes di menua Naptali. Ku iya bejaku enggau Barak, “TUHAN Allah Taala ke disembah orang Israel udah meri pesan tu ngagai nuan: ‘Bai sepuluh ribu iku orang ari raban bansa Naptali enggau Sebulun, lalu uluka sida ngagai Bukit Tabor.

⁷Aku deka mai Sisera, tuai soldadu Jabin, lalu ngasuh iya beperang ngelaban nuan ba Sungai Kison. Iya deka mai kerita perang iya enggau bala soldadu iya, tang Aku deka ngasuh nuan menang.’ ”

⁸Barak lalu nyaut, “Aku sigi mupuk, enti nuan deka mupuk enggau aku, tang enti nuan enggai mupuk enggau aku, aku enda mupuk.”

⁹Disaut Deborah, “Barang ku jaku. Aku deka mupuk enggau nuan, tang nuan enda dibasa orang ketegal pemenang nya, laban TUHAN deka nyerahka Sisera ngagai indu.” Deborah lalu mupuk enggau Barak ngagai Kedes.

¹⁰Barak mesanka raban bansa Sebulun enggau raban bansa Naptali datai ngagai Kedes, lalu sepuluh ribu iku orang nitihka iya. Deborah lalu mupuk enggau Barak.

¹¹Ba urung maya nya Heber, orang Keni udah nirika kem iya ba semak Kedes, semak kayu oak ti di Sananim. Iya udah ninggalka orang Keni ti bukai, iya nya orang ke ari peturun Hobap, ipar Moses.

¹²Lebuh Sisera nemu Barak udah niki ngagai Bukit Tabor,

¹³iya mesanka semilan ratus buah kerita perang iya ti digaga ari besi, enggau semua soldadu iya, lalu ngasuh sida angkat ari Haroset-ha-goiim lalu mansang ngagai Sungai Kison.

¹⁴Deborah lalu bejaku enggau Barak, “Mupuk nuan! TUHAN deka nguluka nuan! Sehari tu TUHAN deka ngasuh nuan menang ngelaban Sisera.” Barak lalu nurun ari Bukit Tabor, mai sepuluh ribu iku soldadu.

¹⁵Lebuh Barak enggau bala soldadu iya nyerang, TUHAN lalu ngasuh Sisera, kerita perang enggau bala soldadu iya begau abis ati.[6] Sisera nurun ari kerita perang iya, lalu rari bejalai kaki.

¹⁶Barak begagaika kerita perang enggau bala soldadu Sisera nyentuk ngagai Haroset-ha-goiim, lalu semua bala soldadu Sisera abis dibunuh. Nadai siku sida ditejuka idup.

¹⁷Sisera rari ngagai langkau kain Jael, bini Heber orang Keni laban Jabin, ti nyadi raja di Hasor, udah bebaik enggau suku raban bansa Heber.

¹⁸Jael pansut lalu ngambat Sisera. Ku iya bejaku enggau Sisera, “Tama ngagai langkau kain aku. tuan. Anang takut.” Sisera lalu tama, lalu Jael ngelalaika iya ari belakang kain tirai.[7]

¹⁹Ku Sisera bejaku enggau Jael, “Beri aku ngirup. Aus amat aku tu.” Jael lalu muka siti sarang ai tusu, lalu meri iya ngirup. Jael lalu ngelalaika Sisera baru.

²⁰Udah nya Sisera bejaku enggau iya, “Bediri di mua pintu langkau kain. Enti orang bisi datai lalu nanyaka enti orang bisi ditu, padahka nadai.”

²¹Sisera nyau udah lelak amat, nya alai iya jenak amat tinduk. Jael lalu ngambi tukul enggau siti tiang bantil langkau kain, mansang begadai-gadai ngagai Sisera, lalu mantangka tiang bantil nya ba tepisan Sisera, kebus ke tanah. Sisera lalu mati.

²²Lebuh Barak datai ngiga Sisera, Jael lalu pansut ngambat Barak. Ku Jael bejaku enggau Barak, “Datai kitu! Aku deka madahka ngagai nuan orang ke digiga nuan.” Barak lalu tama enggau Jael, lalu iya tepedaka Sisera garing-garing ba tanah, mati, dipantang ngena tiang bantil langkau kain ti ngebuska pala iya.

²³Sehari nya Allah Taala ngasuh orang Israel ngalahka Jabin raja orang Kanaan.

²⁴Sida lalu bebendar agi ngelaban Jabin, datai ke nyau mati dibunuh sida.