Read Iban Pengulu 5 Bible Online

Pengulu 5 - Iban bible

Pengulu 5

¹Ba hari nya Deborah seduai Barak anak Abinoam bepantun ngena lagu tu:

²“Pujika TUHAN! Orang Israel mutus ati deka belaban. Orang Israel gaga ati nyerahka diri mansang beperang.

³Pendingka tu ulih kita bala raja enggau pemerintah! Aku deka belagu lalu nebah musik ke TUHAN Allah Taala ke disembah orang Israel.

⁴TUHAN, lebuh Nuan ninggalka bukit di Seir, lebuh Nuan pansut ari menua Edom, tanah berenyang, lalu hari ujan. Sigi amat, ai tebubuh ari mua hari.

⁵ Bukit berenyang di mua TUHAN ti datai ari Sinai, di mua TUHAN Allah Taala ke disembah orang Israel.

⁶Lebuh maya Samgar anak Anat, lebuh maya Jael, kerita unta nadai agi bejalai nengah menua tu lalu orang nadai agi bejalai nengah jalai raya.

⁷Nengeri orang Israel nadai agi orang nguan, Deborah. Nengeri nya puang nyentuk ngagai maya nuan datai, baka indai orang Israel.

⁸Lebuh orang Israel nyembah petara bukai perang lalu nyadi di menua Israel Ari empat puluh ribu iku orang Israel, nadai siku sida mai terabai tauka sangkuh.

⁹Ati aku endang semampai ingatka bala tuai soldadu orang Israel, enggau bala orang ke gaga ati nyerahka diri mansang beperang. Puji TUHAN!

¹⁰“Padahka pasal utai nya [8] kita ke nepan keledai ti burak, ke duduk ba atas penuduk ti ba belakang keledai nya, enggau kita ke bejalai kaki.

¹¹Pendingka orang mayuh ke richah ba tisi telaga ke madahka pasal pemenang TUHAN pemenang orang Israel! Udah nya, bala nembiak TUHAN bebaris nurun ari nengeri sida.[9]

¹²Deborah, uluka bala! Uluka sida! Belagu lebuh kitai bejalai! Mansang ke mua meh nuan Barak anak Abinoam. Bai orang tangkap nuan kebukai!

¹³Udah nya orang ke tetap ati deka nurun ngagai bala tuai sida. Bala nembiak TUHAN datai ngagai Iya [10] sedia deka beperang.

¹⁴Sida datai [11] ari Epraim mansang ngagai lebak, ngentudika raban bansa Benjamin enggau bala sida. Bala tuai soldadu nurun ari Machir, bala pemesai nurun ari Sebulun.

¹⁵Bala tuai raban bansa Isakar datai enggau Deborah. Sigi amat. Isakar datai, lalu Barak mega datai, lalu sida nitihka Barak ngagai lebak nya. Tang suku raban bansa ti diturunka Reuben beserekang penemu. Sida enda nemu mutuska runding sekalika sida datai tauka enda.

¹⁶Nama kebuah sida ninggalka diri enggau bedus sida? Deka mendingka bala pengibun bedus ngumbai bedus sida? Sigi amat. Suku raban bansa ti diturunka Reuben udah beserekang penemu. Sida enda nemu mutuska runding sekalika sida datai tauka enda.

¹⁷Raban bansa Gat diau di timur Sungai Jordan, lalu raban bansa Dan mengkang diau semak kapal sida. Raban bansa Aser diau semak tebing tasik. Sida mengkang diau ba tebing tasik.

¹⁸Tang raban bansa Sebulun enggau Naptali berambunka nyawa beperang.

¹⁹Ba Taanak, semak sungai Megido, bala raja datai lalu nyerang. Bala raja orang Kanaan nyerang, tang sida enda nabanka perengka pirak.

²⁰Bintang nyerang ari langit. Lebuh sida bejalai meraka langit, sida beperang ngelaban Sisera.

²¹Sida anyut ditabanka ai bah di Kison, Sungai Kison ti deras. Aku deka bejalai, lalu majak bejalai, ngena pengering!

²²Udah nya bala kuda datai belanda, kaki sida redup-redup ngindik tanah.

²³“Sumpah Meros,” ku melikat TUHAN bejaku, “siti sumpah ke orang ke diau dia, laban sida nadai datai nyaup TUHAN, nyadi soldadu lalu beperang ngarika Iya.

²⁴“Indu ti pemadu beberekat nya Jael, bini Heber ari raban bansa Ken, indu ke pemadu beberekat ari semua indu ke diau dalam langkau kain.

²⁵Sisera minta ai irup, tang Jael meri iya ai tusu. Jael mai ngagai iya ai tusu ngena mangkuk ti manah gaya.

²⁶Ba jari iya sepiak, iya mai siti tiang bantil langkau kain, lalu enggau jari iya sepiak, iya mai tukul. Iya ngembalka Sisera lalu mechahka kerubung pala iya. Iya ngebuska pala Sisera.

²⁷Sisera angkat nyerugang, rebah lalu mati semak kaki Jael. Semak kaki Jael, iya angkat nyerugang lalu rebah. Iya mati lalu rebah ke tanah.

²⁸Indai Sisera nyenguk ari jenila. Iya nilik ari [12] belakang jenila. “Nama kebuah kerita perang iya lalu apin datai?” ku iya nanya. “Nama kebuah kuda iya lalu apin pulai?”

²⁹Pangan iya ke pemadu pintar lalu nyaut iya, lalu ku iya betanduka runding dalam ati diri,

³⁰“Sida semina begigaka utai ti deka ditangkap sereta dibagi, siku tauka dua iku indu ke genap iku soldadu, kain ti berega ke Sisera, kain ti udah disulam kena malut rekung kuin.”

³¹“Awakka semua munsuh Nuan mati baka nya, O TUHAN, tang awakka bala pangan Nuan manchar baka mata hari ti benung niki! Menua nya lalu nadai agi pengachau empat puluh taun.