Read Iban Pengulu 7 Bible Online

Pengulu 7 - Iban bible

Pengulu 7

¹Nyadi sekali, Gideon enggau semua bala iya angkat tumu pagi, lalu nirika kem sida ngimbai mata ai di Harot. Nyadi orang Midian nirika kem sida ba lebak ti tunga ke utara ari sida, ngimbai bukit Moreh.

²Ku TUHAN bejaku ngagai Gideon, “Bala nuan kelalu mayuh. Aku enggai ngasuh sida menang ngelaban orang Midian, enggai ke sida ngumbai diri menang ketegal pengering sida empu, lalu enggai muji Aku.

³ Padahka ngagai orang mayuh munyi tu, ‘Barang sapa takut, awakka iya pulai.’ ” Baka nya ku jalai Gideon nguji sida; lalu dua puluh dua ribu iku pulai. Ka semina sepuluh ribu iku agi tinggal.

⁴Udah nya TUHAN lalu bejaku baru enggau Gideon, “Bala nuan agi kelalu mayuh. Bai sida ngagai ai. Din Aku deka nguji sida ke nuan. Enti Aku madahka ngagai nuan, ‘Orang tu deka bejalai enggau nuan,’ orang nya deka bejalai enggau nuan. Enti Aku madahka ngagai nuan, ‘Orang tu enda tau bejalai enggau nuan,’ iya enda bejalai enggau nuan.”

⁵Gideon lalu mai sida ngagai ai. TUHAN lalu bejaku ngagai Gideon, “Seraraka semua orang ke ngirup baka ukui, ari sida ke nyerugang lalu ngirup.”

⁶Tiga ratus iku sida ngauk ai ngena jari, lalu ngirup ai nya ari jari sida. Semua sida ti bukai nyerugang magang, lalu ngirup.

⁷Ku TUHAN bejaku ngagai Gideon, “Aku deka ngelepaska nuan lalu ngasuh nuan menang ngelaban orang Midian ngena tiga ratus iku sida ke nilat ai baka ukui. Asuh semua sida ti bukai pulai.”

⁸Gideon ngasuh semua orang Israel pulai, kelimpah ari sida ke tiga ratus iku nya. Semua bekal enggau terumpit sida ti bukai nya lalu diserahka sida ngagai orang ke tiga ratus iku nya. Nyadi kem orang Midian nya ba lebak ti ari baruh sida.

⁹Malam nya TUHAN bejaku ngagai Gideon, “Angkat, lalu serang kem nya; laban Aku udah nyerahka kem nya ngagai jari nuan.

¹⁰Tang enti nuan takut nyerang, bai nembiak nuan Purah, lalu mansang ngagai kem nya,

¹¹lalu pendingka utai ti disebut sida. Lebuh nuan udah mendingka utai ti disebut sida, nuan deka berani nyerang kem nya.” Gideon enggau nembiak iya Purah lalu nurun ngagai tisi kem munsuh.

¹²Orang Midian, orang Amalek enggau orang ari raban bansa ti diau di menua puang nyau ngachir ba lebak nya, ngemayuh bala buntak, lalu jelu unta sida nyau enda ulih diitung, ngemayuh igi pasir ti ba tebing tasik.

¹³Lebuh Gideon datai ba tisi kem nya, iya ninga siku orang madahka mimpi diri ngagai pangan iya. Ku orang nya bejaku, “Aku bisi mimpi, tepedaka siti tuku roti barli bebaring ngagai kem kitai, lalu ngerenchah sebuah langkau kain, ninggang lalu ngeruntuhka iya.”

¹⁴Ku pangan orang nya nyaut, “Nya ukai utai bukai, tang pedang Gideon anak Joas, orang Israel! Allah Taala udah nyerahka orang Midian, enggau semua bala soldadu kitai ngagai jari iya!”

¹⁵Lebuh Gideon ninga orang nya nusui mimpi diri, enggau reti mimpi nya, iya lalu besugang, lalu nyembah TUHAN. Iya lalu pulai ngagai kem orang Israel, lalu ku iya bejaku, “Angkat; laban TUHAN udah nyerahka bala soldadu orang Midian ngagai jari kita!”

¹⁶Iya lalu magi tiga ratus iku bala iya ngagai tiga iti raban, lalu meri ngagai genap iku sida siti terumpit enggau sigi kebuk, ti ngundan siti sempun.

¹⁷Ku iya madahka ngagai sida, “Malik ngagai aku, lalu kereja utai nitihka aku; lebuh aku datai ba tisi kem, kereja utai nitihka aku.

¹⁸Lebuh aku enggau bala aku nyepu terumpit, kita mega nyepu terumpit kita ngelingi kem nya, lalu manjung, ‘Ke TUHAN enggau ke Gideon!’ ”

¹⁹Gideon enggau seratus iku bala iya lalu datai ba tisi kem munsuh ba urung tengah malam, lebuh bala jejaga baru udah betukar. Gideon enggau bala iya lalu nyepu terumpit sida, mechahka kebuk ti dipegai sida.

²⁰Semua tiga iti raban nya nyepu terumpit lalu mechahka kebuk sida, lalu megai sempun ngena jari kiba sida, lalu megai terumpit ti disepu sida ngena jari kanan sida, lalu manjung, “Pedang ke TUHAN enggau ke Gideon!”

²¹Genap iku sida bediri enda nginsit ari endur diri ngelingi kem nya, lalu semua bala soldadu munsuh nyau beterauh rari.

²²Lebuh bala Gideon nyepu tiga ratus iti terumpit sida, TUHAN lalu nyungkak bala soldadu munsuh bepantapka pangan diri. Bala soldadu munsuh belanda tunga ngagai Saretan nyentuk ngagai Bet-sitah, nyentuk ngagai nengeri Abel-meholah semak Tabat.

²³Orang Israel ari raban bansa Naptali, Aser enggau ari dua bengkah raban bansa Manasi lalu dipesanka, lalu sida begagaika orang Midian.

²⁴Gideon lalu ngirumka bala seruan ngagai serata menua ti bebukit. Ku sida, “Nurun lalu serang orang Midian. Kita enda tau enda nan ba Sungai Jordan, enggau ba sungai ti mit nyentuk ngagai Bet-barah, ngambika orang Midian enda meraka sungai nya.” Bala orang Epraim lalu ditesau magang, lalu sida nan ba Sungai Jordan, enggau ba sungai ti mit nyentuk ngagai Bet-barah.

²⁵Sida nangkap dua iku tuai orang Midian, Orep seduai Sep. Sida munuh Orep ba Batu Orep, enggau Sep ba pitan anggur ti ba Sep. Sida majak begagaika orang Midian lalu mai pala Orep enggau pala Sep ngagai Gideon di timur Sungai Jordan.