Read Iban Pengulu 8 Bible Online

Pengulu 8 - Iban bible

Pengulu 8

¹Udah nya orang Epraim lalu bejaku enggau Gideon, “Nama kebuah nuan enda mesanka kami lebuh kita mansang ngelaban orang Midian? Nama kebuah nuan ngaga kami baka nya?” Sida balat amat ngutuk iya.

²Ku Gideon nyaut sida, “Utai ti ulih dikereja aku nya mit amat enti dibandingka enggau utai ti udah dikereja kita. Indah utai ti mimit aja ti dikereja kita orang Epraim, deh mayuh agi ari utai ti udah dikereja semua bala raban peturun Abieser.

³ Ulih kuasa Allah Taala, kita udah tebunuhka Orep seduai Sep, dua iku tuai orang Midian. Nama utai ti udah dikereja aku ti tau dibandingka enggau nya?” Lebuh iya nyebut nya, sida lalu badu agi ringat ngagai iya.

⁴Lebuh maya nya Gideon enggau bala iya ke tiga ratus iku udah datai ba Sungai Jordan, lalu udah meraka sungai nya. Sida nyau lelak amat, tang agi majak begagaika munsuh.

⁵Lebuh sida datai di Sukot, iya lalu bejaku enggau bala lelaki di nengeri nya, “Beri bala aku roti. Sida lelak, lalu aku benung begagaika Sebah seduai Salmuna, raja orang Midian.”

⁶Tang ku bala tuai orang Sukot bejaku, “Nama kebuah kami enda tau enda meri bala soldadu nuan pemakai? Indah Sebah seduai Salmuna deh apin ditangkap kita.”

⁷Gideon lalu bejaku, “Barang ku jaku! Lebuh TUHAN udah nyerahka Sebah enggau Salmuna ngagai jari aku, aku deka nyipat kita ngena duri enggau emperingat ti diambi ari menua puang!”

⁸Gideon lalu bejalai terus ngagai Penuel, lalu minta roti ari orang dia. Tang orang di Penuel mega nyaut munyi orang ke di Sukot.

⁹Gideon lalu bejaku enggau orang Penuel, “Lebuh aku udah menang lalu pulai kitu, aku deka ngeruntuhka menara tu!”

¹⁰Lebuh maya nya Sebah seduai Salmuna bisi di Karkor sama enggau bala soldadu seduai iya. Ari semua bala soldadu raban bansa ti diau di menua puang, semina 15,000 iku aja agi tinggal; 120,000 iku udah dibunuh.

¹¹Gideon bejalai nengah jalai ti nisi menua puang, tunga ke timur ari Nobah enggau Jogbehah, lalu ngenyit nyerang, lebuh bala munsuh benung enda ngadang.

¹²Sebah seduai Salmuna lalu rari; Gideon lalu nitihka seduai iya, nangkap seduai iya, lalu semua bala soldadu seduai iya begau abis ati.[14]

¹³Lebuh Gideon pulai ngayau nengah Genting Heres,

¹⁴iya nangkap siku orang bujang ari Sukot, lalu nanyaka utai ari orang nya. Orang bujang nya lalu nuliska nama tujuh puluh tujuh iku tuai di Sukot.

¹⁵Udah nya Gideon lalu mansang ngagai orang di Sukot, lalu bejaku enggau sida, “Kati kita ingatka diri ke enggai nyaup aku? Kita madahka diri enggai meri pemakai ngagai bala soldadu aku, laban kami apin tetangkapka Sebah seduai Salmuna. Peda kita, tu seduai iya!”

¹⁶Udah nya iya lalu ngambi duri enggau emperingat ari menua puang, lalu nyipat bala tuai orang di Sukot ngena nya.

¹⁷Iya mega ngeruntuhka kuta di Penuel, lalu munuh orang ke lelaki di nengeri nya.

¹⁸Udah nya iya lalu nanya Sebah seduai Salmuna, “Baka ni ku gaya orang ke udah dibunuh seduai di Tabor?” Ku seduai iya nyaut, “Sida baka gamal nuan - genap iku sida bela baka gamal anak raja.”

¹⁹Ku Gideon bejaku, “Sida nya menyadi lelaki aku, anak indai aku. Aku besumpah, enti kita enda munuh sida, aku pen enda mega munuh seduai.”

²⁰Udah nya iya lalu bejaku enggau anak tuai iya ke benama Jeter, “Bunuh seduai iya!” Tang nembiak nya enda nyintak pedang iya. Iya takut, laban iya agi nembiak.

²¹Udah nya Sebah seduai Salmuna lalu bejaku enggau Gideon, “Nuan empu munuh kami duai. Semina orang ke besai tuai aja ulih ngereja pengawa orang ke besai tuai.” Nya alai Gideon lalu munuh seduai iya, lalu ngambi perengka pengias ti ba rekung jelu unta seduai iya.

²²Udah bekau nya, orang Israel lalu bejaku enggau Gideon, “Laban nuan udah ngelepaska kami ari kuasa orang Midian, awakka nuan enggau peturun nuan merintah kami.”

²³Ku Gideon nyaut, “Aku enggai merintah kita, lalu anak aku pen enda mega merintah kita. TUHAN Empu deka merintah kita.”

²⁴Tang ku iya majakka jaku diri, “Awakka aku minta siti aja utai ari kita. Genap iku kita meri ngagai aku antin ti ulih kita.” (Orang Midian, baka orang bansa bukai ke diau di menua puang, bekenaka antin emas ba pending sida.)

²⁵Ku orang mayuh nyaut, “Kami gaga ati meri utai nya ngagai nuan.” Sida lalu nganchau selambar kain, lalu genap iku sida bela ngengkahka semua antin ti udah ulih sida, ba kain nya.

²⁶Antin emas ti diberi ngagai Gideon berat 18 kilogram, enda nyengkaum perengka pengias, tenggak, enggau kain ungu ti dikena raja orang Midian, tauka kungkung rekung ti ba rekung jelu unta sida.

²⁷Gideon lalu ngaga siti engkeramba ari emas nya, lalu ngengkahka engkeramba nya di nengeri iya empu, iya nya Oprah. Semua orang Israel lalu ninggalka Allah Taala, mupuk ngagai nengeri nya lalu nyembah engkeramba nya. Utai nya nyadika panjuk ke Gideon enggau sida sebilik.

²⁸Nya alai orang Midian alah laban orang Israel, lalu enda agi ngachau sida. Menua nya nadai agi pengachau empat puluh taun, nyentuk ngagai pemati Gideon.

²⁹Gideon pulai lalu diau ba rumah iya empu.

³⁰Nyadi iya bisi tujuh puluh iku anak lelaki, laban iya mayuh bini.

³¹Iya mega bisi siku indu simpan di Sekem. Indu nya ngadaka siku anak lelaki ke iya, lalu iya meri anak mit nya nama Abimelek.

³²Gideon anak Joas mati lebuh umur iya nyau tuai, lalu iya dikuburka ba lumbung apai iya Joas, di Oprah, nengeri ti diempu raban peturun Abieser.

³³Udah bekau pemati Gideon, orang Israel lalu enda tetap ati baru ngagai Allah Taala sida, lalu nyembah Baal. Sida ngaga Baal-berit nyadika petara sida.

³⁴Sida enda ingatka TUHAN Allah Taala sida ke udah ngelepaska sida ari kuasa semua munsuh ke ngelingi sida;

³⁵lalu sida enda ngayanka penaluk ngagai ruang bilik Gideon ke semua utai ti manah ti udah dikereja Gideon ke orang Israel.