Read Iban Pengulu 9 Bible Online

Pengulu 9 - Iban bible

Pengulu 9

¹Anak Gideon ke benama Abimelek mansang ngagai nengeri Sekem, ngagai kaban belayan indai iya, lalu bejaku enggau sida, sereta enggau semua suku raban bansa indai iya,

²munyi tu, “Ni bagi ti dipilih kita? Ngasuh tujuh puluh iku anak lelaki Gideon merintah kita, tauka diperintah orang siku aja? Ingat: aku tu endang darah-getah kita empu.”

³Bala kaban belayan indai iya lalu bejaku ngarika iya pasal pekara nya enggau sida ke lelaki di Sekem, lalu sida mutuska runding deka nitihka Abimelek, laban iya kaban belayan sida empu.

⁴Sida meri iya tujuh puluh singkap duit pirak ari rumah sembiang Baal-berit, lalu iya ngena duit nya ngaji orang ke kurang ajar, ke nitihka iya.

⁵Iya lalu mansang ngagai rumah apai iya di Oprah, lalu munuh tujuh puluh iku bala menyadi iya empu, iya nya anak lelaki Gideon, ba atas sigi batu. Tang Jotam, iya nya anak bunsu Gideon belalai, lalu enda kena bunuh.

⁶Udah nya bala orang ari Sekem enggau ari Bet-milo begempuru, lalu mansang ngagai kayu oak keramat sepun di Sekem, lalu nyiri Abimelek nyadi raja.

⁷Lebuh Jotam ninga berita nya, iya mansang lalu bediri ba tuchung Bukit Gerisim, lalu ngangauka sida enggau nyawa ti inggar, “Pendingka aku, kita orang Sekem, ngambika Allah Taala mendingka kita!

⁸Nyadi sekali, bala kayu mansang deka milih sapa ti deka dichiri sida nyadi raja. Ku sida bejaku enggau kayu kana, ‘Nuan nyadi raja kami.’

⁹Ku kayu kana nyaut, ‘Enti aku nyadi raja kita, aku enda tau enda badu agi mansutka minyak ti dikena ngemesaika petara enggau mensia.’

¹⁰Udah nya bala kayu lalu bejaku enggau kayu ara, ‘Awakka nuan datai kitu, lalu nyadi raja kami.’

¹¹Tang ku kayu ara nyaut, ‘Enti aku nyadi raja kita, aku enda tau enda badu agi mansutka buah aku ti manis.’

¹²Nya alai bala kayu lalu bejaku enggau batang anggur, ‘Nuan datai kitu, lalu nyadi raja kami.’

¹³Tang ku batang anggur nyaut, ‘Enti aku nyadi raja kita, aku enda tau enda badu agi mansutka wain ti ngasuh petara enggau mensia lantang ati.’

¹⁴Nya alai semua kayu lalu bejaku enggau madang duri, ‘Nuan datai kitu, lalu nyadi raja kami.’

¹⁵Ku madang duri nyaut, ‘Enti kita amat ngasuh aku nyadi raja kita, datai meh kita kitu ngambika aku nyaga kita. Enti kita enda datai kitu, api ti mau deka pansut ari dan aku ti beduri, lalu nganguska kayu sidar di Lebanon.’

¹⁶Ku Jotam nampung jaku iya, “Kati kita amat manah ati lebuh kita ngasuh Abimelek nyadi raja? Kati kita amat bebasaka nama Gideon, lalu masa ruang bilik iya ngena jalai ti menyana, nitihka pemanah utai ti udah dikereja Gideon?

¹⁷Kingatka tu ulih kita. Apai aku beperang ngarika kita. Iya berambunka nyawa diri ngelepaska kita ari kuasa orang Midian.

¹⁸Tang sehari tu kita mutar ngelaban ruang bilik apai aku. Kita munuh tujuh puluh iku anak lelaki iya ba atas batu sigi, lalu kita nyiri Abimelek, anak apai aku enggau siku indu ke ulun, nyadi raja di Sekem laban Abimelek kaban belayan kita empu.

¹⁹Nya alai, enti utai ti udah dikereja kita sehari tu ngagai Gideon enggau ngagai ruang bilik iya datai ari ati ti manah, awakka kita lantang ati enggau Abimelek, lalu Abimelek lantang ati enggau kita.

²⁰Tang enti enda, awakka api ti mau pansut ari Abimelek, lalu nganguska orang Sekem enggau orang Bet-milo, lalu awakka api ti mau pansut ari orang Sekem enggau Bet-milo, lalu nganguska Abimelek.”

²¹Jotam lalu rari lalu diau di Beer laban iya takutka menyadi iya Abimelek.

²²Abimelek megai perintah di menua Israel tiga taun.

²³Udah nya Allah Taala ngasuh Abimelek enggau orang Sekem ringat ngagai pangan diri, lalu orang Sekem angkat ngelaban Abimelek.

²⁴Utai tu nyadi ngambika Abimelek enggau orang Sekem ti udah meransang Abimelek munuh tujuh puluh iku anak lelaki Gideon, bebayarka ukum penyalah ti udah dikereja sida.

²⁵Orang ke lelaki di Sekem lalu ngasuh orang ari bala sida ngipa Abimelek ba tuchung bukit, lalu sida ngerumpak semua orang ke mansa. Orang lalu madahka pekara nya ngagai Abimelek.

²⁶Lebuh Gaal anak Ebet enggau sida menyadi lelaki iya datai di Sekem, lalu bala orang Sekem andal ati ke iya.

²⁷Semua sida mansang ngagai kebun anggur sida, lalu ngetau buah anggur, ngaga wain, lalu begawai. Sida mansang ngagai rumah sembiang petara sida, alai sida ke makai ngirup, lalu ngeleseka Abimelek.

²⁸Ku Gaal bejaku enggau sida, “Sapa kitai tu alai kitai nyau betuaika Abimelek, lalu sapa Abimelek? Ukai enda iya nya anak Gideon! Lalu iya enggau Sebul ti nyadi pemesai iya bekereja ari baruh bala Hamor apai Sekem? Nya alai, nama kebuah kitai betuaika Abimelek?

²⁹Naka meh pemanah enti sema aku nyadi tuai sida! Aku tetap deka muai Abimelek! Aku tentu deka madahka ngagai iya, “Tambahka bala soldadu nuan. Pansut kitu lalu belaban!’ ”

³⁰Sebul, ke merintah di nengeri nya, ringat lebuh iya ninga jaku Gaal.

³¹Iya lalu ngasuh bala seruan betemu enggau Abimelek di Arumah,[15] lalu nyebut ngagai iya munyi tu: “Gaal anak Ebet enggau bala menyadi iya udah datai di Sekem, lalu sida enda nyagi nuan tama ngagai nengeri nya.

³²Nya alai, nuan enggau bala nuan patut mupuk lebuh malam hari, lalu belalai di umai.

³³Pagila, lebuh tumbuh mata panas, kita angkat lalu nyerang nengeri nya enggau ngenyit. Udah nya, lebuh Gaal enggau bala iya mansang ngelaban nuan, serang sida enggau naka ulih nuan!”

³⁴Abimelek enggau bala iya lalu mupuk malam nya, dibagi ngagai empat bengkah raban, lalu sida belalai ba umai ari luar Sekem.

³⁵Lebuh Abimelek enggau bala iya meda Gaal pansut ari nengeri, lalu bediri ba pintu kuta nengeri nya, sida lalu angkat ari endur alai sida ke belalai.

³⁶Gaal tepedaka sida, lalu bejaku enggau Sebul, “Peda bala orang nyin nurun ari tuchung bukit!” “Nya ukai mensia,” ku Sebul nyaut. “Nya ayuk ba bukit.”

³⁷Gaal lalu bejaku baru, “Peda bala orang nyin nurun ari tuchung bukit. Siti raban bejalai nengah jalai ari kayu oak keramat ti diempu orang ke nemu nilit nasit!”

³⁸Udah nya Sebul lalu bejaku enggau Gaal, “Kini ke tunga mulut nuan ti temegah nya? Nuan empu ke nanyaka kebuah kitai betuaika Abimelek. Nyin bala orang ke dikeleseka nuan. Serang sida.”

³⁹Gaal lalu nguluka orang Sekem pansut, lalu ngelaban Abimelek.

⁴⁰Abimelek belanda mansang ngamuk Gaal. Gaal lalu rari. Mayuh amat orang bakal, nyentuk ngagai pintu kuta nengeri nya.

⁴¹Abimelek diau di Arumah lalu Sebul muru Gaal enggau bala menyadi iya ari Sekem. Nya alai sida Gaal enda tau diau di nengeri nya agi.

⁴²Hari siti bala orang Sekem nurun ke umai. Lebuh orang madahka nya ngagai Abimelek,

⁴³Iya lalu mai bala iya, magi sida ngagai tiga bengkah raban, lalu ngipa orang Sekem ba umai. Lebuh Abimelek meda bala orang pansut ari nengeri nya, iya angkat ari endur alai iya ke belalai, lalu munuh bala orang nya.

⁴⁴Abimelek enggau raban iya beguai-guai mansang lalu bediri ba mua pintu nengeri nya, benung raban ti dua bengkah nyerang bala orang ke di umai, lalu munuh semua sida.

⁴⁵Abimelek nyerang nengeri nya sehari nya. Iya ngalahka nengeri nya, munuh orang ke diau dia, ngerubuh nengeri nya, lalu naburka garam ngagai tanah di nengeri nya.

⁴⁶Lebuh semua bala tuai orang ke dalam menara di Sekem ninga berita nya, sida lalu rari ngagai kuta rumah sembiang Baal-beret.

⁴⁷Orang lalu madahka ngagai Abimelek pasal orang Sekem ti udah begempuru dia.

⁴⁸Abimelek lalu niki ngagai Bukit Salmon mai bala iya. Dia iya ngambi siti kapak, netak lalu merekaska dan kayu, lalu ngesan dan kayu nya. Iya lalu bejaku enggau bala iya, “Kereja enggau jampat utai ti udah dikereja aku.”

⁴⁹Semua sida lalu netak dan kayu. Sida lalu nitihka Abimelek, lalu nugungka dan kayu nya ngimbai kuta nya. Sida nyelup tugung kayu nya, ngambika orang ke diau dalam kuta nya mati. Semua orang dalam kuta nya mati magang, kira seribu iku lelaki enggau indu.

⁵⁰Udah nya Abimelek mansang ngagai Tebes, ngelulung lalu ngalahka nengeri nya.

⁵¹Nyadi di nengeri nya bisi siti kuta ti tegap. Semua lelaki enggau indu di nengeri nya, nyengkaum bala tuai sida, belanda ngagai kuta nya. Sida lalu ngunchi diri di dalam, lalu niki ke perabung.

⁵²Lebuh Abimelek datai nyerang kuta nya, iya mansang ngagai pintu, deka nunu kuta nya.

⁵³ Tang siku indu muai sigi batu kisar ngagai pala Abimelek, mechahka pala iya.

⁵⁴Abimelek lalu ngangauka orang bujang ke mai senyata iya, ku iya, “Sintak pedang nuan, lalu bunuh aku, enggai ke orang ngumbai aku mati dibunuh indu.” Orang bujang nya lalu ngerejang Abimelek ngena pedang, lalu iya mati.

⁵⁵Lebuh orang Israel meda Abimelek udah mati, sida lalu pulai ke rumah.

⁵⁶Nya meh jalai Allah Taala malas Abimelek ketegal penyalah ti udah dikereja iya ngagai apai iya, lebuh iya munuh tujuh puluh iku sida menyadi lelaki iya.

⁵⁷Allah Taala mega ngasuh orang Sekem natka pemerinsa ketegal penyai sida, munyi ti ku Jotam anak Gideon, lebuh iya nyumpah sida.