Read Iban Pemandang 1 Bible Online

Pemandang 1 - Iban bible

Pemandang 1

¹Tu pemandang ari Jesus Kristus, ti diberi Allah Taala ngagai Iya, ngambika Iya ngayanka ngagai bala nembiak Iya utai ti enda tau enda nyadi enda lama da agi. Iya madahka utai nya ngagai nembiak Iya John, ngena siku melikat Iya.

²Lalu John besaksika pasal utai ti dipeda iya, iya nya, jaku Allah Taala, enggau saksi Jesus Kristus, madahka semua utai ti dipeda iya.

³Beberekat meh orang ke macha jaku ti benabi tu ngena nyawa ti inggar, lalu beberekat meh orang ke ninga sereta ngasika utai ti ditulis dalam bup tu, laban maya nyau semak.

⁴ Ari John ngagai tujuh buah eklisia di Asia: Awakka berekat enggau pemaik diberi ngagai kita ari Allah Taala ti bisi diatu, ti udah bisi, enggau ti deka datai, enggau ari tujuh iku roh ke di mua kerusi diraja Iya,

⁵ enggau ari Jesus Kristus, Saksi ke tetap ati, ke terubah diangkatka ari mati, ke merintah semua raja di dunya. Ngagai Iya ke rinduka kitai, lalu udah ngelepaska kitai ari dosa, ulih darah Iya,

⁶ lalu udah ngaga kitai nyadi perintah imam ti bekereja ke Allah Taala Iya, ti Apai Iya, beri meh mulia enggau kuasa ngagai Iya belama-lama iya! Amin.

⁷ Peda! Iya datai dalam remang, lalu semua orang deka meda Iya, nyengkaum orang ke udah ngerejang Iya. Lalu semua bansa di dunya tu deka bekeduie nyabak ketegal Iya. Awakka utai nya nyadi! Amin.

⁸ “Aku tu Pun enggau Pengujung,”[1] ku Tuhan Allah Taala ti Pemadu Bekuasa bejaku, Iya ti diatu, ti udah, enggau ti deka datai.

⁹Aku, John, menyadi kita, ke sama enggau kita natka pemerinsa, bempu Perintah, enggau ngembuan ati ti liat sereta tan, ti endang enggi kitai dalam Jesus, udah dibuai ngagai pulau Patmos ketegal jaku Allah Taala enggau ketegal saksi Jesus.

¹⁰Roh Kudus bekuasa ba aku lebuh Hari Tuhan, lalu aku ninga nyawa ti inggar bejaku ari belakang aku munyi terumpit.

¹¹Ku iya, “Tuliska dalam siti bup utai ti dipeda nuan, lalu kirumka bup nya ngagai tujuh buah eklisia: ngagai Epesus, Smirna, Pergamum, Tiatira, Sardis, Piladelpia, enggau Laudisia.”

¹²Aku lalu nguing deka meda orang ke bejaku ngagai aku, lalu lebuh aku nguing, aku tepedaka tujuh iti penuduk lampu ti digaga ari emas.

¹³ Ba tengah-tengah penuduk lampu nya bisi utai ti baka anak mensia ke ngena baju ti panjai, lalu dada Iya dibelit siti selampai emas.

¹⁴ Pala enggau buk Iya burak baka bulu bedus, ngemurak seleju, lalu mata Iya baka daun api.

¹⁵ Kaki Iya beperenching baka temaga ti udah dipugar, baka ti udah dituchi ngena api, lalu nyawa Iya munyi guru ai wung.

¹⁶ Jari kanan Iya megai tujuh igi bintang, lalu ari nyawa Iya pansut siti pedang ti bemata dua, lalu mua Iya beperenching baka penerang mata hari ti manchar tengah hari.

¹⁷ Lebuh aku meda Iya, aku rebah di kaki Iya baka ke mati. Tang Iya ngengkahka jari kanan Iya ba aku, lalu bejaku, “Anang takut! Aku tu Pun enggau Pengujung,

¹⁸Iya ke idup! Aku udah mati, tang peda, Aku idup belama-lama iya, lalu Aku megai kunchi[2] Pemati enggau Dunya pemati.

¹⁹Nya alai, tuliska utai ti dipeda nuan, utai ti diatu enggau utai ti deka nyadi udah bekau tu ila.

²⁰Misteri pasal tujuh igi bintang ti dipeda nuan ba jari kanan Aku, enggau pasal tujuh iti penuduk lampu ti digaga ari emas nya: tujuh igi bintang nya tujuh iku melikat ke tujuh buah eklisia, lalu tujuh iti penuduk lampu nya tujuh buah eklisia.