Read Iban Pemandang 10 Bible Online

Pemandang 10 - Iban bible

Pemandang 10

¹Udah nya aku lalu tepedaka siku agi melikat ti kering, nurun ari serega. Iya dibalut remang, lalu ari atas puchuk pala iya bisi anakraja. Mua iya baka mata hari, lalu kaki iya baka tiang api.

²Iya megai siti gulung surat ti mit, ti tebuka ba jari iya. Iya nanam kaki kanan iya ba tasik, lalu kaki kiba iya ditanam iya ba tanah.

³Iya lalu ngangau enggau nyawa ti inggar, munyi singa ti negung. Lebuh iya ngangau, tujuh bengkah guntur lalu meletup.

⁴Lebuh guntur tujuh bengkah nya udah meletup, aku baru deka belabuh nulis. Tang aku ninga nyawa bejaku ari serega, “Awakka utai ti udah disebut tujuh bengkah guntur nya nyadika resia. Anang nuliska utai nya!”

⁵ Udah nya, melikat ke dipeda aku bediri ba tasik enggau ba tanah, ngedarka jari kanan iya ke langit.

⁶Iya lalu besumpah atas nama Allah Taala ti idup belama-lama iya, ti udah ngaga langit, tanah, enggau tasik enggau semua utai ti dalam sida. Ku melikat nya bejaku, “Enda lama agi nganti.

⁷Lebuh melikat ti ketujuh nyepu terumpit iya, misteri Allah Taala deka dikamatka, munyi ti udah dipadahka Iya ngagai bala ulun Iya, iya nya sida bala nabi.”

⁸ Udah nya nyawa ti udah didinga aku bejaku ari serega lalu bejaku baru ngagai aku. Ku iya, “Ambi gulung surat ti tebuka nya ari jari melikat ke bediri ba tasik enggau ba tanah.”

⁹ Aku lalu mansang ngagai melikat nya, lalu minta iya meri gulung surat ti mit nya ngagai aku. Lalu ku iya bejaku ngagai aku, “Ambi tu, lalu empa. Iya deka berasai pait dalam perut nuan, tang manis asai ai manyi dalam nyawa nuan.”

¹⁰Aku lalu ngambi gulung surat ti mit nya ari jari iya, lalu aku makai gulung surat nya. Lalu gulung surat nya manis asai ai manyi dalam nyawa aku. Tang lebuh aku udah nelan iya, iya lalu nyadi pait dalam perut aku.

¹¹ Aku lalu diberi pesan tu: “Nuan enda tau enda, sekali agi, benabika pasal mayuh bengkah menua, bansa, jaku enggau raja.”