Read Iban Pemandang 11 Bible Online

Pemandang 11 - Iban bible

Pemandang 11

¹ Udah nya aku lalu diberi siti penyukat ti baka tungkat. Aku lalu diasuh nyukat: “Angkat nuan lalu sukat Rumah Sembiang Allah Taala, enggau alta nya, lalu itung orang ke besembiang dia,

² tang anang nyukat tengah laman ti ari luar Rumah Sembiang. Awakka iya enda disukat, laban endur nya diungkup ke orang kapir, lalu sida deka ngelunjak nengeri ti kudus dalam kandang empat puluh dua bulan.

³Lalu Aku deka meri ngagai saksi aku ke dua iku nya kuasa kena benabi dalam kandang seribu dua ratus enam puluh hari, begari ngena kain guni.”

⁴ Saksi ke dua iku nya dua batang kayu kana, enggau dua iti penuduk lampu ti bediri di mua Tuhan ke merintah dunya.

⁵ Enti orang deka ngemediska seduai iya, api deka pansut ari nyawa seduai iya, lalu ngerusak munsuh nya. Barang sapa deka ngemediska seduai iya, deka dibunuh ngena chara nya.

⁶ Seduai iya bisi kuasa nutup langit ngambika hari enda ujan sekumbang seduai iya ke benabi, lalu seduai iya bisi kuasa atas semua ai, ngasuh ai bebali nyadi darah, enggau kuasa ngemediska dunya ngena semua macham penusah nitihka penyuah ti dikedekaka seduai iya.

⁷ Lalu lebuh seduai iya udah tembu nusui pesan seduai iya, jelu ti niki ari lubang kebung ti nadai buntut nya deka ngelaban seduai iya, ngalah lalu munuh seduai iya,

⁸ lalu bangkai seduai iya deka ditejuka garing-garing ba jalai raya di nengeri ti besai nya, alai Tuhan ti udah diregang. Nengeri nya ngelambangka Sodom, tauka Ejip.

⁹Dalam pengelama tiga hari setengah orang ari semua menua, raban bansa, jaku enggau bansa deka meda bangkai seduai iya, lalu enda nyagi orang nguburka seduai iya.

¹⁰Lalu orang ke diau di dunya deka gaga ati, begawai lalu bekirumka pemeri ngagai pangan diri, ketegal utai ti udah nyadi ba nabi dua iku nya, ti udah balat merinsaka semua orang ke diau di dunya.

¹¹ Tang udah lepas tiga hari setengah, seput pengidup datai ari Allah Taala, lalu tama ngagai seduai iya, lalu seduai iya bediri, lalu semua orang ke meda seduai iya, bela takut magang.

¹² Udah nya seduai iya lalu ninga nyawa ti inggar bejaku ngagai seduai iya ari serega, “Niki ke atas kitu!” Seduai iya lalu niki ke serega dalam remang, dikemataka bala munsuh seduai iya.

¹³ Tekala nya tanah lalu balat amat berenyang lalu sebagi ari sepuluh bagi nengeri runtuh. Tujuh ribu iku orang mati laban tanah ti berenyang nya, lalu sida ti bukai takut lalu ngemuliaka Allah Taala ti di serega.

¹⁴Penusah ti kedua udah lepas, tang penusah ti ketiga deka datai enda lama da agi!

¹⁵ Udah nya melikat ti ketujuh lalu nyepu terumpit iya. Siti nyawa lalu bejaku inggar di serega, “Perintah dunya diatu udah nyadi Perintah Tuhan kitai enggau Perintah Kristus Iya, lalu Iya deka merintah belama-lama iya!”

¹⁶Bala tuai ke dua puluh empat iku, ke duduk ba kerusi diraja sida di mua Allah Taala, lalu nyungkurka diri nyembah Allah Taala,

¹⁷ku sida, “Kami meri terima kasih ngagai Nuan, Tuhan Allah Taala ti Pemadu Bekuasa, Iya ke diatu, enggau ti udah! laban Nuan udah ngambi kuasa Nuan ti besai lalu udah belabuh merintah!

¹⁸ Orang kapir balat ringat, tang pengeringat Nuan datai alai orang ke mati deka diakim, alai Nuan deka meri upah ngagai bala nembiak Nuan, iya nya bala sida nabi, enggau semua nembiak Tuhan, enggau semua orang ke nangika nama Nuan, sida ke mit enggau ke besai, maya alai ngerusak sida ke nyadi pengerusak dunya!”

¹⁹ Rumah Sembiang Allah Taala di serega lalu dibuka, lalu Peti Lampang Batu Adat bisi dipeda dalam Rumah Sembiang nya. Kilat nyelar, munyi letup enggau guru guntur bisi didinga, tanah berenyang, ujan batu balat amat nyadi.