Read Iban Pemandang 12 Bible Online

Pemandang 12 - Iban bible

Pemandang 12

¹Udah nya siti tanda ti besai lalu pegari di langit, iya nya siku indu ke begari ngena mata hari, lalu kaki iya bepelasarka bulan, lalu ba pala iya bisi siti makota ti digaga ari dua belas igi bintang.

² Iya ngandung lalu nyabak laban iya radai deka beranak.

³ Siti agi tanda pegari di langit, iya nya siku naga ti besai ti bechura mirah, ti bisi tujuh igi pala enggau sepuluh iti tanduk, enggau tujuh iti makota ba pala iya.

⁴ Iya narit sebagi ari tiga bagi bintang ti di langit ngena iku iya, lalu nikauka sida ke baruh ngagai dunya. Naga nya lalu bediri di mua indu ke baru deka beranak nya, deka makai anak indu nya lebuh anak mit nya ada.

⁵ Indu nya lalu ngadaka anak lelaki siku, ti deka merintah semua bansa ngena sebatang besi. Tang anak iya dirampas lalu dibai ngagai Allah Taala enggau ngagai kerusi diraja Iya.

⁶Indu nya lalu rari ngagai menua puang, ngagai siti endur ti udah disedia Allah Taala ke iya, alai iya deka ditupi dalam pengelama seribu dua ratus enam puluh hari.

⁷ Perang lalu nyadi di serega. Mikael enggau bala melikat iya beperang ngelaban naga nya, lalu naga nya enggau bala melikat iya beperang ngelaban Mikael enggau bala melikat iya.

⁸Tang naga enggau bala melikat iya alah, lalu sida nadai agi endur di serega.

⁹ Naga ti besai nya, iya nya ular ti tuai, ti dikumbai Antu tauka Sitan ke nipu semua dunya, lalu dibuai ari serega. Iya enggau semua bala melikat iya dibuai ke baruh ngagai dunya.

¹⁰ Aku lalu ninga nyawa ti inggar bejaku di serega, “Diatu pengelepas, kuasa enggau Perintah Allah Taala kitai, enggau kuasa Kristus Iya, udah datai, laban iya ke bedawaka bala menyadi kitai di mua Allah Taala kitai siang malam, udah dibuai ke baruh.

¹¹Lalu sida udah ngalahka iya ngena darah Anak Domba, enggau ngena jaku saksi sida, laban sida enda sayauka nyawa diri datai ke mati.

¹² Nya alai, rami gaga ati meh kita serega, enggau semua kita ke diau dia! Tang naka meh penusah tanah enggau tasik, laban Sitan udah nurun ngagai kita, balat pedis ati, laban iya nemu timpuh diri nyau deka abis.”

¹³Lebuh naga nya nemu diri udah dibuai ke baruh ngagai dunya, iya lalu begagaika indu ke udah ngadaka anak lelaki nya.

¹⁴ Tang indu nya diberi dua iti sayap menaul ti besai, ngambika iya ulih terebai lalu rari ari naga nya, ngagai menua puang, ngagai endur alai iya deka ditupi tiga taun setengah.

¹⁵Naga nya lalu nyemburka ai baka ai bah ari nyawa iya, kena iya ngagai indu nya, ngambika indu nya ditabanka ai nya.

¹⁶Tang tanah nulung indu nya. Tanah merangapka nyawa lalu nelan ai ti pansut ari nyawa naga nya.

¹⁷Naga nya pedis amat ati ngagai indu nya, lalu nyerang bala peturun iya ti bukai, iya nya semua orang ke ngasika pesan Allah Taala, sereta besaksika Jesus.

¹⁸Iya lalu bediri atas pasir ba tebing tasik.