Read Iban Pemandang 14 Bible Online

Pemandang 14 - Iban bible

Pemandang 14

¹ Udah nya aku malik, lalu tepedaka Anak Domba bediri ba Bukit Sion. Lalu sama bediri enggau Iya mega 144,000 iku orang ke bisi nama Anak Domba enggau nama Apai Iya ditulis ba kening sida.

² Aku lalu ninga nyawa bejaku ari serega, munyi guru ai wung, munyi letup guntur, munyi belikan.

³Sida bepantun ngena lagu ti baru di mua kerusi diraja, di mua empat iku utai ti idup, enggau di mua bala tuai. Nadai orang ulih belajarka lagu nya, kelimpah ari sida 144,000 iku nya ti udah ditebus ari dunya.

⁴Sida nya meh orang ke nadai udah kala beleman enggau indu, laban sida udah diau tuchi. Sida nya meh orang ke nitihka Anak Domba ngagai sebarang endur Iya bejalai. Sida udah ditebus ari semua bansa mensia nyadi orang ke terubah-rubah iya diserahka ngagai Allah Taala enggau ngagai Anak Domba,

⁵ lalu sida nadai kala bula. Sida nadai penyalah.

⁶Udah nya aku tepedaka siku agi melikat terebai ba tengan langit, mai Berita Manah ti meruan belama iya ti deka ditusui ngagai orang ke diau di dunya, ngagai semua bansa, raban bansa, jaku enggau menua.

⁷Ku iya bejaku enggau nyawa ti inggar, “Nangika Allah Taala, lalu pujika mulia Iya, laban maya udah datai alai Iya deka ngakim. Sembah meh Iya ti udah ngaga serega, tanah, tasik enggau mata ai!”

⁸ Melikat ti kedua lalu bejaku nangkanka melikat ti keterubah, ku iya, “Udah alah! Alah meh Babilon ti besai nya ti udah mejalka semua bansa ngirup wain pengingin iya ti kamah!”

⁹Melikat ti ketiga lalu bejaku enggau nyawa ti inggar nangkanka seduai ti dulu, “Enti orang nyembah jelu enggau anak patung iya, lalu nerima kelai ba kening tauka ba jari sida,

¹⁰ orang nya deka mega ngirup wain pengeringat Allah Taala, ti dituang enda ditaku ngagai mangkuk pengeringat Allah Taala, lalu orang nya deka diperinsaka ngena api enggau merirang di mua bala melikat ti kudus enggau di mua Anak Domba.

¹¹ Lalu asap ari api ti dikena merinsaka sida deka pansut ke atas belama-lama iya, lalu sida enda ulih belelak siang malam, iya nya sida ke nyembah jelu nya enggau nyembah anak patung iya, lalu nerima tanda nama iya.”

¹²Tu begunaka ati ti tan ari bala nembiak Tuhan, iya nya sida ke ngasika pesan Allah Taala, sereta tetap ati arapka Jesus.

¹³Aku lalu ninga nyawa bejaku ari serega, ku iya, “Tuliska tu: belabuh ari diatu, beberekat meh orang ke mati dalam Tuhan!” “Sigi amat beberekat,” ku Roh Allah Taala[11] nyaut, “ngambika sida belelak ari pengawa sida, laban utai ti udah dikereja sida, nitihka sida.”

¹⁴ Udah nya aku malik, lalu tepedaka siti remang ti burak, lalu duduk ba atas remang nya bisi siku orang ke baka gamal Anak Mensia. Ba pala iya bisi makota emas, lalu ba jari iya bisi siti bikung ti tajam.

¹⁵ Siku melikat pansut ari Rumah Sembiang, lalu ngangau enggau nyawa ti inggar ngagai iya ke duduk ba atas remang, “Biauka bikung nuan, lalu ngetau, laban maya ngetau udah datai, laban dunya udah mansau!”

¹⁶Iya ke duduk ba atas remang nya lalu miauka bikung iya ngagai dunya, lalu dunya diketau.

¹⁷Udah nya siku agi melikat pansut ari Rumah Sembiang di serega, lalu iya mega bisi bikung ti tajam.

¹⁸Udah nya siku agi melikat pansut ari alta. Melikat tu bekuasa atas api, lalu iya ngangau enggau nyawa ti inggar ngagai melikat ke bisi bikung ti tajam nya, ku iya, “Biauka bikung nuan, lalu ketau tangkai buah anggur dunya, laban buah anggur udah mansau!”

¹⁹Melikat nya lalu miauka bikung iya ngagai dunya, lalu ngetau buah anggur ari dunya, lalu nibarka buah anggur nya ngagai pitan pengeringat Allah Taala.

²⁰ Buah anggur nya lalu diindik ari luar nengeri. Darah lalu pansut ari pitan anggur nya lalu rarat 300 kilometer, enggau kira 2 meter penalam.