Read Iban Pemandang 17 Bible Online

Pemandang 17 - Iban bible

Pemandang 17

¹ Udah nya siku ari tujuh iku melikat ke bisi tujuh igi mangkuk nya datai, lalu bejaku ngagai aku, “Aram tua mupuk. Aku deka nunjuk ke nuan jalai indu sundal ti tebilang nya deka diukum, iya ke duduk atas mayuh bengkah sungai,

² ti udah bambai enggau bala raja dunya, ti udah mabuk bambai enggau iya.”

³ Melikat nya lalu mai aku dalam roh ngagai menua puang, lalu aku tepedaka siku indu duduk ba atas jelu ti mirah-redam, ti penuh laban nama ti mechat Allah Taala. Jelu nya bisi tujuh igi pala, enggau sepuluh iti tanduk.

⁴ Indu nya bepekayan ngena gari ti ungu enggau mirah-redam, lalu diias ngena perengka emas, batu ti berega enggau batu mutiara. Iya megai sigi mangkuk emas ti penuh laban utai ti jai sereta kamah, ti datai ari kereja iya ti bambai;

⁵lalu ba kening iya bisi dituliska siti nama ti misteri: “Babilon ti Besai, indai ke semua indu sundal, enggau ke semua utai ti jai di dunya tu.”

⁶Aku lalu meda indu nya mabuk laban darah bala nembiak Tuhan, enggau laban darah orang ke dibunuh ketegal sida udah taluk ke Jesus. Lebuh aku meda iya, aku balat alit ati.

⁷Tang ku melikat nya bejaku ngagai aku, “Nama kebuah nuan balat alit ati baka nya? Aku deka madahka ngagai nuan misteri pasal indu enggau pasal jelu ti bisi tujuh igi pala enggau sepuluh iti tanduk, ti ditepan iya.

⁸ Jelu ti dipeda nuan nya endang idup dulu menya, tang iya enda agi idup diatu. Iya baru deka niki ari lubang kebung ti dalam, lalu iya deka dirusak. Semua orang ke diau di dunya, ke apin bisi nama ditulis dalam bup pengidup kenyau ari penumbuh dunya, deka balat alit ati lebuh sida meda jelu nya, laban dulu menya iya idup, tang diatu iya enda agi idup, lalu iya deka pegari baru.

⁹Tu begunaka penemu-dalam enggau pemintar: tujuh igi pala nya tujuh igi bukit, ti alai indu nya duduk.

¹⁰Sida nya mega tujuh iku raja. Lima ari sida nya udah alah, siku agi merintah, lalu siku ti bukai apin datai, lalu lebuh iya datai ila, iya enda tau enda merintah enda lama.

¹¹Nyadi pasal jelu ti udah idup dulu menya, tang enda agi idup diatu, nya raja ti kelapan, tang iya nya siku ari sida ke tujuh iku nya, lalu iya deka dirusak.

¹² Lalu sepuluh iti tanduk ti dipeda nuan, nya sepuluh iku raja ke apin berengkah merintah, tang sida deka diberi kuasa merintah nyadi raja sejam aja, sama enggau jelu nya.

¹³Sida ke sepuluh iku nya endang seati enggau pangan diri, lalu sida meri pengering enggau kuasa sida ngagai jelu nya.

¹⁴ Sida deka beperang ngelaban Anak Domba, lalu Anak Domba deka ngalahka sida, laban Iya Tuhan ari atas semua tuhan, Raja ari atas semua raja, lalu orang ke enggau Iya endang udah dikangauka lalu dipilih sereta tetap ati.”

¹⁵Lalu ku melikat nya madah ngagai aku, “Sungai ti dipeda nuan nya, ti alai indu sundal nya duduk, nya mayuh bengkah menua, mensia, bansa, enggau jaku.

¹⁶Lalu sepuluh iti tanduk ti dipeda nuan nya, enggau jelu nya, deka begedika indu sundal nya. Sida deka ngerampas semua utai iya, lalu nelanjaika iya, lalu makai isi iya, lalu nunu iya,

¹⁷laban Allah Taala udah ngasuh sida raja nya seati ngereja juluk ati Iya, lalu berunding deka nyerahka kuasa diraja sida ngagai jelu nya, nyentuk ngagai maya jaku Allah Taala dikamatka.

¹⁸Indu ke dipeda nuan nya, nya meh nengeri ti besai ti merintah bala raja di dunya tu.”