Read Iban Pemandang 19 Bible Online

Pemandang 19 - Iban bible

Pemandang 19

¹Udah nya aku lalu ninga utai ti munyi nyawa bala mayuh di serega. Ku sida, “Aliluya! Pengelepas, mulia enggau kuasa endang enggi Allah Taala kitai,

² laban Iya ngakim ngena pemendar enggau pengelurus! Iya udah ngukum indu sundal nya ti udah ngamahka dunya ngena pengawa iya ti bambai, lalu Allah Taala udah malas iya laban iya udah munuh bala nembiak Allah Taala.”

³ Sida lalu manjung baru, “Aliluya! Asap ari api ti nganguska nengeri ti besai nya deka niki ke atas belama-lama iya!”

⁴Bala tuai ti dua puluh empat iku nya, enggau empat iku utai ti idup lalu nyungkurka diri nyembah Allah Taala, ke duduk ba kerusi diraja nya. Ku sida, “Amin! Aliluya!”

⁵ Lalu ari kerusi diraja nya pansut munyi siti nyawa. Ku iya, “Beri puji ngagai Allah Taala, semua kita ke nembiak Iya, kita ke nangika Iya, ke besai enggau ke mit.”

⁶ Udah nya aku lalu ninga utai ti munyi nyawa bala mayuh, munyi guru ai wung, enggau munyi letup guntur. Ku sida, “Aliluya! Laban Tuhan kitai, Allah Taala ti Pemadu Bekuasa, endang merintah.

⁷ Aram kitai rami gaga ati sereta lantang ngemesaika nama Iya, Laban gawai tikah Anak Domba udah datai lalu tunang Iya udah nyendiaka diri.

⁸Tunang Iya udah diberi kain linin ti tuchi ti beperenching nyadika pekayan iya.” (Kain linin nya pengawa ti lurus ti dikereja bala nembiak Tuhan.)

⁹ Melikat nya lalu bejaku ngagai aku, “Tuliska tu: Beberekat meh orang ke udah diambi ngabang ngagai gawai tikah Anak Domba.” Lalu ku iya bejaku ngagai aku, “Tu jaku ti bendar ari Allah Taala.”

¹⁰Aku lalu nyungkurka diri di kaki iya, deka nyembah iya, tang ku iya bejaku ngagai aku, “Anang nyembah aku! Aku tu pen ulun baka nuan, baka semua orang bukai ke arapka pemendar ti dipandangka Jesus. Sembah Allah Taala!” Laban pemendar ti dipandangka Jesus nya roh ti benabi.

¹¹ Udah nya aku meda serega tebuka. Siku kuda ti burak lalu pegari. Orang ke nepan iya nya benama Tetap Ati Sereta Bendar. Iya ngakim tauka beperang ngena pengelurus.

¹² Mata Iya baka daun api, lalu ba pala Iya mayuh bengkah makota. Lalu Iya bisi nama ti ditulis ba Iya, ti enda ditemu orang, tang semina ditemu Iya Empu aja.

¹³ Baju panjai Iya udah disepuhka ngagai darah. Nama Iya “Jaku Allah Taala.”

¹⁴Lalu bala soldadu serega, ke bepekayan ngena kain linin ti burak sereta tuchi, nitihka Iya, nepan kuda ti burak.

¹⁵ Ari nyawa Iya pansut siti pedang ti tajam, ti dikena Iya ngalahka semua bansa, lalu Iya deka merintah sida ngena sebatang besi. Iya deka ngindik buah anggur dalam pitan pengeringat Allah Taala ti pemadu Bekuasa.

¹⁶ Ba baju panjai Iya enggau ba pah Iya bisi dituliska nama tu, “Raja ke semua raja, enggau Tuhan ke semua tuhan.”

¹⁷ Udah nya aku tepedaka siku melikat bediri atas[16] mata hari. Iya ngangau enggau nyawa ti inggar ngagai semua burung ti terebai ba tengan langit, “Datai lalu begempuru ngagai pengerami makai besai Allah Taala.

¹⁸Datai meh kita lalu empa meh isi bala raja, isi bala tuai soldadu, isi bala orang ke bekuasa, isi kuda enggau isi orang ke nepan kuda, enggau isi semua mensia ti ulun enggau ti ukai ulun, ke besai enggau ke mit!”

¹⁹Udah nya aku tepedaka jelu nya enggau bala raja dunya, enggau bala soldadu sida begempuru deka beperang ngelaban Iya ke nepan kuda nya, enggau ngelaban bala soldadu Iya.

²⁰ Jelu nya lalu ditangkap, sama enggau nabi ti pelesu nya, ti udah ngereja kereja ajih di mua jelu nya kena iya nipu orang ke bisi kelai jelu nya, enggau orang ke udah nyembah anak patung jelu nya. Jelu nya enggau nabi ti pelesu nya lalu dibuai idup-idup ngagai danau api ti mau laban merirang.

²¹Sida ke bukai dibunuh ngena pedang ti pansut ari nyawa Iya ke nepan kuda nya, lalu semua burung bebendar amat makai isi sida.