Read Iban Pemandang 2 Bible Online

Pemandang 2 - Iban bible

Pemandang 2

¹“Tuliska tu ngagai melikat eklisia di Epesus: ‘Tu jaku ari Iya ke megai tujuh igi bintang ba jari kanan Iya, ke bejalai ba tengah-tengah tujuh iti penuduk lampu.

²Aku nemu utai ti dikereja nuan, pemendar nuan bekereja, pasal ati nuan ti liat sereta tan. Aku nemu nuan enggai meda orang ke jai. Nuan udah nguji orang ke ngumbai diri rasul, tang ukai, lalu nuan udah nemu sida nya orang ke bula.

³Aku mega nemu nuan liat ati natka pemerinsa ketegal nama Aku, lalu nuan enda kala mantul.

⁴Tang Aku bisi jaku ngelaban nuan: nuan udah ngelengkaka pengerindu nuan ti keterubah.

⁵Nya alai kingatka penyauh nuan udah labuh. Nesal ati ke dosa nuan, lalu kereja pengawa ti terubah dikereja nuan suba. Enti nuan enda, Aku deka datai ngagai nuan, lalu enchabut penuduk lampu nuan ari endur iya, enti nuan enda nesal ati ke dosa nuan.

⁶Tang tu utai ti manah pasal nuan: nuan begedika utai ti dikereja orang Nikolaitan.[3] Aku mega begedika utai nya.

⁷ “Awakka orang ke bisi pending, ningaka jaku ti disebut Roh Allah Taala[4] ngagai eklisia! Aku deka ngemendarka orang ke menang makai buah ari kayu pengidup ti tumbuh ba Kebun Allah Taala.’

⁸ “Tuliska tu ngagai melikat eklisia di Smirna: ‘Tu jaku ari Iya ti Pun enggau Pengujung, ke udah mati lalu udah angkat idup baru.

⁹“ ‘Aku nemu penusah nuan enggau penyeranta nuan (tang nuan kaya). Aku nemu orang ke ngumbai diri orang Judah, tang ukai, ke bejai nuan. Sida nya balai gempuru Sitan.

¹⁰Anang takutka pemerinsa ti baru deka ditatka nuan. Aku madah ngagai nuan, Sitan baru deka muai sekeda bala kita ngagai rumah jil, ngambika kita diuji, lalu kita deka kena perinsa sepuluh hari. Kita enda tau enda tetap ati datai ke mati, lalu Aku deka meri kita makota pengidup.

¹¹ “Awakka orang ke bisi pending, ningaka jaku ti disebut Roh Kudus ngagai semua eklisia. Orang ke menang enda kena laban pemati ti kedua.’

¹²“Tuliska tu ngagai melikat eklisia di Pergamum: ‘Tu jaku ari Iya ke bisi pedang ti bemata dua.

¹³“ ‘Aku nemu endur alai nuan diau, iya nya ba endur alai kerusi diraja Sitan. Tang nuan bepegai teguh ba nama Aku, lalu nuan enda besangkalka pengarap nuan ke Aku. Indah lebuh maya Antipas, saksi Aku ke tetap ati, dibunuh ba tengah-tengah bala kita, ba endur alai Sitan diau, deh nuan enda besangkalka pengarap nuan ke Aku.

¹⁴ Tang Aku bisi dua tiga iti utai disebut ngelaban nuan: sekeda kita nitihka ajar Balaam, ke ngajar Balak chara nguluka orang Israel bedosa, ngambika sida makai pemakai ti diberi ngagai engkeramba, sereta ngereja ulah ti kamah.

¹⁵Sekeda kita mega nitihka ajar raban Nikolaitan.[5]

¹⁶Nya alai, nesal ati ke dosa kita. Enti kita enda, Aku deka lengkas datai ngagai kita, lalu nyerang sida ngena pedang ti pansut ari nyawa Aku.

¹⁷ Awakka orang ke bisi pending, ningaka jaku ti disebut Roh Kudus ngagai semua eklisia. Aku deka meri mana ti resia ngagai orang ke menang, lalu Aku deka meri ngagai iya sigi batu ti burak, ti udah ditulis enggau siti nama ti baru, ti enda ditemu orang reti, kelimpah ari orang ke nerima batu nya.’

¹⁸ “Tuliska tu ngagai melikat eklisia di Tiatira: ‘Tu jaku Anak Allah Taala ti bisi mata ti baka daun api, enggau kaki ti baka temaga ti udah dipugar.

¹⁹“ ‘Aku nemu utai ti dikereja nuan, pengerindu nuan, pengarap nuan, pengawa ti dikereja nuan, pasal ati nuan ti liat sereta tan. Aku nemu utai ti dikereja nuan diatu besai agi ari utai ti udah dikereja nuan terubah iya suba.

²⁰ Tang tu jaku Aku ngelaban nuan: nuan enda ngerara indu ke benama Jesebel, ke ngumbai diri nabi lalu ngajar sereta nipu bala nembiak Aku lalu mai sida ngereja ulah ti kamah, sereta makai pemakai ti diberi ngagai engkeramba.

²¹Aku udah meri iya peluang nesal ati, tang iya enggai nesal ati ke kereja iya ti kamah.

²²Nya alai Aku deka nikauka iya ngagai katil, lalu Aku deka ngasuh orang ke butang enggau Iya ditinggang penusah ti besai, enti sida enda nesal ati ke pengawa ti dikereja iya;

²³ lalu Aku deka munuh semua anak iya. Lalu semua eklisia deka nemu, Aku mansik runding enggau ati semua mensia. Lalu Aku deka meri ngagai genap iku kita nitihka utai ti udah dikereja kita.

²⁴Tang ngagai kita ke bukai di Tiatira, ke nadai udah nitihka ajar indu nya, ke nadai udah belajarka utai ti dikumbai sekeda orang ‘resia ti dalam ti datai ari Sitan,’ Aku madah ngagai kita, Aku enda nambahka pemerat tanggungjawap[6] kita;

²⁵tang kita enda tau enda bepegai teguh ba utai ti dikemisi kita, nyentuk ngagai maya Aku datai.

²⁶ Orang ke menang, ke majak ngereja pengawa Aku nyentuk ke ujung, deka diberi Aku kuasa atas semua bansa;

²⁷lalu iya deka merintah sida ngena sebatang besi, baka ke ngeredakka periuk tanah, baka Aku ke udah nerima kuasa ari Apai;

²⁸Lalu Aku deka meri ngagai iya bintang pagi.

²⁹Awakka orang ke bisi pending, ningaka jaku ti disebut Roh Kudus ngagai semua eklisia.’