Read Iban Pemandang 20 Bible Online

Pemandang 20 - Iban bible

Pemandang 20

¹Udah nya aku tepedaka siku melikat nurun ari serega, megai kunchi lubang kebung ti nadai buntut nya, enggau siti rantai ti besai.

² Iya lalu nangkap naga nya, iya nya ular ti tuai nya, iya nya Antu tauka Sitan, lalu nanchang iya seribu taun.

³Melikat nya lalu nikauka iya ngagai lubang kebung nya, ngunchi pintu lubang kebung nya, lalu nanggam pintu nya, ngambika iya enda agi nipu mensia, datai ke pengujung seribu taun nya. Udah nya iya enda tau enda dilepaska enda lama.

⁴ Udah nya aku tepedaka mayuh kerusi diraja, lalu duduk ba kerusi diraja nya bala orang ke udah diberi kuasa ngakim. Aku mega tepedaka semengat orang ke udah dipumpung pala ketegal sida udah besaksika pasal Jesus, sereta udah madahka jaku Allah Taala, orang ke nadai udah nyembah jelu nya tauka nyembah anak patung iya, sereta nadai udah nerima kelai jelu nya ba kening tauka ba jari sida. Sida angkat idup baru lalu merintah enggau Kristus seribu taun.

⁵Orang bukai ke udah mati, enda angkat idup baru, datai ke seribu taun nya udah abis. Tu pengangkat ari mati ti keterubah.

⁶Beberekat sereta kudus meh orang ke diangkatka ari mati ti keterubah tu! Pemati ti kedua nadai kuasa atas sida, tang sida deka nyadi imam Allah Taala, enggau imam Kristus, lalu sida deka merintah enggau Iya seribu taun.

⁷Ba pengujung seribu taun nya, Sitan deka dilepaska ari rumah jil iya,

⁸ lalu iya deka pansut lalu nipu semua bansa ba empat iti sukut dunya, iya nya, Gok enggau Magok, ngempuru lalu nyendiaka sida beperang. Pemayuh sida nya nyau ngemayuh igi pasir ti ba tebing tasik.

⁹ Sida lalu bejalai ngagai semua endur di serata dunya, lalu ngelulung kem bala nembiak Tuhan, enggau nengeri ti dikerinduka Allah Taala. Tang api nurun ari serega, lalu ngerusak sida.

¹⁰Sitan ti udah nipu sida lalu ditikauka ngagai danau api enggau merirang, alai jelu enggau nabi ti pelesu nya udah dibuai, lalu sida deka diperinsaka siang malam belama-lama iya.

¹¹ Udah nya aku tepedaka siti kerusi diraja ti besai sereta burak, enggau siku orang ke duduk ba kerusi diraja nya. Dunya enggau langit rari ari Iya, lalu nadai ditemu agi.

¹² Aku lalu tepedaka orang ke udah mati, ke besai enggau ke mit, bediri di mua kerusi diraja nya, lalu mayuh bengkah bup dibuka. Siti agi bup dibuka, iya nya bup pengidup. Lalu orang ke udah mati diakim nitihka utai ti udah dikereja sida, munyi ti ditulis dalam bup nya.

¹³Tasik lalu nyerahka orang ke mati dalam iya. Pemati enggau Dunya pemati nyerahka orang ke mati dalam seduai iya, lalu semua orang nya diakim nitihka utai ti udah dikereja sida.

¹⁴Udah nya Pemati enggau Dunya pemati dibuai ngagai danau api. Danau api nya pemati ti kedua.

¹⁵ Orang ke nadai nama ditulis dalam bup pengidup, dibuai ngagai danau api nya.