Read Iban Pemandang 21 Bible Online

Pemandang 21 - Iban bible

Pemandang 21

¹ Udah nya aku tepedaka langit ti baru enggau dunya ti baru; laban langit ti dulu enggau dunya ti dulu udah lesap, lalu tasik nadai agi.

² Aku lalu tepedaka nengeri ti kudus, iya nya Jerusalem ti baru, nurun ari serega, ari Allah Taala, dikemas baka indu ke deka ditikah enggau laki iya;

³ aku lalu ninga nyawa ti inggar bejaku ari kerusi diraja nya, “Diatu Allah Taala deka diau enggau nembiak Iya! Iya deka diau enggau sida, lalu sida deka nyadika nembiak Iya, lalu Allah Taala Empu deka begulai enggau sida, lalu nyadi Allah Taala sida.

⁴ Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”

⁵ Udah nya Iya ke duduk ba kerusi diraja bejaku, “Peda nuan, diatu Aku ngaga semua utai nyadi baru magang!” Iya mega bejaku ngagai aku, “Tuliska tu, laban leka jaku tu bendar sereta tau dikarapka.”

⁶ Lalu ku Iya bejaku ngagai aku, “Udah tembu! Aku tu Pun enggau Pengujung.[17] Ngagai orang ke aus, Aku deka meri sida ai ari mata ai pengidup nyadika pemeri.

⁷ Orang ke menang deka nerima pesaka tu ari Aku, lalu Aku deka nyadi Allah Taala sida, lalu sida deka nyadi anak Aku.

⁸ Tang orang ke penakut, ke aum juak, ke ngereja penyai, ke pemunuh, ke bambai, ke bemanang, ke nyembah engkeramba, enggau semua orang ke bula, endur alai sida nya danau api enggau merirang. Nya pemati ti kedua.”

⁹Siku ari tujuh iku melikat nya, ke bisi tujuh igi mangkuk ti penuh laban tujuh bengkah penusah besai ti penudi, datai lalu bejaku ngagai aku, “Datai kitu, laban aku deka nunjuk ke nuan Tunang, iya nya bini Anak Domba.”

¹⁰ Melikat nya lalu mai aku dalam roh ngagai tuchung bukit sigi ti besai sereta tinggi, lalu mandangka ngagai aku nengeri Jerusalem ti kudus, ti nurun ari serega, ari Allah Taala,

¹¹ti beperenching laban mulia Allah Taala, beperenching baka batu ti berega, baka batu asija, chiru baka batu kristal.

¹² Nengeri nya bisi dinding kuta ti besai sereta tinggi, enggau dua belas iti pintu, lalu ba genap iti pintu nya bisi siku melikat, lalu ba semua pintu kuta nya bisi dituliska nama dua belas raban bansa orang Israel;

¹³tiga iti pintu ba dinding kuta ti muak ke timur, tiga muak ke utara, tiga muak ke selatan, lalu tiga muak ke barat.

¹⁴Lalu dinding kuta nengeri nya didirika ba atas dua belas igi batu pemun, lalu ba dua belas igi batu pemun nya bisi dituliska nama dua belas iku rasul Anak Domba.

¹⁵ Melikat ke bejaku ngagai aku bisi sebatang penyukat ti digaga ari emas, kena nyukat nengeri, pintu, enggau dinding kuta nengeri nya.

¹⁶Nengeri nya besegi empat. Buka iya sebaka enggau pemanjai iya. Melikat nya nyukat nengeri nya ngena penyukat nya. Pemanjai iya, buka iya sebaka enggau peninggi iya, iya nya dua ribu empat ratus kilometer.[18]

¹⁷Melikat nya mega nyukat dinding nengeri nya, lalu penebal iya enam puluh meter,[19] nitihka penyukat mensia ti dikena iya.

¹⁸Dinding nya digaga ari batu asija, lalu nengeri nya empu digaga ari emas ti tulin, ti senayau baka gelas.

¹⁹ Batu pemun ke dinding nengeri nya dilagu ngena semua macham batu ti berega. Batu pemun ti keterubah nya batu asija, iya ti kedua batu nilam, ti ketiga batu sejabu, ti keempat batu samerut,

²⁰ti kelima batu unam, ti keenam batu akek mirah, ti ketujuh batu ratna chempaka, ti kelapan batu pirus, ti kesemilan batu jakut kuning, ti kesepuluh batu akek gadung, ti kesebelas batu kuning, ti kedua belas batu kechubung.

²¹Lalu pintu ti dua belas iti nya digaga ari dua belas igi batu mutiara, siti-siti pintu digaga ari sigi batu mutiara, lalu jalai raya di nengeri nya digaga ari emas ti tulin, ti senayau baka gelas.

²²Aku nadai meda Rumah Sembiang dalam nengeri nya, laban Tuhan Allah Taala ti Pemadu Bekuasa Empu enggau Anak Domba nyadika Rumah Sembiang dalam nengeri nya.

²³ Lalu nengeri nya enda begunaka mata hari tauka bulan manchar ngagai iya, laban mulia Allah Taala manchar ngagai iya, lalu Anak Domba nyadika lampu iya.

²⁴ Semua bansa deka bejalai dalam penampak nya, lalu bala raja dunya deka mai mulia sida ngagai nengeri nya,

²⁵ lalu pintu nengeri nya deka tebuka belama, laban dia nadai malam.

²⁶Orang deka mai ngagai nengeri nya semua mulia enggau pengaya ari semua bansa.

²⁷ Tang nadai utai ti enda tuchi, tauka orang ke ngereja penyai, tauka orang ke bula, tau tama ngagai nengeri nya, tang semina orang ke bisi nama ditulis dalam bup pengidup Anak Domba.