Read Iban Pemandang 3 Bible Online

Pemandang 3 - Iban bible

Pemandang 3

¹“Tuliska tu ngagai melikat eklisia di Sardis: ‘Tu jaku Iya ke bisi tujuh iku Roh Allah Taala, enggau tujuh igi bintang. Aku nemu utai ti dikereja nuan. Orang ngumbai nuan idup, tang nuan mati!

²Dani lalu keringka teda utai ti agi dikemisi nuan, ti nyau deka mati, laban Aku nadai udah kala nemu pengawa nuan pemadu menyana di mua Allah Taala Aku.

³ Nya alai, kingatka utai ti udah diterima enggau didinga nuan. Nuan enda tau enda ngasika semua utai nya, lalu nesal ati ke dosa nuan. Enti nuan enda dani, Aku deka datai baka penchuri, lalu nuan enda nemu maya Aku deka datai ngagai nuan.

⁴Tang nuan agi bisi dua tiga iku orang di Sardis, ke nadai udah ngamahka gari diri. Sida deka bejalai enggau Aku ngena pekayan ti burak, laban sida endang patut.

⁵ Orang ke menang deka ngena gari ti burak baka nya, lalu Aku enda muai nama sida ari bup pengidup. Aku deka ngaku sida endang enggi Aku di mua Apai Aku enggau di mua bala melikat Iya.

⁶Awakka orang ke bisi pending, ningaka jaku ti disebut Roh Allah Taala[7] ngagai semua eklisia!’

⁷ “Tuliska tu ngagai melikat eklisia di Piladelpia: ‘Tu jaku ari Iya ti kudus sereta bendar, ke bisi kunchi David, ke muka pintu lalu nadai orang ulih nikupka pintu nya, ke nikupka pintu, lalu nadai orang ulih nukangka pintu nya.

⁸“ ‘Aku nemu utai ti dikereja nuan. Peda nuan, Aku udah ngengkahka di mua nuan siti pintu ti tetukang, ti enda ulih ditikupka orang. Aku nemu nuan endang enda kering, tang taja pia, nuan udah nitihka ajar Aku, lalu enda besangkalka nama Aku.

⁹ Aku deka ngasuh balai gempuru Sitan, ke ngumbai diri orang Judah, tang ukai, sereta bula---Aku deka ngasuh sida datai lalu meremi di kaki nuan, lalu sida deka nemu Aku udah rinduka nuan.

¹⁰Laban nuan udah nitihka pesan Aku ti ngasuh nuan liat ati sereta tan, Aku deka ngintu nuan likun lebuh maya penusah ti deka ninggang dunya, lebuh semua mensia ke diau di dunya tu diuji.

¹¹Aku deka datai enda lama da agi. Pegai teguh utai ti dikemisi nuan, ngambika nadai orang ulih ngerampas makota nuan.

¹² Orang ke menang deka digaga Aku nyadi tiang ti besai dalam Rumah Sembiang Allah Taala Aku, lalu iya deka diau dia belama-lama iya, lalu Aku deka nuliska nama Allah Taala Aku ba iya, enggau nama nengeri Allah Taala Aku, iya nya Jerusalem ti baru, ti nurun ari Allah Taala, ti pansut ari serega, enggau nama Aku Empu ti baru.

¹³Awakka orang ke bisi pending, ningaka jaku ti disebut Roh Kudus ngagai semua eklisia!’

¹⁴ “Tuliska tu ngagai melikat eklisia di Laudisia: ‘Tu jaku Iya ke benama Amin, ke tetap ati, Saksi ti bendar, ti pun semua utai ti udah digaga Allah Taala.

¹⁵“ ‘Aku nemu utai ti dikereja nuan. Nuan enda chelap enda angat. Naka meh pemanah enti nuan tak angat, tauka chelap!

¹⁶Nya alai, laban nuan semina nyilu kuku aja, enda angat enda chelap, Aku deka nyemburka nuan ari nyawa Aku!

¹⁷ Laban nuan nyebut, “Aku kaya, bisi semua utai, lalu nadai suntuk utai,” tang nuan enda nemu diri merinsa, tusah, seranta, buta sereta telanjai.

¹⁸Nya alai, Aku ngajar nuan meli emas ari Aku, emas ti udah dituchi ngena api, ngambika nuan nyadi kaya, lalu meli gari ti burak kena nuan mungkur tubuh nuan ti telanjai, sereta meli minyak kena nuan ngunsut mata nuan, ngambika nuan ulih meda.

¹⁹ Aku nganu sereta disiplin semua orang ke dikerinduka Aku. Nya alai, diau menyana, lalu nesal ati ke dosa nuan.

²⁰Dinga nuan, Aku bediri di mua pintu lalu nekung.[8] Enti orang ninga nyawa Aku lalu muka pintu, Aku deka tama lalu makai enggau iya, lalu iya deka makai enggau Aku.

²¹Orang ke menang deka dibai Aku duduk enggau Aku ba kerusi diraja Aku, baka Aku ke udah menang lalu duduk enggau Apai Aku ba kerusi diraja Iya.

²²Awakka orang ke bisi pending, ningaka jaku ti disebut Roh Kudus ngagai semua eklisia!’ ”