Read Iban Pemandang 4 Bible Online

Pemandang 4 - Iban bible

Pemandang 4

¹ Udah nya aku malik, lalu tepedaka siti pintu tebuka di serega. Nyawa ti terubah bejaku munyi terumpit lalu bejaku ngagai aku, “Niki ke atas kitu. Aku deka nunjuk ke nuan utai ti enda tau enda nyadi udah lepas tu.”

² Tekala nya Roh Kudus lalu bekuasa ba aku, lalu aku tepedaka siti kerusi diraja di serega, enggau siku orang duduk ba kerusi diraja nya!

³Orang ke duduk ba kerusi diraja nya baka batu asija enggau batu akek mirah, lalu ngelingi kerusi diraja nya bisi anakraja ti bechura baka batu samerut.

⁴Ngelingi kerusi diraja nya bisi dua puluh empat iti kerusi diraja ti bukai, lalu duduk ba kerusi diraja nya bisi dua puluh empat iku tuai, ke ngena gari burak, enggau makota emas ba pala sida.

⁵ Ari kerusi diraja nya pansut kilat, enggau munyi guru enggau letup guntur, lalu di mua kerusi diraja nya bisi tujuh iti sempun ti mau, iya nya tujuh iku roh Allah Taala.

⁶ Lalu di mua kerusi diraja nya bisi siti utai ti baka tasik ti digaga ari cheremin, ti baka batu kristal. Lalu ngelingi kerusi diraja nya, ari sepiak-sepiak, bisi empat iku utai ti idup, ti penuh laban mata ari mua enggau ari belakang.

⁷ Iya ti keterubah nya baka gamal singa. Iya ti kedua, baka gamal sapi. Iya ti ketiga baka mua mensia, lalu iya ti keempat baka menaul ti terebai.

⁸ Lalu genap iku utai ti idup nya bisi enam iti sayap, lalu genap iku sida penuh laban mata di dalam enggau di luar, lalu sida belagu siang malam, ku sida: “Kudus, kudus, kudus meh Tuhan Allah Taala ti Pemadu Bekuasa, ti udah bisi, ti bisi diatu enggau ti deka datai.”

⁹ Lalu genap kali empat iku utai ti idup nya belagu ngemuliaka sereta meri basa enggau terima kasih ngagai Iya ke duduk ba kerusi diraja nya, ke idup belama-lama iya.

¹⁰Bala tuai ke dua puluh empat iku nya lalu nyungkurka diri di mua Iya ke duduk ba kerusi diraja nya, lalu nyembah Iya ke idup belama-lama iya. Sida ngengkahka makota sida di mua kerusi diraja nya, lalu belagu,

¹¹“O Tuhan Allah Taala kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.”