Read Iban Pemandang 6 Bible Online

Pemandang 6 - Iban bible

Pemandang 6

¹Aku lalu tepedaka Anak Domba muka siti ari tujuh iti chop tambit nya, lalu ninga siku utai ti idup nya ngangau ngena nyawa ti meletup munyi guntur, “Datai kitu!”

² Aku malik, lalu tepedaka siku kuda ti burak. Orang ke nepan kuda nya bisi siti panah, lalu iya diberi siti makota, lalu iya pansut ari serega ngagai dunya, iya ke menang ke ingin deka menang suah agi.

³Lebuh Anak Domba nya muka chop tambit ti kedua, aku lalu ninga utai ti idup ti kedua nya bejaku, “Datai kitu!”

⁴ Siku kuda ti bechura mirah lalu pansut. Orang ke nepan iya udah diberi kuasa muai pemaik ari dunya, ngambika orang bebunuhka pangan diri. Lalu iya diberi siti pedang ti besai.

⁵ Lebuh Anak Domba nya muka chop tambit ti ketiga, aku lalu ninga utai ti idup ti ketiga bejaku, “Datai kitu!” Aku lalu tepedaka siku kuda ti chelum. Orang ke nepan kuda nya megai siti dachin.

⁶ Aku lalu ninga utai ti munyi nyawa mensia ba tengah-tengah empat iku utai ti idup nya bejaku, “Satu kilogram gandum ke gaji sehari, enggau 3 kilogram barli ke gaji sehari. Tang anang ngerusak minyak kana enggau wain!”

⁷Lebuh Anak Domba nya muka chop tambit ti keempat, aku lalu ninga utai ti idup ti keempat bejaku, “Datai kitu!”

⁸ Aku malik, lalu tepedaka siku kuda ti bechura pudar. Orang ke nepan kuda nya benama Pemati, dititihka Dunya Pemati.[10] Seduai iya diberi kuasa merintah sebagi ari empat bagi dunya, ngambika seduai iya munuh mensia ngena pedang, ngena lapar pungkang, ngena penyakit, enggau ngena jelu babas.

⁹Lebuh Anak Domba muka chop tambit ti kelima, aku lalu tepedaka di baruh alta, semengat orang ke udah dibunuh ketegal sida udah madahka jaku Allah Taala, lalu udah besaksika pasal Iya.

¹⁰ Sida ngangau enggau nyawa ti inggar, “O Tuhan ti Pemadu Bekuasa, ti kudus sereta bendar! Ni pengelama baru Nuan deka ngakim lalu ngukum orang ke diau di dunya tu ke udah munuh kami?”

¹¹ Udah nya genap iku sida lalu diberi baju panjai ti burak, lalu sida diasuh belelak lama agi, datai ke semua orang ke udah nyadi ulun Kristus baka sida empu, enggau sida ke arap, udah dibunuh magang baka sida empu, kena ngenyukupka pemayuh sida.

¹² Lebuh Anak Domba muka chop tambit ti keenam, aku malik lalu aku meda tanah balat amat berenyang, mata hari bebali chelum baka kain guni ti chelum, bulan bebali mirah baka darah,

¹³ lalu bintang labuh ari langit ngagai dunya, baka buah ara ti apin mansau ti digusak kabut.

¹⁴ Langit lesap baka surat ti digulung, lalu semua bukit enggau pulau dipindahka ari endur sida.

¹⁵ Udah nya bala raja dunya, bala pemerintah enggau bala tuai soldadu, orang ke kaya enggau ke bekuasa, enggau semua orang bukai, ti ulun enggau ti ukai ulun, lalu belalai dalam lubang gua, enggau ba selikap batu ba sebelah bukit.

¹⁶ Sida ngangauka bukit, enggau ngangauka batu, “Tinggang kami lalu lalaika kami ari Iya ke duduk ba kerusi diraja, enggau ari pengeringat Anak Domba;

¹⁷ laban hari pengeringat udah datai. Sapa ulih tan laban nya?”