Read Iban Pemandang 7 Bible Online

Pemandang 7 - Iban bible

Pemandang 7

¹ Udah nya aku lalu tepedaka empat iku melikat bediri ba empat iti sukut dunya, nagang empat bengkah ribut muput ngagai tanah tauka ngagai tasik, tauka ngagai kayu.

²Udah nya aku lalu tepedaka siku agi melikat niki ari timur mai chop tambit Allah Taala ti idup. Iya lalu ngangau enggau nyawa ti inggar ngagai empat iku melikat ke udah diberi kuasa ngerusak tanah enggau tasik.

³ Ku iya, “Anang ngerusak tanah, tasik, tauka kayu, sebedau kitai ngechop kening bala ulun Allah Taala.”

⁴Aku lalu ninga pemayuh tubuh sida ke deka dichop: 144,000 iku, ari semua raban bansa orang Israel,

⁵dua belas ribu iku ari siti-siti raban bansa, iya nya ari raban bansa Judah, Reuben, Gat, Aser, Naptali, Manasi, Simeon, Lewi, Isakar, Sebulun, Josep enggau Benjamin.

⁹ Udah nya aku malik, lalu tepedaka mayuh amat orang, datai ke sida nyau enda ulih diitung. Sida nya datai ari genap bengkah bansa, ari semua raban bansa, menua, enggau jaku, lalu sida bediri di mua kerusi diraja enggau di mua Anak Domba. Sida ngena baju panjai ti burak, lalu sida megai dan engkerema ba jari sida,

¹⁰lalu sida ngangau enggau nyawa ti inggar, “Pengelepas endang datai ari Allah Taala kitai ke duduk ba kerusi diraja, enggau ari Anak Domba!”

¹¹Semua melikat lalu bediri ngelingi kerusi diraja nya, enggau ngelingi bala tuai enggau ngelingi empat iku utai ti idup, lalu sida nyungkurka diri di mua kerusi ti diraja nya, lalu nyembah Allah Taala.

¹²Ku sida, “Amin! Beri meh puji, mulia, penemu-dalam, terima kasih, basa, kuasa enggau pengering ngagai Allah Taala kitai belama-lama iya! Amin!”

¹³Siku ari bala tuai lalu nanya aku, “Sapa bala orang nya ke ngena baju panjai ti burak, lalu ari ni penatai sida?”

¹⁴ Ku aku bejaku ngagai iya, “Tuan, nuan nemu.” Lalu ku iya bejaku ngagai aku, “Tu meh bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba.

¹⁵Nya kebuah sida bediri di mua kerusi diraja Allah Taala lalu nyembah Iya siang malam dalam Rumah Sembiang Iya; Lalu Iya ke duduk ba kerusi diraja nya deka nyaga sida.

¹⁶ Sida enda agi lapar tauka aus, lalu mata hari enggau pengangat mata hari nadai agi manchar ngagai sida,

¹⁷ laban Anak Domba, ke ba tengah-tengah kerusi diraja nya deka nyadi Pengibun sida, lalu Iya deka ngiring sida ngagai mata ai ti idup. Lalu Allah Taala deka ngendas semua ai mata ari mata sida.”