Read Iban Pemandang 8 Bible Online

Pemandang 8 - Iban bible

Pemandang 8

¹Lebuh Anak Domba muka chop tambit ti ketujuh, semua utai di serega lalu enda engkeretik kira setengah jam.

²Udah nya aku lalu tepedaka melikat tujuh iku nya bediri di mua Allah Taala, lalu diberi tujuh iti terumpit.

³ Siku agi melikat datai, lalu bediri ngimbai alta, mai sarang menyan ti digaga ari emas. Iya lalu diberi mayuh amat menyan, enggau sampi semua nembiak Tuhan ba alta emas ti di mua kerusi diraja nya.

⁴Asap ari menyan nya lalu niki sama enggau sampi bala nembiak Tuhan, ari jari melikat ke bediri di mua Allah Taala.

⁵ Udah nya melikat nya ngambi sarang menyan nya, ngisi sarang menyan nya enggau bara api ari alta, lalu nikauka sarang menyan nya ngagai dunya. Guntur meletup lalu beguru, kilat nyelar lalu tanah berenyang.

⁶ Tujuh iku melikat ke bisi tujuh iti terumpit, lalu sedia deka nyepu terumpit sida.

⁷ Melikat ti keterubah lalu nyepu terumpit iya. Ujan batu enggau api, bechampur enggau darah lalu labuh ninggang dunya. Sebagi ari tiga bagi dunya lalu angus. Sebagi ari tiga bagi kayu, enggau semua rumput angus.

⁸ Udah nya melikat ti kedua nyepu terumpit iya. Utai ti baka bukit ti besai, ti mau laban api, lalu ditikauka ngagai tasik.

⁹Sebagi ari tiga bagi tasik lalu bebali nyadi darah. Lalu sebagi ari tiga bagi utai ti idup dalam tasik mati; sebagi ari tiga bagi ari semua kapal rusak.

¹⁰ Melikat ti ketiga lalu nyepu terumpit iya. Sigi bintang ti besai, ti mau baka sempun, labuh ari langit, lalu ninggang sebagi ari tiga bagi sungai, enggau mata ai.

¹¹ Nama bintang nya “Pait.” Sebagi ari tiga bagi ai lalu bebali pait, lalu mayuh orang mati laban ai nya, laban ai nya udah nyadi pait.

¹² Melikat ti keempat lalu nyepu terumpit iya. Sebagi ari tiga bagi mata hari, sebagi ari tiga bagi bulan, enggau sebagi ari tiga bagi bintang lalu lenyau sebagi ari tiga bagi penampak sida. Ketegal nya sebagi ari tiga bagi penampak siang hari lenyau, lalu baka nya mega penampak malam hari.

¹³Udah nya aku malik, lalu aku ninga munyi siku menaul ti terebai ba tengan langit bejaku enggau nyawa ti inggar, “Tulah! Tulah! Tulah meh orang ke diau di dunya, lebuh terumpit ti bukai nya disepu melikat tiga iku nya!”