Read Iban Pemandang 9 Bible Online

Pemandang 9 - Iban bible

Pemandang 9

¹Melikat ti kelima lalu nyepu terumpit iya. Aku lalu tepedaka sigi bintang ti udah labuh ari langit ngagai dunya. Bintang nya lalu diberi siti kunchi kena muka lubang kebung ti nadai buntut.

² Bintang nya lalu muka lubang kebung nya. Asap lalu pansut ari lubang kebung nya, baka asap ti pansut ari serumbung api ti besai. Mata hari enggau angin lalu petang laban asap ti pansut ari lubang kebung nya.

³ Bala buntak lalu pansut ari asap nya lalu nurun ngagai dunya. Sida diberi kuasa baka kuasa kala.

⁴ Sida ditagang ngemediska rumput tauka kayu, tauka utai bukai ti tumbuh, tang semina ngemediska orang ke nadai chop Allah Taala ba kening sida.

⁵Buntak nya tau merinsaka sida lima bulan, tang enda tau munuh sida. Pedis amat sida diperinsa, asai ti disengat kala.

⁶ Dalam kandang lima bulan nya, sida deka ngiga pemati, tang enda tetemuka pemati. Sida ingin deka mati, tang pemati deka rari ari sida.

⁷ Buntak nya baka gamal kuda ti udah disediaka kena beperang. Ba pala sida bisi utai ti baka makota ti digaga ari emas, lalu mua sida baka mua mensia.

⁸ Buk sida baka buk indu, lalu ngeli sida baka ngeli singa.

⁹ Sida bisi tisik ti baka terabai dada, lalu sayap sida engkebap munyi kerita perang ti laju mansang beperang.

¹⁰Iku sida baka iku kala, lalu sida bisi perengka kena nyengat, lalu kuasa ti dikena sida ngemediska mensia dalam kandang lima bulan nya, bisi ba iku sida.

¹¹Sida bisi siku raja, iya nya melikat ke bekuasa atas lubang kebung ti nadai buntut nya. Dalam Hebrew nama melikat nya Abadon. Dalam jaku Gerika, nama iya Apolion (reti nya “Pengerusak”).

¹²Penusah ti keterubah udah lepas. Dua bengkah agi penusah deka datai.

¹³ Udah nya melikat ti keenam lalu nyepu terumpit iya, lalu aku ninga munyi siti nyawa datai ari empat iti sukut alta emas ti di mua Allah Taala,

¹⁴bejaku ngagai melikat ti keenam, “Lepaska empat iku melikat ke ditanchang ba Sungai Eupratis ti besai!”

¹⁵Melikat ti empat iku nya lalu dilepaska. Sida endang udah disediaka ngambika ba jam, hari, bulan enggau taun nya, sida munuh sebagi ari tiga bagi mensia.

¹⁶Pemayuh soldadu ke nepan kuda: dua ratus juta. Aku bisi ninga pemayuh bala sida.

¹⁷ Baka tu ku gaya bala kuda ti dipeda aku dalam genera nya: bala orang ke nepan kuda nya bisi terabai dada ti mirah baka api, biru baka batu nilam, kuning baka merirang, lalu pala bala kuda nya baka pala singa, lalu ari nyawa bala kuda nya pansut api, asap enggau merirang.

¹⁸Sebagi ari tiga bagi mensia mati laban tiga bengkah penusah ti besai nya, iya nya api, asap, enggau merirang ti pansut ari nyawa bala kuda nya,

¹⁹laban kuasa kuda nya dalam nyawa sida, enggau ba iku sida. Iku sida baka ular, lalu bisi pala kena sida ngemakalka orang.

²⁰ Mensia ti bukai, ke enda mati laban penusah ti besai nya, enggai nesal ati ke pengawa sida ke begagaka engkeramba, lalu enggai badu besembahka antu enggau engkeramba ti digaga ari emas, pirak, temaga, batu enggau ari kayu, ti enda ulih meda, tauka ninga, tauka bejalai.

²¹Sida mega enggai nesal ati ke diri ke udah munuh orang, udah bedukun, udah ngereja pengawa ti kamah, udah ngenchuri.