Read Iban Rut 1 Bible Online

Rut 1 - Iban bible

Rut 1

¹Dulu kelia, lebuh orang Israel apin bisi raja, lapar pungkang nyadi di menua nya. Nya alai siku lelaki ke benama Elimelek, ke datai ari raban peturun Eprat, ti diau di Betlehem di menua Judah, mansang enggau bini iya Naomi enggau anak lelaki seduai iya ke dua iku, Mahlon seduai Chilion, ngagai menua Moap deka ngentapka diri di menua nya. Lebuh sida diau di menua nya,

³Elimelek mati, lalu Naomi tinggal kediri enggau anak lelaki iya ke dua iku nya,

⁴ke jadi enggau Orpah seduai Rut, indu orang Moap. Kira sepuluh taun udah bekau nya

⁵Mahlon seduai Chilion mega mati, ninggalka Naomi kediri-diri, nadai laki, nadai anak.

⁶Nyau kelama udah bekau nya, Naomi bisi ninga pasal TUHAN ti udah merekatka bala nembiak Iya, ngasuh sida bulih asil ari utai ti ditanam sida. Nya alai iya lalu sedia deka ninggalka menua Moap sama enggau menantu indu iya ke dua iku nya.

⁷Sida tiga lalu mulaika diri ngagai menua Judah, tang lebuh sida tiga agi di rantau jalai

⁸Naomi lalu bejaku enggau seduai iya, “Manah seduai pulai ngagai rumah seduai empu, lalu diau enggau indai seduai empu. Awakka TUHAN manah enggau seduai baka seduai ti udah manah enggau aku, sereta enggau sida ke udah mati.

⁹Lalu awakka TUHAN ngasuh seduai ulih belaki lalu berumah-tangga baru.” Naomi lalu nyium seduai iya, meri selamat tinggal ngagai seduai iya. Tang seduai iya belabuh nyabak,

¹⁰lalu bejaku enggau iya, “Indai, kami duai enda pulai, laban kami duai deka mupuk enggau nuan ngagai bala nuan empu.”

¹¹Naomi lalu nyaut, “Seduai enda tau enda pulai, anak. Seduai nadai kebuah mupuk enggau aku. Kati seduai ngumbai aku ulih ngadaka anak lelaki baru ngambika bisi jadi enggau seduai?

¹²Pulai meh seduai, anak. Aku nyau kelalu tuai belaki baru. Enti sema aku agi bisi utai diadang, lalu belaki baru malam tu lalu ngadaka anak lelaki,

¹³kati seduai sanggup nganti sida mansang besai tuai? Kati seduai ulih nagang diri jadi enggau orang bukai? Ukai baka nya, anak. Utai tu balat agi ngenusahka ati aku ari ke ngenusahka ati seduai, laban jari TUHAN udah mutar ngelaban aku.

¹⁴Seduai iya lalu berengkah nyabak baru. Udah nya Orpah lalu nyium mentua indu iya, meri selamat tinggal, lalu pulai, tang Rut enggai ngelengkaka Naomi.

¹⁵Nya alai Naomi lalu bejaku enggau iya, “Rut, ipar nuan udah pulai ngagai bala iya empu, ngagai petara iya. Pulai meh nuan enggau iya.”

¹⁶Tang ku Rut nyaut, “Anang ngasuh aku ninggalka nuan! Awakka aku mupuk enggau nuan. Aku deka seruran enggau nuan di sebarang endur nuan bejalai. Dini dini endur alai nuan diau, dia meh endur alai aku diau. Bala nuan deka nyadika bala aku, lalu Allah Taala nuan deka nyadika Allah Taala aku.

¹⁷Di sebarang endur alai nuan mati, dia meh endur alai aku mati, lalu dia meh endur alai aku dikuburka. Awakka TUHAN ngukum aku, enti aku nejuka utai nyeraraka nuan ari aku, kelimpah ari pemati!”

¹⁸Lebuh Naomi meda Rut keras deka mupuk enggau iya, iya lalu badu agi bejaku.

¹⁹Seduai iya mupuk lalu datai di Betlehem. Lebuh seduai iya datai dia, semua orang di nengeri nyau richah magang, lalu ku sida ke indu bejaku, “Kati nya amat Naomi?”

²⁰Ku Naomi nyaut, “Anang ngumbai aku Naomi. Kumbai aku Marah, [1] laban Allah Taala ti Pemadu Bekuasa udah ngasuh aku merinsa idup.

²¹Lebuh aku ninggalka menua tu, aku mayuh utai, tang TUHAN udah mai aku pulai puang. Kita nadai kebuah ngumbai aku Naomi, laban TUHAN ti Pemadu Bekuasa udah ngukum aku, lalu ngasuh aku ditinggang penusah.”

²²Nya alai, nya meh chara Naomi pulai ari menua Moap sama enggau Rut, menantu indu iya ke orang Moap. Seduai iya datai di Betlehem lebuh orang baru deka berengkah ngetau barli.