Read Iban Rut 2 Bible Online

Rut 2 - Iban bible

Rut 2

¹Nyadi Naomi bisi siku kaban ke benama Boas. Boas tu orang ke kaya sereta dibasa orang. Iya datai ari ruang bilik Elimelek.

² Nyadi sekali, Rut bejaku enggau Naomi, “Awakka aku mansang ke umai lalu ngumpul barli ti ditinggalka orang ke ngetau. Aku tentu ulih betemu enggau orang ke deka ngambi aku gawa.” Ku Naomi nyaut, “Mupuk meh nuan, anak.”

³Rut lalu mansang ke umai, bejalai ngentudika bala orang ke bekereja, ngumpul tangkai barli ti ditinggalka sida. Umai nya umai Boas.

⁴Enda lama udah bekau nya, Boas empu pen datai ari Betlehem, lalu meri tabi ngagai bala orang ke bekereja ke iya. “Awakka TUHAN meruan enggau kita!” ku iya bejaku. “TUHAN enggau nuan!” ku sida nyaut.

⁵Boas lalu nanya kepala sida, “Sapa indu nya?”

⁶Ku lelaki nya nyaut, “Iya nya orang kampar ke pulai enggau Naomi ari menua Moap.

⁷Iya minta aku ngelakka iya bejalai nitihka orang ke ngetau ngambika iya ulih ngumpul barli. Iya nadai udah ngetu bekereja kenyau ari tumu pagi tadi.”

⁸Udah nya Boas lalu bejaku enggau Rut, “Dinga nuan, anak, anang ngumpul barli ba endur bukai, tang semina ba umai tu aja. Bekereja enggau sida ke indu ditu.

⁹Peda tunga sida ngetau, lalu titihka sida. Aku udah bejaku enggau sida ke lelaki, enda nyagi sida ngachau nuan. Lalu lebuh nuan aus, nuan tau ngirup ari tepayan ai ti udah diisi sida.”

¹⁰Rut nyungkurka diri ke tanah, lalu bejaku enggau Boas, “Nama kebuah nuan manah enggau aku lalu ibuhka aku ke orang kampar tu?”

¹¹Ku Boas nyaut, “Aku udah ninga pasal semua utai ti udah dikereja nuan ke mentua indu nuan sekumbang laki nuan udah mati. Aku nemu nuan udah ninggalka apai indai nuan, enggau menua nuan, lalu datai ditu lalu diau enggau orang ke enda dikelala nuan suba.

¹²Awakka TUHAN ngupah nuan ketegal utai ti udah dikereja nuan. Awakka nuan bulih upah enggau penuh ari TUHAN Allah Taala ke disembah orang Israel, ti udah alai nuan datai ngiga pengelikun!”

¹³Disaut Rut, “Nuan nelap amat enggau aku, tuan. Nuan udah ngasuh ati aku berasai nyamai, laban nuan nelap amat bejaku enggau aku, taja pen aku tu sebaka enggau orang gaji nuan.”

¹⁴Lebuh sida belatur makai, Boas lalu bejaku enggau Rut, “Aram makai. Sepuhka roti ngagai kuah tu.” Rut lalu duduk sama enggau bala orang ke gawa, lalu Boas meri sekeda kemping roti ngagai iya. Iya makai datai ke kenyang, lalu pemakai iya bisi belaluh.

¹⁵Lebuh iya angkat deka ngumpul barli baru, Boas lalu bejaku enggau bala orang ke gawa, “Awakka iya ngumpul barli, nyengkaum ba endur alai kita ke ngengkahka berekas tangkai barli, lalu anang nagang iya. Nambahka nya, tarit sekeda tangkai gandum, lalu tinggalka tangkai nya ngambika bisi digumpul iya.”

¹⁷Rut ngumpul barli ba umai nya nyentuk ngagai lemai. Lebuh iya udah ngindik barli nya, nya baru iya nemu diri udah bulih kira sepuluh kilogram.

¹⁸Iya mai barli nya pulai ngagai nengeri, lalu mandangka pemayuh barli ti udah digumpul iya ngagai mentua indu iya. Iya lalu meri laluh pemakai iya ngagai Naomi.

¹⁹Naomi lalu nanya, “Dini alai nuan ngumpul semua barli tu sehari tu tadi, anak? Ba umai sapa nuan gawa? Awakka Allah Taala merekatka orang nya laban iya nemu ibuhka nuan!” Rut lalu madahka ngagai Naomi pasal diri ti udah bekereja ba umai orang ke benama Boas.

²⁰ Ku Naomi bejaku enggau iya, “Awakka TUHAN merekatka Boas! TUHAN endang seruran ngamatka semaya Iya enggau orang ke agi idup sereta enggau orang ke udah mati.” Lalu ku Naomi nampung jaku diri, “Orang nya kaban belayan kitai empu, siku ari orang ke betanggungjawap ngintu tua.”

²¹Rut lalu bejaku, “Utai ti pemadu manah nya, iya ngasuh aku majak ngumpul barli begulai enggau bala orang gaji iya datai ke sida nyau tembu ngetau.”

²²Ku Naomi bejaku enggau Rut, “Nya utai ti manah, anak. Manah agi nuan bekereja sama enggau bala indu ke bekereja ba umai Boas, enggai ke nuan dikachau lelaki enti nuan gawa ba umai orang bukai.”

²³Nya alai Rut bekereja enggau sida, lalu ngumpul barli datai ke semua barli enggau gandum udah abis diketau. Lalu iya mengkang diau enggau mentua indu iya.