Read Iban Rut 4 Bible Online

Rut 4 - Iban bible

Rut 4

¹Boas mansang ngagai balai raya ba pintu nengeri nya, lalu nudukka diri. Udah nya kaban belayan Elimelek ti nyempil, ti udah disebut Boas nama, mansa. Boas lalu ngangauka iya. “Datai kitu, unggal. Duduk.” Orang nya mansang lalu nudukka diri.

²Udah nya Boas mesanka sepuluh iku bala tuai nengeri nya, lalu ngasuh sida mega duduk dia. Lebuh sida udah nudukka diri,

³Boas lalu bejaku enggau kaban iya nya. Ku iya, “Naomi diatu udah pulai ari menua Moap. Iya deka nyual tanah ti diempu kaban kitai Elimelek.

⁴Aku bekira deka madahka utai nya ngagai nuan. Nya alai, beli tanah nya di mua semua orang ke duduk ditu, enggau di mua bala tuai. Enti nuan deka meli tanah nya, beli aja; tang enti nuan enggai, padahka ngagai aku, ngambika aku nyamai nemu; laban nadai orang bukai ke lebih agi patut meli tanah nya ari nuan empu. Udah nya baru aku.” Ku orang nya nyaut, “Awakka aku meh meli tanah nya.”

⁵Disaut Boas, “Nya utai ti manah. Enti nuan meli tanah nya ari Naomi, nuan mega ngambi Rut,[3] indu orang Moap ke balu nya, ngambika tanah nya mengkang diempu ruang bilik orang ke udah mati nya.”

⁶Ku lelaki nya nyaut, “Enti baka nya, aku enda nyadi meli tanah nya, laban anak aku empu enda ulih bempu tanah nya ila. Awakka nuan meh meli tanah nya. Aku enda.”

⁷ Lebuh maya nya kelia, enti orang deka nyual tauka besilihka pesaka nitihka adat asal, orang nya enda tau enda muka kasut iya, lalu meri kasut nya ngagai orang ke meli pesaka nya. Nya meh jalai orang Israel meri pemutus ngagai pekara nya.

⁸Nya alai, lebuh orang nya madahka ngagai Boas, “Awakka nuan meh meli tanah nya.” Iya lalu muka kasut iya.

⁹Udah nya Boas lalu bejaku enggau bala tuai, enggau semua orang bukai ke bisi dia, “Sehari tu semua kita nyadika saksi aku udah meli ari Naomi semua utai sida Elimelek, enggau semua utai anak lelaki iya Chilion seduai Mahlon.

¹⁰ Aku mega ngambi Rut indu orang Moap, balu Mahlon, nyadika bini aku, ngambika pesaka tu mengkang diempu ruang bilik orang ke udah mati, lalu purih iya deka majak idup begulai enggau bala sida empu, di nengeri tu. Kita meh nyadi saksi ke semua utai tu sehari tu.”

¹¹ Ku bala tuai enggau bala orang bukai bejaku, “Kami tu meh nyadika saksi. Awakka TUHAN ngaga bini nuan baka Rachel seduai Leah, ke ngadaka mayuh anak ke Jakop. Awakka nuan nyadi kaya dalam raban peturun Eprat, lalu nyadi orang ke tebilang di Betlehem.

¹² Awakka bala anak ti deka diberi TUHAN ngagai nuan, nengah indu ke biak tu, ngaga ruang bilik nuan baka ruang bilik Peres, anak Judah seduai Tamar.”

¹³Boas lalu mai Rut ngagai rumah iya nyadika bini iya. TUHAN merekatka Rut. Iya ngandung, lalu ngadaka anak lelaki siku.

¹⁴Ku sida ke indu bejaku enggau Naomi, “Puji TUHAN! Sehari tu Iya udah meri ngagai nuan siku uchu ti lelaki, ngambika bisi ngidupka nuan. Awakka nembiak nya nyadi orang ke tebilang di menua Israel!

¹⁵Menantu nuan rinduka nuan, lalu udah ngereja mayuh agi utai ke nuan ari ti dikereja tujuh iku anak lelaki. Lalu diatu iya udah meri nuan siku uchu ti lelaki, ti deka mai pengidup ti baru ngagai nuan, lalu ngasuh nuan diau likun lebuh nuan nyau tuai.”

¹⁶Naomi lalu ngambi anak mit nya, merap, lalu ngibun iya.

¹⁷Bala indu ke diau bekelingi dia lalu meri nama Obet ngagai anak mit nya. Ku sida madahka ngagai semua orang, “Naomi bisi anak lelaki!” Obet nyadi apai Jesi, lalu Jesi nyadi apai David.

¹⁸Baka tu ku ripih purih ari Peres nyentuk ngagai David: Peres, Hesron, Ram, Aminadap, Nason, Salmon, Boas, Obet, Jesi, David.