Read Iban 1 Samuel 1 Bible Online

1 Samuel 1 - Iban bible

1 Samuel 1

¹Nyadi di nengeri Ramah, di menua ti bebukit di menua Epraim, bisi siku lelaki benama Elkanah anak Jeroham, uchu Elihu, ari ruang bilik Tohu, ari raban peturun Sup.

²Elkanah bisi dua iku bini; nama siku Hanah, lalu nama siku Peninah. Peninah bisi anak, tang Hanah nadai anak.

³Elkanah bejalai tiap taun ari Ramah mansang nyembah lalu ngenjuk piring ngagai TUHAN ti Pemadu Bekuasa di Siloh, alai dua iku anak lelaki Eli, Hopni seduai Pinehas ke bekereja nyadi imam TUHAN.

⁴Genap kali Elkanah ngenjuk piring, iya meri siti ungkup ari dagin nya ngagai bini iya, Peninah, enggau siti ungkup ngagai genap iku anak lelaki enggau anak indu Peninah.

⁵Tang taja pen Elkanah rinduka bini iya Hanah, iya semina meri siti aja ungkup ngagai Hanah, laban TUHAN udah nagang Hanah bisi anak.

⁶Peninah selalu ngeleseka Hanah ngambika iya ringat, laban TUHAN nagang Hanah beranak.

⁷Utai tu nyadi ari taun siti ngagai taun siti. Genap kali Hanah mansang ngagai Rumah TUHAN, Peninah selalu ngeleseka iya, datai ke Hanah nyau nyabak, lalu enggai makai.

⁸Laki iya selalu nanya iya, “Hanah, nama kebuah nuan nyabak, enda makai, lalu selalu tusah ati? Kati aku tu kurang agi beguna ba nuan ari sepuluh iku anak lelaki?”

⁹Nyadi sekali, lebuh sida udah badu makai ngirup di Siloh, Hanah angkat. Nyadi imam Eli duduk ngimbai tiang pintu rumah TUHAN.

¹⁰Ati Hanah balat amat tusah, lalu iya balat amat nyabak besampi ngagai TUHAN.

¹¹ Hanah lalu besumpah, ku iya, “TUHAN ti Pemadu Bekuasa, enti Nuan deka merening ngagai pemerinsa aku ke nembiak Nuan, lalu ingatka aku, lalu meri aku siku anak lelaki, aku deka nyerahka iya ngagai TUHAN sepemanjai umur iya, lalu buk iya deka digalau enda diguntin.”[1]

¹²Hanah majak besampi ngagai TUHAN, lalu Eli beratika mulut iya.

¹³Iya besampi dalam ati diri; semina mulut iya aja ti kimut-kimut, tang iya enda bemunyi. Nya alai Eli ngumbai iya mabuk,

¹⁴lalu ku Eli bejaku enggau iya, “Ni pengelama nuan mandangka diri mabuk baka tu? Anang agi ngirup!”

¹⁵Tang ku Hanah nyaut, “Aku ukai mabuk, tuan; ati aku balat tusah; aku nadai ngirup wain tauka ai ti bisa; aku semina mantaika penusah aku ngagai TUHAN.

¹⁶Anang ngumbai aku jai. Aku besembiang baka tu laban ati aku balat irau sereta tusah.”

¹⁷Eli lalu nyaut iya, “Mupuk meh nuan enggau selamat. Awakka Allah Taala ke disembah orang Israel meri ngagai nuan utai ti dipinta nuan.”

¹⁸Lalu ku Hanah bejaku ngagai Eli, “Awakka nuan selalu manah runding pasal aku.” Hanah lalu mupuk, makai mimit, lalu mua iya enda agi tusah.

¹⁹Elkanah enggau sida sebilik dani tumu pagi hari siti, lalu nyembah TUHAN; udah nya sida mulaika diri ke Ramah. Elkanah beleman enggau bini iya Hanah, lalu TUHAN ingatka Hanah.

²⁰Hanah ngandung, lalu ngadaka anak lelaki siku, lalu iya meri iya nama Samuel.[2] Ku Hanah, “Aku udah minta iya ari TUHAN.”

²¹Maya pen datai alai Elkanah enggau sida sebilik deka mansang baru ngagai Siloh, lalu ngenjuk piring ti diberi sida ninting taun ngagai TUHAN, enggau siti piring ti pemadu manah ti udah disemaya iya.

²²Tang sekali tu Hanah enda enggau sida. Ku iya madahka ngagai laki iya, “Lebuh anak mit tu udah badu nusu ila, aku deka mai iya ngagai rumah TUHAN, lalu iya deka diau dia seumur idup.”

²³Disaut Elkanah, “Barang ku jaku. Kereja aja utai ti ku ati nuan, nganti nuan udah badu agi nusuka iya. Awakka TUHAN ngamatka semaya Iya.” Nya alai Hanah diau di rumah, nusuka anak iya, nyentuk ngagai maya iya badu nusu.

²⁴Lebuh Hanah udah badu agi nusuka anak mit nya, iya lalu mai anak mit nya ngagai Siloh, mai siku sapi ti lelaki ti umur tiga taun,[3] sepuluh kilogram tepung, enggau sekambut wain. Iya mai Samuel ngagai Rumah TUHAN di Siloh, taja pen Samuel agi biak.

²⁵Lebuh sida udah nyayat jelu sapi nya, sida lalu mai anak mit nya ngagai Eli.

²⁶Ku Hanah bejaku enggau Eli, “Tuan, aku tu meh indu ke dipeda nuan bediri ditu besampi ngagai TUHAN.

²⁷Iya tu meh anak ke dipinta aku ari TUHAN, lalu TUHAN udah nyaut sampi aku.

²⁸Nya alai aku diatu nyerahka iya ngagai TUHAN. Seagi-agi iya idup, iya diserahka ngagai TUHAN.” Hanah lalu ninggalka Samuel dia ke TUHAN.