Read Iban 1 Samuel 10 Bible Online

1 Samuel 10 - Iban bible

1 Samuel 10

¹Udah nya Samuel ngambi sebutul mit minyak kana, lalu nuang minyak nya ba pala Saul, nyium Saul, lalu ku iya, “TUHAN nata nuan nyadi raja ke nembiak Iya orang Israel. Nuan deka merintah nembiak Iya, lalu nyaga sida ari semua munsuh sida. Tu tanda kena nunjukka nuan udah dipilih TUHAN nyadi raja ke bala nembiak Iya:

²Lebuh tua beserara sehari tu lagi, nuan deka betemu enggau dua iku orang semak lumbung Rachel di Selsah, di menua Benjamin. Seduai iya deka madahka keledai ti digiga nuan udah ditemu, ngambika apai nuan enda agi irau ati ke keledai nya. Tang iya irau ati ke nuan. Iya seruran nanya, ‘Baka ni ku aku enggau anak aku nya?’

³Nuan deka angkat ari endur nya lalu datai ba sepun kayu oak di Tabor. Dia nuan deka betemu enggau tiga iku orang ke mansang ngenjuk piring ngagai Allah Taala di Betel. Siku ari sida nya deka mai tiga iku kambin, siku deka mai tiga iti tuku roti, lalu iya ti ketiga deka mai siti kambut ti penuh laban wain.

⁴Sida tiga nya deka nabi nuan, lalu meri ngagai nuan dua ari tiga iti tuku roti nya, lalu nuan enda tau enda nyambut roti nya.

⁵Udah nya nuan deka bejalai ngagai bukit Allah Taala di Gibe-ah, alai ti bisi kem orang Pilistin. Ba pintu kuta nengeri nya nuan deka betemu enggau bala nabi ke nurun ari alta ti ba bukit nya. Sida nabi nya deka nebah belikan, dedumbak, kesuling, enggau engkeratung. Sida deka betanda sereta benabi.

⁶Roh TUHAN deka tekala nya bekuasa ba nuan, lalu nuan deka betanda sereta manjung sama enggau sida, lalu nuan deka berubah lalu enda agi baka selama.

⁷Lebuh utai tu nyadi, kereja aja sebarang utai ti diasuh Allah Taala kereja nuan.

⁸Nuan deka bejalai dulu ari aku ngagai Gilgal. Aku deka betemu enggau nuan din, lalu ngenjuk piring tunu enggau piring pemaik. Nuan enda tau enda nganti tujuh hari din, nyentuk ngagai maya aku udah datai din, lalu madahka utai ti enda tau enda dikereja nuan.”

⁹Lebuh Saul nguing deka beserara ari Samuel, Allah Taala ngubah Saul, lalu semua utai ti udah dipadahka Samuel, nyadi magang sehari nya.

¹⁰Lebuh Saul enggau orang gaji iya datai di Gibe-ah, seraban bala nabi betemu enggau iya. Roh Allah Taala lalu tekala nya bekuasa ba Saul, lalu iya enggau bala nabi betanda sereta manjung.

¹¹Lebuh orang ke udah nemu iya dulu ari nya, meda iya ngereja nya, sida lalu nanya ngagai pangan diri, “Nama utai ti udah nyadi ba anak Kis? Kati Saul udah nyadi nabi?”

¹² Siku orang ke diau dia lalu nanya, “Kati ku baka nabi ti bukai tu - sapa apai sida tu ku pikir kita?” Tu meh penatai jaku, “Kati Saul udah nyadi nabi?”

¹³Lebuh Saul udah badu betanda lalu badu agi manjung, iya lalu mansang ngagai alta ti ba atas bukit nya.

¹⁴Lebuh aya Saul meda Saul enggau orang gaji iya, iya lalu nanya, “Kini ke seduai tadi?” “Ngiga keledai,” ku Saul nyaut. “Lebuh kami duai nadai tetemuka raban keledai nya, kami duai lalu mansang ngagai Samuel.”

¹⁵“Nama utai ti dipadahka iya ngagai nuan?” ku aya Saul nanya.

¹⁶“Iya madahka jelu nya udah ditemu,” ku Saul nyaut, tang iya enda madahka ngagai aya iya utai ti udah disebut Samuel pasal iya ti deka nyadi raja.

¹⁷Samuel lalu mesanka orang mayuh begempuru di mua TUHAN di Mispah,

¹⁸lalu ku iya bejaku enggau sida, “TUHAN Allah Taala ke disembah orang Israel bejaku munyi tu, ‘Aku udah mai kita pansut ari menua Ejip, lalu udah ngelepaska kita ari pengidup kita ke nyadi ulun orang Ejip, enggau ari semua orang ke udah nekanka pengidup kita.

¹⁹Aku tu Allah Taala kita ke udah ngelepaska kita ari semua penusah enggau pemerinsa kita, tang sehari tu kita udah nulak Aku, lalu udah minta Aku meri kita siku raja. Barang ku jaku! Begempuru meh kita di mua TUHAN nitihka ripih raban bansa enggau ripih suku raban bansa kita.’ ”

²⁰Udah nya Samuel lalu ngasuh siti-siti raban bansa mansang ke mua, lalu TUHAN milih raban bansa Benjamin.

²¹Udah nya Samuel ngasuh ruang bilik ari raban bansa Benjamin mansang ke mua, lalu ruang bilik Matri kena pilih. Udah nya, bala lelaki ari ruang bilik Matri datai ke mua, lalu Saul anak Kis kena pilih. Sida lalu ngiga iya, tang lebuh sida nadai tetemuka iya,

²²sida lalu nanya ngagai TUHAN, “Kati bisi agi orang bukai?” TUHAN lalu nyaut, “Saul bisi din, belalai ba tugung pekekas.”

²³Sida lalu belanda kia, lalu mai Saul pansut betemu enggau orang mayuh, lalu sida meda iya sekaki tinggi agi ari orang bukai.

²⁴Ku Samuel bejaku enggau orang mayuh, “Tu meh orang ke udah dipilih TUHAN! Nadai orang bukai baka iya ba bala kitai tu.” Semua orang lalu manjung, “Gayu-guru raja!”

²⁵Samuel lalu nerangka ngagai orang mayuh pasal hak enggau pengawa raja. Udah nya iya nuliska utai nya dalam siti bup, ti diengkah iya ba endur ti kudus. Udah nya iya lalu ngasuh semua orang pulai.

²⁶Saul mega pulai ngagai Gibe-ah. Sekeda orang ke kering, [10] ti udah ditegu Allah Taala ati, mupuk sama enggau Saul.

²⁷Tang ku sekeda orang ke nadai guna bejaku, “Baka ni ku orang tu tau meri penguntung ngagai kitai?” Sida mechat Saul, lalu enda mai pemeri ngagai iya.