Read Iban 1 Samuel 12 Bible Online

1 Samuel 12 - Iban bible

1 Samuel 12

¹Udah nya Samuel lalu bejaku enggau orang Israel, “Aku udah ngereja utai ti dipinta kita. Aku udah meri kita raja ngambika bisi merintah kita.

²Diatu iya bisi nguluka kita. Tang aku empu nyau tuai, nyau buban bulu pala, lalu bala anak aku bisi enggau kita. Aku udah nguluka kita kenyau ari aku agi bujang, nyentuk ngagai diatu.

³ Diatu aku bediri di mua kita. Enti aku bisi udah ngereja penyalah ngagai kita, awakka kita bedawaka aku diatu di mua TUHAN, enggau di mua raja ti udah dipilih Iya. Kati aku bisi udah kala ngambi sapi tauka keledai kita? Kati aku bisi udah kala nipu tauka nekanka pengidup kita? Kati aku bisi udah kala makai suap? Enti aku bisi udah ngereja utai nya, aku deka mayar utai ti udah diambi aku.”

⁴Orang mayuh lalu nyaut, “Nadai kala. Nuan nadai kala nipu, tauka nekanka pengidup kami. Nuan nadai kala ngambi utai ari kami.”

⁵Samuel lalu nyaut, “TUHAN enggau raja ti udah dipilih Iya deka nyadika saksi sehari tu ke kita ke nemu aku nadai penyalah.” “Awakka TUHAN nyadika saksi kami,” ku sida nyaut.

⁶ Ku Samuel nampung jaku iya, “TUHAN udah milih Moses seduai Aron, lalu udah mai aki ini kita pansut ari menua Ejip.

⁷Nya alai anang mindah, laban aku deka bedawaka kita di mua TUHAN. Aku deka ngasuh kita ngingat[12] ke semua kereja ti besai ti udah dikereja TUHAN kena Iya ngidupka nyawa kita enggau nyawa aki ini kita.

⁸ Lebuh Jakop enggau sida sebilik mansang ngagai menua Ejip, lalu orang Ejip nekanka pengidup sida,[13] bala aki ini kita nyabak ngangauka TUHAN minta Iya nyaup sida. TUHAN lalu ngirumka Moses seduai Aron, lalu seduai iya mai sida pansut ari menua Ejip, lalu ngentapka sida diau di menua tu.

⁹ Tang orang mayuh enda ingatka TUHAN Allah Taala sida. Nya alai Iya lalu nejuka orang Pilistin enggau raja menua Moap, enggau Sisera, tuai soldadu ke di nengeri Hasor, nyerang aki ini kita lalu ngalahka sida.

¹⁰ Udah nya sida lalu nyabak minta saup TUHAN. Ku sida, ‘Kami udah bedosa, laban kami udah ninggalka Nuan, TUHAN, lalu udah nyembah engkeramba Baal enggau engkeramba Astarte. Lepaska kami ari munsuh kami, ngambika kami nyembah Nuan!’

¹¹ TUHAN lalu ngirumka Gideon, Barak, Jeptah, lalu ke pengujung iya, Iya ngirumka aku empu. Genap iku bala kami bela udah ngelepaska kita ari jari munsuh kita, lalu kita udah diau likun.

¹² Tang lebuh kita meda Nahas, raja orang Amon baru deka nyerang kita, kita lalu nyingkirka TUHAN ti endang Raja kita, lalu ku kita bejaku enggau aku, ‘Kami minta siku raja ngambika iya bisi merintah kami.’

¹³“Nya alai, tu raja ti udah dipilih kita. Kita udah minta iya, lalu diatu TUHAN udah meri iya ngagai kita.

¹⁴Pengidup kita deka mujur enti kita nangika TUHAN Allah Taala kita, betuaika Iya, mendingka Iya, lalu ngasika pesan Iya, lalu kita enggau raja kita nitihka Iya.

¹⁵Tang enti kita enda mendingka TUHAN, lalu enda ngasika pesan Iya, Iya deka nyerang kita enggau raja kita.[14]

¹⁶Nya alai, anang beguai-guai mupuk, ngambika kita ulih meda pengawa ti besai ti deka dikereja TUHAN.

¹⁷Tu musin kemarau, ukai enda? Tang aku deka besampi, lalu TUHAN deka ngasuh hari beguntur sereta ujan. Lebuh utai nya nyadi, nya baru kita deka nemu pemesai penyalah diri ngelaban TUHAN lebuh kita minta Iya meri kita raja.”

¹⁸Samuel lalu besampi, lalu sehari nya TUHAN ngasuh hari beguntur sereta ujan. Udah nya semua orang mayuh takutka TUHAN enggau ke Samuel,

¹⁹lalu ku sida bejaku enggau Samuel, “Tuan, kami minta nuan besampi ngagai TUHAN Allah Taala kitai, ngarika kami, ngambika kami enda mati. Diatu baru kami nemu, kelimpah ari dosa kami ke bukai, kami udah bedosa, laban kami udah minta siku raja.”

²⁰Ku Samuel nyaut, “Anang takut. Taja pen kita udah ngereja utai ti jai baka tu, anang mega kita ninggalka TUHAN, tang betuaika Iya enggau pengabis ati kita.

²¹Anang nyembah engkeramba, laban sida enda ulih nyaup tauka ngidupka kita, laban sida nya ukai utai ti bendar.

²²TUHAN udah besumpah enggai ninggalka kita, laban Iya udah mutuska penemu deka ngaga kita nyadika nembiak Iya.

²³Nyadi pasal aku empu, aku bedosa ngelaban TUHAN enti aku badu agi besampika kita. Lalu aku deka ngajar kita pasal utai ti manah sereta ngena, ti patut dikereja kita.

²⁴Kita enda tau enda nangika TUHAN lalu tetap ati betuaika Iya enggau pengabis ati kita. Kingatka utai ti besai ti udah dikereja Iya ke kita.

²⁵Tang enti kita majak bedosa, kita enggau raja kita deka dirusak.”