Read Iban 1 Samuel 13 Bible Online

1 Samuel 13 - Iban bible

1 Samuel 13

¹Saul umur...[15] ...taun lebuh iya berengkah megai perintah; lalu iya merintah ... dua taun.[16]

²iya milih tiga ribu iku lelaki, lalu ngeletak dua ribu iku sida diau enggau iya di Mikmas, enggau di menua ti bebukit di Betel. Iya ngirumka seribu iku sida ti bukai ngagai anak lelaki iya Jonatan di Gibe-ah, di menua Benjamin. Lelaki ti bukai diasuh Saul pulai.

³Jonatan munuh tuai soldadu orang Pilistin[17] di Geba, lalu semua orang Pilistin ninga berita nya. Udah nya Saul lalu ngasuh bala seruan nyepu terumpit di serata menua nya kena nesau orang Hebrew mansang beperang.

⁴Semua orang Israel udah dipadahka magang pasal Saul ti udah munuh tuai soldadu orang Pilistin, enggau pasal orang Pilistin ke begedika orang Israel. Nya alai orang mayuh bela nyaut tesau nya, lalu datai ngagai Saul di Gilgal.

⁵Orang Pilistin lalu begempuru deka nyerang orang Israel. Sida bisi tiga puluh ribu buah kerita perang, enam ribu iku bala soldadu ke nepan kuda, lalu bala soldadu sida ngemayuh igi pasir ti ba tebing tasik. Sida mansang ngagai Mikmas, tunga ke timur ari Bet-aben, lalu nirika kem sida dia.

⁶Udah nya sida bebendar amat nyerang orang Israel, ti ngasuh orang Israel nyau genting seput. Sekeda orang Israel belalai dalam gua, enggau dalam lubang, ba sebelah selikap batu, tauka dalam lubang tanah tauka telaga.

⁷Sida ke bukai meraka Sungai Jordan ngagai menua Gat enggau Giliat. Saul agi mengkang di Gilgal, lalu orang ke enggau iya nyau getar-getar takut.

⁸ Iya nganti Samuel tujuh hari, nitihka atur Samuel. Tang Samuel lalu apin datai di Gilgal. Bala orang mayuh lalu belabuh ninggalka Saul.

⁹Nya alai, ku iya bejaku enggau sida, “Bai ngagai aku piring tunu, enggau piring pemaik.” Iya lalu ngenjuk piring tunu,

¹⁰lalu lebuh iya baru udah tembu ngereja nya, Samuel pen datai. Saul lalu mansang ngambat iya, lalu ngelaluka penatai iya.

¹¹Tang ku Samuel bejaku, “Nama utai tu ti udah dikereja nuan, Raja?” Saul lalu nyaut, “Orang mayuh nyau ninggalka aku, lalu nuan pen apin mega datai, enda nitihka semaya nuan. Nambahka nya, orang Pilistin nyau betatam di Mikmas.

¹²Nya alai aku berunding, ‘Orang Pilistin deka nyerang aku di Gilgal ditu, lalu aku apin minta kasih ari TUHAN.’ Nya alai aku lalu berunding deka ngenjuk piring.”

¹³Samuel lalu nyaut, “Nya pengawa ti beli. Nuan enda ngasika pesan TUHAN Allah Taala nuan. Enti nuan udah ngasi, Iya tentu deka ngasuh nuan, enggau peturun nuan, megai perintah di menua Israel belama iya.

¹⁴ Tang diatu, perintah nuan deka abis. Laban nuan enda ngasika TUHAN, Iya deka ngiga siku orang ke dikedekaka Iya, lalu ngasuh orang nya merintah bala nembiak TUHAN.”

¹⁵Samuel angkat lalu mupuk ari Gilgal. Orang Israel ti bukai nitihka Saul lebuh iya pulai baru ngagai bala soldadu iya. Sida angkat ari Gilgal ngagai Gibe-ah, di menua Benjamin. Saul lalu ngitung bala soldadu iya, kira enam ratus iku semua sida.

¹⁶Saul, enggau anak iya Jonatan, enggau bala sida nirika kem di Geba, di menua Benjamin. Orang Pilistin bepalan ba kem sida di Mikmas.

¹⁷Bala soldadu orang Pilistin mansang nyerang ari kem sida ngena tiga iti raban. Seraban mansang ngagai Oprah di menua Sual;

¹⁸seraban mansang ngagai Bet-horon; lalu seraban ngagai garis entara menua ti ari atas Lebak Seboim enggau menua puang.

¹⁹Nyadi menua Israel nadai orang tukang besi, laban orang Pilistin bebendar nagang orang Israel begagaka pedang enggau sangkuh. (

²⁰Orang Israel enda tau enda mai pengeradu tanah, changkul, kapak enggau lungga kena ngetau ngagai orang Pilistin, ngambika orang Pilistin ngansah utai nya ke sida.

²¹Upah ngansah siti kapak, enggau ngaduka tungkat ti dikena ngachuk sapi nya sesingkap duit ti mit. Upah ngansah pengeradu tanah enggau changkul nya dua singkap duit ti mit.)

²²Nya alai lebuh sida beperang sehari nya, orang Israel nadai pedang tauka sangkuh, kelimpah ari Saul enggau anak iya Jonatan.

²³Orang Pilistin ngirumka seraban soldadu nan ba Genting Mikmas.