Read Iban 1 Samuel 16 Bible Online

1 Samuel 16 - Iban bible

1 Samuel 16

¹Ku TUHAN bejaku ngagai Samuel, “Ni pengelama nuan agi tusah ati ke Saul? Aku udah nulak iya nyadi raja orang Israel. Diatu ambi minyak kana, lalu mansang ngagai Betlehem, ngagai orang siku ke benama Jesi, laban Aku udah milih siku ari anak lelaki iya nyadi raja.”

²Samuel lalu nanya, “Baka ni ku aku ulih ngereja nya? Enti Saul ninga nya, iya tentu deka munuh aku!” Disaut TUHAN, “Bai siku anak sapi, lalu padahka ngagai Saul nuan deka ngenjuk piring ngagai TUHAN din.

³Bai Jesi ngagai pengawa miring nya. Ila Aku deka madahka utai ti deka dikereja nuan. Nuan deka nata orang siku ti deka dipadahka Aku ngagai nuan, ngambika iya nyadi raja.”

⁴Samuel lalu ngereja utai ti diasuh TUHAN. Iya mansang ngagai Betlehem. Bala tuai nengeri nya nyau getar-getar ngambat iya. Ku sida nanya, “Kati nuan nemuai mai pemaik, tukang tujum?”

⁵Disaut Samuel, “Aku datai laban aku deka meri piring ngagai TUHAN. Tuchi diri empu lalu mupuk sama enggau aku.” Iya mega ngasuh Jesi enggau bala anak lelaki iya nuchi diri, lalu mai sida ngagai pengawa nya.

⁶Lebuh sida datai, Samuel meda anak Jesi ke benama Eliap, lalu ku iya berunding dalam ati diri, “Orang ke bediri di mua TUHAN tu tentu orang ke udah dipilih Iya.”

⁷Tang ku TUHAN bejaku enggau Samuel, “Anang ngira peninggi tauka penyigat gamal orang. Aku udah nulak iya, laban Aku enda ngira mensia ngena chara mensia. Mensia meda gamal, tang Aku meda ati.”

⁸Udah nya Jesi ngangauka anak iya ke benama Abinadap, lalu mai iya ngagai Samuel. Tang ku Samuel, “Ukai. TUHAN enda milih iya.”

⁹Udah nya Jesi lalu mai Samah. Tang ku Samuel, “Ukai. TUHAN enda milih iya.”

¹⁰Nya alai Jesi mai tujuh iku ari bala anak lelaki iya ngagai Samuel. Tang ku Samuel bejaku enggau Jesi, “Ukai. TUHAN enda milih bala sida tu.”

¹¹Udah nya Samuel lalu nanya Jesi, “Kati nuan agi bisi anak lelaki bukai?” Disaut Jesi, “Bisi. Siku ke bunsu, tang iya benung ngibun bedus.” Ku Samuel, “Asuh iya datai kitu. Kitai enda meri piring sebedau iya datai.”

¹²Jesi lalu mesanka anak bunsu iya. Gamal iya sigat amat, bepengerai, lalu mata iya tajam. Ku TUHAN bejaku ngagai Samuel, “Nya meh iya. Tata iya!”

¹³Samuel lalu ngambi minyak kana, lalu nata David di mua bala menyadi iya. Tekala nya Roh TUHAN lalu bekuasa ba David, lalu berengkah ari nya Roh TUHAN meruan enggau iya. Udah nya Samuel pulai ngagai Ramah.

¹⁴Roh TUHAN ninggalka Saul, lalu roh ti jai ti dikirumka TUHAN datai, lalu merinsaka iya.

¹⁵Ku bala orang gaji Saul bejaku enggau Saul empu, “Roh ti jai, ti dikirumka Allah Taala, nya ti merinsaka nuan.

¹⁶Nya alai asuh kami, tuan, ngiga orang siku ke nemu nebah belikan. Lebuh roh ti jai nya merinsaka nuan, orang nya tau nebah belikan iya, lalu nuan deka gerai baru.”

¹⁷Saul lalu bejaku enggau sida, “Giga siku orang ke landik nebah belikan, lalu bai iya kitu ngagai aku.”

¹⁸Ku siku orang gaji bejaku, “Jesi ari nengeri Betlehem bisi siku anak lelaki, ti landik nebah musik. Iya mega orang ke berani, sereta sigat gamal, soldadu ti manah, sereta lanchar bejaku. TUHAN bisi enggau iya.”

¹⁹Saul lalu ngasuh bala seruan mai pesan tu ngagai Jesi, “Asuh anak lelaki nuan ke benama David, ke ngibun bedus, datai ngagai aku.”

²⁰Jesi lalu ngambi siku keledai. Iya ngengkahka roti enggau sekambut wain ba belakang keledai nya, lalu ngasuh anak iya David nganjung utai nya, enggau siku anak kambin, ngagai Saul.

²¹Lebuh David datai ba istana Saul, iya lalu belabuh bekereja ke Saul. Saul balat amat rinduka David, lalu David nyadi orang ke mai senyata ke iya.

²²Udah nya Saul lalu ngirumka pesan ngagai Jesi, “Awakka David bekereja ke aku, laban aku rinduka iya.”

²³Lebuh roh ti jai, ti dikirumka Allah Taala, merinsaka Saul, David ngambi belikan iya, lalu nebah belikan nya. Saul lalu berasai nyamai, sereta gerai, lalu roh ti jai nya ninggalka iya.