Read Iban 1 Samuel 17 Bible Online

1 Samuel 17 - Iban bible

1 Samuel 17

¹Orang Pilistin begempuru di Sokoh, sebuah nengeri di menua Judah, sedia deka beperang. Sida nirika kem sida ba endur siti ke benama Epes-damim, ba entara Sokoh enggau Asekah.

²Saul enggau orang Israel begempuru lalu nirika kem sida ba Lebak Elah, lalu berintai deka beperang ngelaban orang Pilistin.

³Bala orang Pilistin bediri berintai ba bukit sigi lalu orang Israel ba bukit sigi, diseraraka siti lebak.

⁴Siku orang ke benama Goliat, ari nengeri Gat, pansut ari kem orang Pilistin, lalu nyakap orang Israel. Peninggi iya kira tiga meter,[26]

⁵lalu iya ngena baju kebal ti digaga ari temaga, ti berat lima puluh semilan kilogram, enggau selapuk kebal ti digaga ari temaga.

⁶Kaki iya mega disarung enggau temaga, lalu iya mai siti sangkuh ti digaga ari temaga, ti disan iya.

⁷Enteran sangkuh iya ngemesai tendai ti dikena orang betenun. Mata sangkuh iya digaga ari besi lalu pemerat mata sangkuh iya nya kira tujuh kilogram. Lalu orang ke mai senyata iya, bejalai dulu ari iya.

⁸Goliat bediri lalu ngangauka orang Israel, “Nama kebuah kita berintai deka beperang? Kati aku tu ukai orang Pilistin, lalu kita nya ulun Saul? Pilih siku ari bala kita, lalu awakka iya nurun kitu ngagai aku.

⁹Enti iya ulih ngelaban aku, lalu tebunuhka aku, awakka kami meh nyadi ulun kita. Tang enti aku menang ngelaban iya, lalu tebunuhka iya, kita meh nyadi ulun kami.

¹⁰Sehari tu aku nyakap kita soldadu orang Israel. Asuh siku ari bala kita ngelaban aku!”

¹¹Lebuh Saul enggau bala iya ninga nya, sida tusah ati sereta balat amat takut.

¹²Nyadi David nya anak Jesi, ari raban peturun Eprat, ti diau di Betlehem, di menua Judah. Jesi bisi lapan iku anak lelaki. Lebuh Saul nyadi raja, Jesi endang udah tuai umur.

¹³Anak iya tiga iku ke tuai agi udah mupuk enggau Saul mansang beperang. Iya ke tuai nya Eliap, ditangkanka Abinadap, lalu iya ti ketiga nya Samah.

¹⁴David nya anak bunsu Jesi. Lebuh sida tiga ke tuai agi nya enggau Saul,

¹⁵David selalu kuang-kuit mansang ngagai Saul lalu pulai baru ngagai raban bedus apai iya di Betlehem.

¹⁶Goliat nyakap orang Israel tiap pagi lemai dalam kandang empat puluh hari.

¹⁷Nyadi sekali Jesi bejaku enggau David, “Bai sepuluh kilogram kemping enggau sepuluh iti tuku roti lalu anjung enggau jampat ngagai menyadi nuan di kem.

¹⁸Lalu bai mega sepuluh igi tuku engkiju ngagai tuai soldadu. Tanyaka gaya pendiau bala menyadi nuan, lalu bai siti utai kena nandaka sida agi gerai nyamai magang.

¹⁹Raja Saul, bala menyadi nuan, enggau semua orang Israel ti bukai diatu benung ba Lebak Elah, beperang ngelaban orang Pilistin.”

²⁰David angkat tumu pagi hari siti, ngasuh orang bukai ngibun raban bedus, lalu nganjung pemakai nitihka asuh apai iya Jesi. Iya datai ba kem lebuh orang Israel benung manjung mansang ngagai endur alai sida ke berintai deka beperang.

²¹Orang Pilistin enggau orang Israel lalu besedia deka belaban, betunga mua enggau pangan diri.

²²David lalu ninggalka pemakai ba orang ke ngibun bekal, belanda ngagai rintai orang ke deka belaban, mansang ngagai bala menyadi iya, lalu nanyaka gaya pendiau sida sebuat.

²³Lebuh iya agi benung bejaku enggau sida, Goliat mansang ke mua ari bala orang Pilistin, lalu nyakap orang Israel, baka selama. Lalu David ninga iya.

²⁴Lebuh orang Israel meda Goliat, sida lalu rari takut.

²⁵“Peda iya nya!” ku sida bejaku enggau pangan diri. “Pendingka ulih kita jaku chakap iya! Raja Saul udah besemaya deka meri upah ti besai ngagai orang ke tebunuhka Goliat. Raja deka mega meri anak dara iya nyadika bini orang nya, lalu ruang bilik apai orang nya enda ibuh mayar chukai.”[27]

²⁶David lalu nanya bala orang ke semak iya, “Nama utai ti deka diberi ngagai orang ke tebunuhka orang Pilistin tu, lalu ngelepaska orang Israel ari pemalu tu? Berani amat orang kapir tu nyakap bala soldadu Allah Taala ti idup!”

²⁷Sida lalu madahka ngagai iya utai ti deka dikereja ngagai orang ke tebunuhka Goliat.

²⁸Eliap, menyadi David ke pengabis tuai, bisi ninga David bejaku enggau bala orang nya. Iya lalu pedis ati ngagai David, lalu ku iya, “Nama pengawa nuan ditu? Sapa ngibun bedus nuan di menua puang din? Nuan tu ngemintarka diri aja. Nuan datai ditu laban nuan ingin deka meda orang belaban!”

²⁹“Nama penyalah aku?” ku David nanya. “Nama kebuah aku enda tau bejaku?”

³⁰Iya nguing ngagai orang bukai, lalu nanya munyi ti dulu. Genap kali iya nanya, saut sida sebaka magang.

³¹Sekeda orang ke ninga jaku David, madahka ngagai Saul. Saul lalu mesanka David.

³²Lalu ku David bejaku enggau Saul, “Tuan Raja, anang nejuka orang takutka orang Pilistin nya! Awakka aku ngelaban iya.”

³³Saul lalu bejaku enggau David, “Nuan enda ulih ngelaban orang Pilistin nya, laban nuan agi biak, lalu iya enda udah nyadi soldadu kenyau ari iya agi bujang.”

³⁴Tang ku David nyaut Saul, “Tuan Raja, aku endang selalu ngibun bedus apai aku. Genap kali jelu singa tauka beruang[28] nabanka anak domba,

³⁵aku nitihka iya, lalu munuh iya, lalu ngelepaska anak domba nya. Lalu enti jelu singa tauka beruang nya mutar ngelaban aku, aku nyekal iya, malu iya lalu munuh iya.

³⁶Aku udah munuh jelu singa enggau beruang, lalu aku deka munuh orang kapir tu baka aku ti munuh jelu, laban iya udah nyakap bala soldadu Allah Taala ti idup.

³⁷TUHAN ke udah nyelamatka aku ari singa enggau beruang, deka mega nyelamatka aku ari jari orang Pilistin nya.” “Barang ku jaku,” ku Saul nyaut. “Mupuk meh nuan. TUHAN deka meruan enggau nuan.”

³⁸Saul lalu ngerasukka perengka perang iya empu ba David; iya ngerasukka selapuk kebal ti digaga ari temaga ba pala David, enggau baju kebal iya.

³⁹David lalu nanchangka pedang Saul atas baju kebal nya, lalu nguji bejalai, tang enda ulih, laban iya enda teleba ngena utai ti baka nya. David lalu bejaku ngagai Saul, “Aku enda ulih belaban ngena semua utai tu, laban aku enda teleba ngena utai tu.” Iya lalu muka utai nya ari tubuh iya.

⁴⁰Iya lalu mai tungkat ti dikena iya ngibun bedus, lalu milih lima igi batu ti segala ari sungai, lalu nyimpan batu nya dalam kambut iya. Iya megai pangwang iya, lalu mansang ngagai Goliat.

⁴¹Orang Pilistin nya lalu belabuh mansang ngagai David. Orang ke mai terabai iya bejalai dulu ari iya.

⁴²Lebuh Goliat udah meratika David, iya ngeleseka David, laban David agi biak umur, agi biring sereta sigat gamal.

⁴³Ku iya bejaku ngagai David, “Kati aku tu ukui alai nuan mansang ngagai aku mai tungkat?” Iya lalu nyumpah David dalam nama petara iya empu.

⁴⁴Ku iya nyakap David, “Mansang kitu, ngambika aku nyerahka bangkai nuan ngagai burung enggau jelu.”

⁴⁵Disaut David, “Nuan mansang ngelaban aku ngena pedang, sangkuh enggau perambut, tang aku mansang ngelaban nuan dalam nama TUHAN ti Pemadu Bekuasa, Allah Taala bala soldadu orang Israel ti udah dikeleseka nuan.

⁴⁶Sehari tu TUHAN deka nyerahka nuan ngagai jari aku, lalu aku deka munuh nuan, lalu mumpung pala nuan. Lalu sehari tu aku deka nyerahka bangkai bala soldadu orang Pilistin ngagai burung enggau jelu ngambika semua mensia nemu orang Israel bisi Allah Taala,

⁴⁷lalu semua orang ditu deka nemu TUHAN ukai ngelepas ngena pedang tauka sangkuh, laban perang tu perang TUHAN, lalu Iya deka nyerahka kita ngagai jari kami.”

⁴⁸Lebuh Goliat angkat lalu mansang semak ngagai David, David lalu belanda ngagai rintai bala orang Pilistin, deka ngelaban Goliat.

⁴⁹David nyelukka jari iya ke dalam kambut iya, lalu ngambi sigi batu, ti ditimbakka iya ngena pangwang iya ngagai Goliat. Batu nya lalu kena kening Goliat, ngebuska kening iya. Goliat lalu rebah tetingkap.

⁵⁰ Nya meh gaya David ngalahka Goliat lalu munuh iya, ukai ngena pedang, tang ngena pangwang enggau batu! David nadai mai pedang.

⁵¹ David lalu belanda ngagai Goliat, bediri atas iya, nyintak pedang Goliat empu, mumpung pala iya, lalu munuh iya. Lebuh orang Pilistin meda bujang berani sida udah mati, sida lalu rari.

⁵²Bala orang Israel enggau orang Judah lalu manjung begagaika orang Pilistin nyentuk ngagai Gat[29] enggau nyentuk ngagai pintu penama nengeri Ekron. Orang Pilistin rebah bakal di serantau-rantau jalai ti nuju ngagai Saraim, nyentuk ngagai Gat enggau Ekron.

⁵³Lebuh orang Israel pulai begagaika orang Pilistin, sida ngerumpak kem orang Pilistin.

⁵⁴David ngambi pala Goliat, lalu mai pala nya ngagai Jerusalem, tang iya nyimpan senyata Goliat dalam langkau kain iya empu.

⁵⁵Lebuh Saul meda David mansang ngelaban Goliat, iya lalu nanya Abner, ti nyadi tuai soldadu iya, “Abner, anak sapa nembiak nya?” “Entah, enda aku nemu, Tuan Raja,” ku Abner nyaut.

⁵⁶“Alai nuan nanya ngagai orang,” ku Saul bejaku enggau Abner.

⁵⁷Nya alai, lebuh David pulai ngagai kem udah bekau iya ti munuh Goliat, Abner lalu mai iya ngagai Saul. David agi minching pala Goliat.

⁵⁸Saul lalu nanya iya, “Anak sapa nuan tu?” “Aku tu anak nembiak nuan Jesi ari Betlehem,” ku David nyaut.