Read Iban 1 Samuel 19 Bible Online

1 Samuel 19 - Iban bible

1 Samuel 19

¹Saul lalu bejaku enggau anak iya Jonatan, sereta enggau semua pemesai iya, ngasuh sida munuh David. Tang Jonatan balat rinduka David.

²Jonatan lalu madahka ngagai David, “Apai aku deka munuh nuan. Bejimat nuan pagila. Belalai ba endur ti enda ditemu orang, lalu diau dia.

³Aku deka bediri semak apai aku ba padang ti alai nuan belalai, lalu aku deka ngenang pasal nuan ngagai iya. Enti aku bisi tetemuka utai ari randau kami duai, aku deka madahka nya ngagai nuan.”

⁴Jonatan muji David di mua Saul, lalu ku iya, “Tuan, anang besalah David, laban iya nadai kala ngereja utai ti salah ngagai nuan. Semua utai ti udah dikereja iya sigi bisi guna magang ba nuan.

⁵Iya berambunka nyawa diri lebuh iya munuh Goliat, lalu TUHAN ngasuh orang Israel menang. Lebuh nuan meda nya, ati nuan gaga. Nya alai, nama kebuah nuan deka ngereja utai ti salah ngagai orang ke nadai penyalah, lalu deka munuh David enggau nadai kebuah?”

⁶Saul ngasika jaku Jonatan, lalu besumpah dalam nama TUHAN madahka diri enggai munuh David.

⁷Jonatan lalu ngangauka David, lalu madahka semua utai nya ngagai iya. Udah nya iya lalu mai David betemu enggau Saul. David lalu begulai enggau Saul baka ke dulu.

⁸Perang lalu nyadi baru. David lalu nyerang orang Pilistin, lalu munuh mayuh amat orang Pilistin, lalu sida rari ari iya.

⁹Udah nya roh ti jai ari TUHAN bekuasa ba Saul, lebuh iya benung duduk di rumah megai sangkuh iya, lalu David benung nebah belikan iya.

¹⁰Saul numbukka sangkuh iya ngagai David, tang David nyilat, lalu sangkuh nya lekat ba dinding. David lalu belanda rari.

¹¹ Malam nya Saul ngasuh sekeda bala iya nengkilaka rumah David, laban iya deka munuh David pagi hari siti. Tang Mikal, iya nya bini David, madahka ngagai David, “Enti nuan enda rari malam tu, nuan mati pagila.”

¹²Mikal lalu ngulurka David ari jenila ke tanah. David lalu belanda rari.

¹³Udah nya Mikal ngambi engkeramba sida sebilik, ngengkahka engkeramba nya ba peninduk David, lalu ngengkahka panggal ti digaga ari bulu kambin, ba pala engkeramba nya, lalu mungkur iya.

¹⁴Lebuh bala nembiak Saul datai deka ngambi David, Mikal lalu bejaku, “Iya sakit.”

¹⁵Tang Saul ngasuh sida mansang baru, ku iya, “Bai iya kitu ngena peninduk iya empu, ngambika aku munuh iya.”

¹⁶Lebuh sida tama, sida lalu tepedaka engkeramba ba peninduk nya, enggau panggal ti digaga ari bulu kambin ba pala engkeramba nya.

¹⁷Saul lalu nanya Mikal, “Nama kebuah nuan nipu aku baka tu, lalu ngelakka munsuh aku rari?” Disaut Mikal, “Iya madahka dirika munuh aku, enti aku enda nyaup iya rari.”

¹⁸David rari lalu mansang ngagai Samuel di Ramah, lalu madahka ngagai Samuel semua utai ti udah dikereja Saul ngagai iya. Udah nya David seduai Samuel mupuk ngagai Naiot, lalu diau dia.

¹⁹Orang lalu madahka ngagai Saul David bisi di Naiot, semak Ramah.

²⁰Nya alai iya lalu ngasuh orang nangkap David. Lebuh sida meda bala nabi betanda sereta benabi, diuluka Samuel, Roh Allah Taala lalu bekuasa ba bala nembiak Saul, lalu sida mega belabuh betanda sereta benabi.

²¹Lebuh orang madahka nya ngagai Saul, iya lalu ngirumka mayuh agi seruan iya. Sida nya mega belabuh betanda sereta benabi. Iya lalu ngirumka bala seruan ketiga kali. Sida nya mega betanda sereta benabi.

²²Udah nya, Saul empu mupuk ngagai Ramah. Lebuh iya datai ba telaga ti besai di Seku, iya lalu nanya ngagai orang endur alai Samuel seduai David diau. Orang lalu madahka ngagai iya, “Seduai nya di Naiot, di Ramah.”

²³Lebuh iya benung mansang ngagai Naiot di Ramah, Roh Allah Taala lalu bekuasa ba iya. Lalu lebuh iya benung bejalai, iya betanda sereta benabi, nyentuk ngagai iya datai di Naiot.

²⁴ Iya muka gari iya, lalu iya mega betanda sereta benabi di mua Samuel, garing-garing gali telanjai sehari-hari, semalam-malam nya. (Tu meh penatai jaku, “Kati Saul udah nyadi nabi?”)