Read Iban 1 Samuel 20 Bible Online

1 Samuel 20 - Iban bible

1 Samuel 20

¹Udah nya David rari ari Naiot, lalu mansang ngagai Jonatan. Iya lalu nanya, “Nama utai ti udah dikereja aku? Nama penyalah aku? Nama dosa ti udah dikereja aku ngagai apai nuan, datai ke nyau keran deka munuh aku?”

²Jonatan lalu nyaut David, “Nuan enda mati! Dinga nuan, apai aku enda ngereja utai sebedau iya madahka ngagai aku, nemuka utai nya besai tauka mit. Lalu iya nadai kebuah ngelalaika pekara tu ari aku.”

³Tang ku David nyaut,[31] “Apai nuan nemu nuan balat rinduka aku, lalu iya udah mutuska runding enggai nejuka nuan nemu utai ti deka dikereja iya, laban nya deka ngenusahka ati nuan. Aku besumpah madahka ngagai nuan dalam nama TUHAN ti idup, aku nyau deka mati!”

⁴Ku Jonatan madahka ngagai David, “Aku deka ngereja sebarang utai ti diasuh nuan.”

⁵ Disaut David, “Dinga nuan, Gawai Anak Bulan deka nyadi pagila, lalu aku enda tau enda makai sama enggau raja. Enti nuan besetuju, aku deka belalai ba padang datai ngagai lemai lusa.

⁶Enti apai nuan meda aku nadai ba mija nya, padahka ngagai iya, aku udah minta pemendar ari nuan begaut pulai ngagai Betlehem, laban tu maya semua kami sebilik ngenjuk piring ti diberi genap taun.

⁷Enti iya nyebut, ‘Enda ngawa,’ aku deka likun. Tang enti iya ringat, nuan deka nemu iya endang keras deka ngemediska aku.

⁸Nya alai, aku minta nuan ngereja nya ke aku, lalu ngamatka sempekat ti kudus ti udah digaga nuan enggau aku. Tang enti aku bisi salah, awakka nuan empu munuh aku, tang anang nyerahka aku ngagai apai nuan.”

⁹“Anang irau!” ku Jonatan nyaut. “Enti aku nemu apai aku udah mutuska runding deka munuh nuan, aku deka madahka nya ngagai nuan.”

¹⁰David lalu nanya, “Sapa orang ke deka madahka ngagai aku enti apai nuan ringat nyaut nuan?”

¹¹“Aram tua bejalai ngagai padang,” ku Jonatan nyaut. Seduai iya lalu mupuk,

¹²lalu ku Jonatan bejaku enggau David, “Awakka TUHAN Allah Taala ke disembah orang Israel nyadika saksi tua![32] Lebuh maya tu pagila, enggau lusa, aku deka nanya apai aku. Enti perangai iya manah ngagai nuan, aku deka mesanka nuan.

¹³Enti iya bisi ati deka ngemediska nuan, awakka TUHAN munuh aku, enti aku enda madahka nya ngagai nuan, lalu mai nuan kebukai ngagai endur ti likun. Awakka TUHAN meruan enggau nuan baka Iya ti udah enggau apai aku!

¹⁴Lalu enti aku agi mengkang idup, aku minta nuan ngayanka pengerindu TUHAN ngagai aku, ngambika aku enda mati.

¹⁵ Lalu pandangka penaluk nuan ngagai kami sebilik belama iya. Lebuh TUHAN udah ngeluska semua munsuh nuan,

¹⁶anang enda ingatka kami sebilik. Awakka TUHAN malas semua munsuh David.”

¹⁷Jonatan lalu ngasuh David besumpah baru madahka diri rinduka iya, laban Jonatan rinduka David baka iya ti rinduka diri empu.

¹⁸Udah nya Jonatan bejaku enggau iya, “Pagila Gawai Anak Bulan, nuan deka nyata nadai dia, laban kerusi nuan puang.

¹⁹Lusa orang deka lebih agi nemu nuan nadai datai! Nya alai, mupuk nuan ngagai endur alai nuan ke belalai suba, lalu belalai ari belakang tugung batu dia.[33]

²⁰Aku deka nimbakka tiga iti laja ngagai batu nya, ngeluluka diri baka ke nyelinting batu nya.

²¹Udah nya aku deka ngasuh ulun aku ngiga panah nya. Enti aku madahka ngagai iya, ‘Laja nya tunga kitu. Ambi iya,’ reti nya, nuan nadai utai ngawa, lalu tau pansut ari endur alai nuan ke belalai. Aku besumpah dalam nama TUHAN ti idup, nadai utai ulih nganu nuan.

²²Tang enti aku madahka ngagai iya, ‘Panah nya ngilah nuan kin agi,’ nuan enda tau enda mupuk, laban TUHAN ngasuh nuan mupuk.

²³Pasal semaya ti udah digaga tua enggau pangan diri, TUHAN deka nentuka tua ingatka semaya nya belama iya.”

²⁴Nya alai David lalu belalai di padang. Lebuh Gawai Anak Bulan nyadi, Raja Saul datai ngagai pengerami makai besai nya

²⁵lalu duduk ba endur alai iya ke duduk selama ngimbai dinding, lalu Jonatan duduk betunga mua enggau iya ari sepiak mija nya,[34] lalu Abner duduk ngimbai Saul, tang penuduk David puang,

²⁶Tang taja pia Saul nadai nyebut utai sehari nya, laban ku pikir iya, “Utai bisi udah nyadi ba iya ti ngasuh iya enda tuchi.”

²⁷Tang ba hari ti kedua, iya nya sehari udah bekau Gawai Anak Bulan, penuduk David mega puang. Saul lalu nanya Jonatan, “Nama kebuah David nadai datai makai kemari enggau sehari tu?”

²⁸Disaut Jonatan, “Iya udah minta aku ngemendarka iya mupuk ngagai Betlehem;

²⁹ku iya, ‘Awakka aku mupuk, laban kami sebilik deka meri piring ngagai TUHAN, lalu bala menyadi aku udah mesanka aku datai. Nya alai, enti nuan amat pangan aku, awakka aku mupuk betemu enggau kaban belayan aku.’ Nya kebuah iya nadai duduk ba endur iya ba mija Raja.”

³⁰Saul lalu pedis ati ngagai Jonatan, lalu ku iya bejaku ngagai Jonatan, “Nuan tu anak ti nadai guna! Diatu baru aku nemu nuan setanah enggau David, lalu ngemaluka diri empu sereta ngemaluka indai nuan!

³¹Seagi-agi David mengkang idup, nuan enda ulih nyadi raja menua tu. Nya alai, asuh orang ngambi iya lalu bai iya ngagai aku, laban iya enda tau enda mati.”

³²Jonatan lalu nyaut apai iya, Saul, “Nama kebuah iya enda tau enda mati? Nama utai ti udah dikereja iya?”

³³Ninga iya bejaku munyi nya, Saul lalu numbuk Jonatan ngena sangkuh iya, deka munuh iya. Nya baru Jonatan nemu apai iya amat keran deka munuh David.

³⁴Jonatan balat amat ringat, lalu angkat ari mija nya, lalu nadai makai utai sehari nya, iya nya ba hari ti kedua Gawai Anak Bulan nya. Ati iya balat tusah ke David, laban Saul udah mechat David.

³⁵Pagi hari siti Jonatan lalu mansang ngagai padang nya, deka betemu enggau David nitihka semaya seduai iya. Iya mai siku nembiak enggau iya,

³⁶lalu ku iya bejaku enggau nembiak nya, “Alai nuan belanda kin lalu giga laja ti deka ditimbakka aku.” Nembiak nya lalu belanda. Jonatan lalu nimbakka laja ngelui nembiak nya.

³⁷Lebuh nembiak nya datai ba endur alai laja nya udah labuh, Jonatan lalu ngangauka iya, “Laja nya jauh agi ari nya!

³⁸Anang bediri tegir-tegir ngapa! Jampat agi!” Nembiak nya lalu ngambi laja nya, lalu pulai baru ngagai tuan iya.

³⁹Tang iya enda nemu reti semua utai nya. Semina Jonatan seduai David aja nemu.

⁴⁰Jonatan lalu nyuaka senyata iya ngagai nembiak nya, lalu ngasuh iya mai senyata nya pulai ngagai nengeri.

⁴¹Lebuh nembiak nya udah mupuk, David angkat ari belakang tugung batu nya,[35] besugang, lalu nyungkurka diri ke tanah tiga kali. Seduai iya Jonatan sama nyabak lebuh seduai iya nyium pangan diri, tang David balat agi tusah ati ari Jonatan.

⁴²Jonatan lalu bejaku enggau David, “Allah Taala deka meruan enggau nuan. TUHAN deka nentuka tua, enggau peturun tua, deka ngingatka sempekat ti udah digaga tua enggau pangan diri.” David lalu mupuk, lalu Jonatan mulaika diri ngagai nengeri.