Read Iban 1 Samuel 21 Bible Online

1 Samuel 21 - Iban bible

1 Samuel 21

¹ David lalu mansang ngagai imam Ahimelek di Nop. Ahimelek nyau getar-getar mansang ngambat iya, lalu nanya, “Nama kebuah nuan datai ditu kediri?”

²“Aku datai ditu ari asuh raja,” ku David nyaut. “Iya enda ngasuh aku madahka ngagai orang utai ti diasuh iya kereja aku. Nyadi pasal bala aku, aku udah ngasuh sida betemu enggau aku ba endur siti.

³Kati nuan bisi bekal ke aku? Beri aku lima iti tuku roti, tauka sebarang utai bukai ti dikemisi nuan”

⁴Ku imam nya bejaku, “Aku nadai roti, semina roti ti kudus. Nuan tau ngambi roti nya, enti bala nuan nadai udah beleman enggau indu dalam dua tiga hari tu ti udah.”

⁵“Nadai sida udah ngereja nya,” ku David nyaut. “Bala aku endang semampai ngintu diri tuchi lebuh kami bejalai, anang kenang lebuh kami bejalai baka tu!”

⁶ Imam nya lalu meri roti ti kudus nya ngagai David, laban iya semina bisi roti ti udah diberi ngagai Allah Taala, ti udah dipindahka ari mija ti kudus nya, lalu diganti enggau roti ti baru. (

⁷Nyadi tuai orang ke ngibun jelu tupi Saul, ke benama Doek, ke asal ari Edom, enda mukai-mukai bisi dia sehari nya, ngereja pengawa pengarap ti enda tau enda dikereja iya.)

⁸Ku David bejaku enggau Ahimelek, “Kati nuan bisi sangkuh tauka pedang? Aku nadai mai pedang tauka senyata bukai, laban raja ngenyit ngasuh aku mupuk.”

⁹ Disaut Ahimelek, “Aku bisi pedang Goliat orang Pilistin, ke dibunuh nuan ba Lebak Elah. Pedang nya ari belakang epod, dibalut ngena kain. Enti nuan begunaka pedang nya, bai aja. Ka semina nya aja senyata ti bisi ditu.” Lalu ku David bejaku, “Beri nya ngagai aku. Nadai pedang ti manah agi ari nya!”

¹⁰David lalu mupuk, ngerarika diri ari Saul. Iya lalu mansang ngagai Raja Akis di Gat.

¹¹ Bala pemesai raja Akis lalu bejaku enggau raja, “Ukai enda iya tu David, ti nyadi raja di menua iya empu? Tu meh orang ke dikenang bala indu ngena lagu lebuh sida betanda, ‘Saul udah munuh beribu iku, tang David udah munuh bepuluh ribu iku.’ ”

¹² Leka jaku nya balat ngirauka ati David, lalu iya takut amat ke Raja Akis.

¹³ Nya alai di mua sida, iya ngaga diri baka ke gila. Lebuh sida deka masung iya, iya lalu jukat. Iya ngurik pintu penama nengeri nya, lalu nejuka liur iya rarat nurun ragum iya.

¹⁴Nya alai, ku Akis bejaku enggau bala pemesai iya, “Peda nya! Iya tu gila! Nama kebuah kita mai iya ngagai aku?

¹⁵Kati aku nadai chukup orang gila ditu? Nama kebuah kita mai siku agi orang gila ngagai rumah aku, lalu nejuka iya ngiruh aku ngena ulah ti tuyu?”