Read Iban 1 Samuel 22 Bible Online

1 Samuel 22 - Iban bible

1 Samuel 22

¹ David rari ari nengeri Gat, lalu mansang ngagai lubang gua Adulam. Lebuh bala menyadi iya enggau semua sida sebilik ninga iya bisi dia, sida lalu mansang ngagai iya.

²Orang ke kena tekan, tauka berutang, semua orang ke bisi utai ti ngasuh sida pedis ati, mansang ngagai iya, kira empat ratus iku semua sida, lalu iya nyadi tuai sida.

³Ari Gat David bejalai ngagai Mispah di menua Moap, lalu ku iya bejaku enggau raja menua Moap, “Aku minta nuan ngelakka apai enggau indai aku datai lalu diau enggau nuan, nganti aku udah nemu utai ti deka dikereja Allah Taala ke aku.”

⁴Nya alai David ninggalka apai indai iya enggau raja menua Moap. Seduai iya diau dia sekumbang David ke belalai dalam lubang gua.

⁵Udah nya, nabi Gat datai ngagai David lalu bejaku, “Anang diau ditu. Mupuk nuan diatu ngagai menua Judah.” David mupuk, lalu mansang ngagai utan Heret.

⁶Nyadi sekali lebuh Saul di Gibe-ah, iya duduk di baruh sebatang kayu tamaris ba sigi munggu, megai sangkuh, dikelingi bala pemesai iya. Orang lalu madahka ngagai iya David enggau bala iya udah ditemu.

⁷Ku iya bejaku ngagai bala pemesai iya, “Kita orang Benjamin, pendingka tu ulih kita! Kati kita ngumbai David deka meri umai enggau kebun anggur ngagai semua kita, lalu ngaga kita nyadi pemesai ke bala soldadu iya?

⁸Kati nya kebuah kita bepekat ngelaban aku? Siku pen nadai ga kita deka madahka ngagai aku pasal anak aku empu ti udah setanah enggau David. Siku pen nadai ga kita deka ibuhka aku, tauka madahka pasal David, siku ari bala soldadu aku empu ke benung ngiga peluang munuh aku, enggau pasal anak aku ke meransang iya!”

⁹ Nyadi Doek bisi bediri dia begulai enggau bala pemesai Saul, lalu ku iya bejaku, “Aku bisi meda David mansang ngagai Ahimelek anak Ahitup di Nop.

¹⁰Ahimelek nanya ngagai TUHAN utai ti patut dikereja David. Udah nya iya lalu meri David bekal, enggau pedang Goliat orang Pilistin.”

¹¹Raja Saul lalu mesanka Imam Ahimelek enggau semua kaban belayan iya ke sama nyadi imam di Nop. Sida lalu betemu enggau Saul.

¹²Ku Saul bejaku enggau Ahimelek, “Pendingka tu ulih nuan, Ahimelek!” “Tuan,” ku Ahimelek nyaut.

¹³Saul lalu nanya iya, “Nama kebuah nuan enggau David bepekat ngelaban aku? Nama kebuah nuan meri iya bekal enggau pedang, lalu betanya ngagai Allah Taala ngarika iya? Diatu iya udah nguing ngelaban aku, lalu nganti peluang alai iya munuh aku!”

¹⁴Ku Ahimelek nyaut, “David nya pemesai ke pemadu tetap ati ngagai nuan! Iya menantu nuan. Iya tuai soldadu ke nyaga nuan. Lalu iya endang dibasa semua orang ke bekereja di istana raja.

¹⁵Aku amat bisi betanya ngagai Allah Taala ngarika iya, lalu nya ukai terubah iya aku ngereja nya.[36] Nyadi pasal bepekat ngelaban nuan, Tuan Raja enda tau nuduhka aku tauka orang bukai ari ruang bilik aku. Aku nadai nemu pasal pekara tu!”

¹⁶Ku raja, “Ahimelek, nuan enggau semua kita sekaban enda tau enda dibunuh magang.”

¹⁷Iya lalu bejaku enggau jejaga ke bediri semak iya, “Bunuh bala imam TUHAN! Sida udah bepekat enggau David, lalu sida enda madahka pasal iya ke rari, taja pen sida nemu nya kenyau ari pun.” Tang jejaga nya enggai ngangkatka jari munuh imam TUHAN.

¹⁸Saul lalu bejaku enggau Doek, “Bunuh sida!” Doek lalu munuh semua sida. Dalam sehari nya iya munuh lapan puluh lima iku imam. Semua sida nya tau mai epod magang.

¹⁹Saul mega ngasuh semua orang ke diau di Nop, iya nya nengeri ti alai imam nya diau, dibunuh magang, nyengkaum orang ke lelaki, sida ke indu, bala nembiak enggau anak mit, jelu sapi, keledai enggau jelu bedus. Semua sida dibunuh magang.

²⁰Tang Abiatar, siku ari bala anak lelaki Ahimelek, rari lalu mansang ngagai David.

²¹Iya madahka ngagai David chara Saul udah munuh bala imam TUHAN.

²²Ku David bejaku enggau iya, “Lebuh aku meda Doek bisi dia sehari nya, aku nemu iya deka madahka utai ngagai Saul. Nya alai, aku betanggungjawapka pemati semua kaban belayan nuan.

²³Diau enggau aku. Anang takut. Saul bisi ati deka munuh tua, tang nuan deka likun enti nuan diau enggau aku.