Read Iban 1 Samuel 23 Bible Online

1 Samuel 23 - Iban bible

1 Samuel 23

¹Orang lalu madahka ngagai David, “Dinga nuan, orang Pilistin nyerang nengeri Keilah, lalu ngenchuri gandum ti baru udah diketau.”

²David lalu betanya ngagai TUHAN, “Kati tau aku mansang lalu nyerang orang Pilistin?” “Tau,” ku TUHAN nyaut. “Serang meh sida, lalu lepaska Keilah.”

³Tang ku bala David bejaku enggau iya, “Dinga nuan, indah di menua Judah tu deh kitai takut. Kitai tentu deka balat agi takut enti kitai mansang ngagai Keilah lalu nyerang bala soldadu orang Pilistin din.”

⁴David lalu betanya baru ngagai TUHAN, lalu ku TUHAN bejaku ngagai iya, “Mupuk nuan lalu serang Keilah, laban Aku deka ngasuh nuan menang ngelaban orang Pilistin.”

⁵Nya alai David enggau bala iya mansang ngagai Keilah, lalu nyerang orang Pilistin. Sida munuh mayuh amat orang Pilistin, lalu ngerampas jelu tupi sida. Nya meh jalai David ngelepaska nengeri nya ari kuasa munsuh.

⁶Lebuh Abiatar anak Ahimelek rari lalu mansang ngagai bala David di Keilah, iya bisi mai epod.

⁷Orang lalu madahka ngagai Saul pasal David ti udah mansang ngagai Keilah. Ku Saul, “Allah Taala udah nyerahka iya ngagai jari aku. David udah tepekul, laban iya tama ngagai nengeri ti bekuta, ti bisi pintu ti kukuh.”

⁸Saul lalu nguluka bala soldadu iya nyerang Keilah, lalu ngelulung David enggau bala iya.

⁹Lebuh David ninga Saul bekira deka nyerang iya, iya lalu bejaku enggau Imam Abiatar, “Bai epod nya kitu.”

¹⁰Lalu ku iya bejaku, “TUHAN Allah Taala ke disembah orang Israel, aku bisi ninga Saul deka datai di Keilah, lalu ngerusak nengeri tu, ketegal aku, ke nembiak Nuan.

¹¹Kati orang di Keilah deka nyerahka aku ngagai Saul? Kati Saul amat deka datai, munyi ti didinga aku? TUHAN Allah Taala ke disembah orang Israel, aku minta Nuan nyaut aku!” Ku TUHAN nyaut, “Saul deka datai.”

¹²“Kati orang Keilah deka nyerahka aku enggau bala aku ngagai Saul?” ku David nanya baru. “Sida deka,” ku TUHAN nyaut.

¹³Nya alai David enggau bala iya, kira enam ratus iku semua sida, lalu tekala nya angkat ari Keilah, lalu rari ngagai sebarang endur ti deka digusung sida. Lebuh Saul ninga David udah rari ari Keilah, iya lalu badu agi nyerang David.

¹⁴David belalai di menua ti bebukit, di menua puang semak Sip. Saul endang seruran nguji ngiga David, tang Allah Taala enda nyerahka David ngagai jari iya.

¹⁵David bisi di Hores, di menua puang semak Sip, lebuh iya ninga Saul deka datai munuh iya.

¹⁶Jonatan anak Saul mupuk lalu betemu enggau David di Hores; iya meransang David lebuh David madahka ngagai iya pasal Allah Taala ti deka nyaga David.

¹⁷Ku Jonatan bejaku enggau David, “Anang takut. Apai aku Saul enda ulih ngemediska nuan. Iya sigi nemu nuan deka nyadi raja orang Israel, lalu aku deka nyadi lumur dua nuan.”

¹⁸ Seduai iya lalu ngaga siti sempekat di mua TUHAN; David diau di Hores, lalu Jonatan pulai ke rumah.

¹⁹ Sekeda orang ari Sip betemu enggau Saul di Gibe-ah, lalu ku sida, “David belalai di menua kami di Hores, ba Bukit Hakilah, di selatan menua puang Judea.

²⁰Tuan Raja, kami nemu pemendar nuan ke nguji nangkap iya. Nya alai, manah nuan datai ngagai menua kami. Kami deka nentuka nuan ulih nangkap iya.”

²¹Disaut Saul, “Awakka TUHAN merekatka kita, laban kita udah manah enggau aku!

²²Mupuk meh kita lalu tentuka utai nya sekali agi. Giga endur alai iya, lalu giga orang ke udah meda iya dia. Aku ninga iya pintar amat.

²³Giga endur alai iya belalai, lalu padahka ngagai aku tekala nya. Nya baru aku deka bejalai enggau kita, lalu enti iya agi di menua nya, aku deka ngiga iya, nyengkaum di serata menua Judah.

²⁴Nya alai sida angkat lalu pulai ngagai Sip, dulu ari Saul. Nyadi David enggau bala iya bisi di menua puang Maon, ba lebak siti ti nadai orang nguan, di selatan menua puang Judea.

²⁵Saul enggau bala iya lalu angkat begigaka David. Tang lebuh David ninga nya, iya lalu mupuk ngagai menua ti bebukit ti bebatu di menua puang Maon, lalu diau dia. Lebuh Saul ninga nya, iya lalu nitihka David.

²⁶Saul enggau bala iya diseraraka bukit sigi ari bala David. David enggau bala iya lalu beguai-guai rari ari Saul, lebuh bala Saul nyau deka ngelikupka bala David.

²⁷Lebuh maya nya siku seruan datai, lalu bejaku enggau Saul, “Pulai diatu, laban orang Pilistin nyerang menua kitai!”

²⁸Saul lalu enda nyadi nitihka David; iya lalu nyerang orang Pilistin. Nya kebuah endur nya dikumbai “Bukit Alai Beserara.”

²⁹David angkat ari endur nya lalu belalai di menua En-gedi.