Read Iban 1 Samuel 24 Bible Online

1 Samuel 24 - Iban bible

1 Samuel 24

¹Lebuh Saul pulai beperang ngelaban orang Pilistin, orang bisi madahka ngagai iya pasal David ke bisi di menua puang semak En-gedi.

²Saul lalu mai tiga ribu iku soldadu ke pemadu kering ari menua Israel, lalu mupuk begigaka David enggau bala iya tunga ke timur Batu Kambin Babas.

³ Iya datai ba siti lubang gua ti semak kandang bedus, ngimbai jalai raya, lalu tama ngagai lubang gua nya, deka bira. Nyadi David enggau bala iya bisi belalai ba buntut lubang gua nya.

⁴Ku sida bejaku enggau David, “Tu peluang nuan! TUHAN udah madahka Iya deka nyerahka munsuh nuan ngagai jari nuan, lalu nuan tau ngereja sebarang utai ti dikedekaka nuan ngagai iya.” David nyubuk Saul, lalu belalai netak puting baju panjai iya.

⁵Tang David belabuh enda nyamai ati,

⁶ lalu ku iya bejaku enggau bala iya, “Awakka TUHAN nagang aku ngemediska tuan aku, ti udah dipilih TUHAN nyadi raja! Mimit pen enda meh aku tau ngemediska iya, laban iya raja ti udah dipilih TUHAN!”

⁷Ngena jaku nya David ulih nguingka ati bala iya, lalu iya enda nyagi sida ngamuk Saul. Saul angkat, ninggalka lubang gua nya, lalu mupuk.

⁸Udah nya David pansut ari lubang gua nya, lalu ngangauka Saul, “Tuan Raja!” Lebuh Saul malik kebelakang, David lalu nyungkurka diri ke tanah masa Saul.

⁹David lalu bejaku ngagai Saul, ku iya, “Nama kebuah nuan mendingka orang ke ngumbai aku nguji ngemediska nuan?

¹⁰Dinga nuan, sehari tu nuan udah meda jalai TUHAN nyerahka nuan ngagai jari aku dalam lubang gua tu. Sekeda orang ari bala aku ngasuh aku munuh nuan, tang aku enggai munuh nuan. Aku bejaku ngagai bala aku madahka aku enda tau sekali-kali ngemediska nuan, laban nuan udah dipilih TUHAN nyadi raja.

¹¹Apai, peda nuan puting baju panjai nuan tu! Aku ulih munuh nuan, tang aku semina netak puting baju panjai nuan, lalu enda munuh nuan. Nuan patut nemu aku nadai ati deka ngelaban nuan. Aku nadai bedosa ngelaban nuan, taja pen nuan begagaika aku, deka munuh aku.

¹²Awakka TUHAN ngakim entara tua! Awakka Iya malas nuan ngarika aku; tang aku sigi enggai ngelaban nuan.

¹³Munyi ti disebut Jaku-dalam, ‘Orang ke jai mansutka penyai.’ Tang aku enggai ngelaban nuan.

¹⁴ Sapa ke digagai raja orang Israel? Begagaika bangkai ukui? Begagaika empiras?

¹⁵Awakka TUHAN ngakim, lalu meri atur sapa tua ke salah. Awakka Iya meratika pekara tu, nyaga aku, lalu ngelepaska aku ari jari nuan.”

¹⁶Lebuh David udah bejaku, Saul lalu bejaku, “Kati nya amat nuan, David, anak?” Iya lalu belabuh nyabak.

¹⁷Udah nya iya lalu bejaku ngagai David, “Nuan endang amat lurus agi ari aku, laban nuan udah malas penyai aku ngena pemanah, tang aku udah malas nuan ngena penyai.

¹⁸Sehari tu nuan udah mandangka pemanah nuan ngagai aku, laban nuan enda munuh aku, taja pen TUHAN udah nyerahka aku ngagai jari nuan.

¹⁹Laban lebuh orang tetemuka munsuh, iya enda nejuka munsuh nya idup. Nya alai awakka TUHAN meri upah ti manah ngagai nuan ketegal utai ti udah dikereja nuan ngagai aku sehari tu.

²⁰Diatu baru aku nemu nuan deka nyadi raja, lalu menua Israel deka diserahka ngagai jari nuan.

²¹Nya alai aku minta nuan besumpah di mua TUHAN, enda munuh uchu-ambu aku, ngambika waris kami sebilik enda putus.”

²²David lalu ngaga sumpah nya. Udah nya Saul pulai ke rumah, lalu David enggau bala iya pulai ngagai endur alai sida ke belalai.