Read Iban 1 Samuel 25 Bible Online

1 Samuel 25 - Iban bible

1 Samuel 25

¹Samuel mati, lalu semua orang Israel begempuru magang ngulitka iya, lalu sida nguburka iya ba rumah iya di Ramah. David angkat lalu mupuk ngagai menua puang Paran.

²Nyadi di Maon bisi orang siku benama Nabal. Nabal tu ari raban peturun Kalep. Iya bisi tanah semak nengeri Karmel. Nabal tu kaya bendar. Iya bisi tiga ribu iku jelu bedus, enggau seribu iku kambin. Bini iya Abigail bajik sereta tajam berunding, tang Nabal nya orang ke jai perangai sereta lengkar.

⁴Lebuh David di menua puang, iya ninga pasal Nabal ke ngukur bedus iya.

⁵Nya alai David ngasuh sepuluh iku nembiak iya mansang ngagai Nabal di Karmel. Ku David bejaku enggau sida, “Mansang kita ngagai Nabal di Karmel, lalu beri tabi basa ari aku ngagai iya.

⁶Sebut ngagai iya: ‘David ngirumka pesan tabi basa ngagai nuan. Iya ngajihka nuan enggau kita sebilik, enggau semua bala nuan bela gerai nyamai magang.

⁷Iya bisi ninga pasal nuan ke ngukur jelu bedus, lalu iya madahka ngagai nuan, bala pengibun bedus nuan udah bisi begulai enggau kami, lalu kami nadai ngachau sida, lalu nadai kala ngenchuri utai sida sekumbang sida di Karmel.

⁸Tanya sida empu lalu sida deka madahka ngagai nuan. David mega minta nuan nyambut bala kami enggau manah, laban kami deka datai kitu lebuh maya gawai, laban pangan nuan David enggau kami ke nembiak nuan, minta beri nuan makai.’ ”

⁹Lebuh bala David datai, sida lalu nyebut semua pesan David ngagai Nabal. Udah nya sida lalu nganti.

¹⁰Ku Nabal nyaut bala David, “Sapa David? Nadai aku kala ninga nama nya! Diatu mayuh amat ulun rari ninggalka tuan sida.

¹¹Kati aku patut mai roti enggau ai aku, enggau dagin jelu ti udah disayat aku ke bala orang ke ngukur bedus aku, lalu meri utai nya ngagai orang ke enda ditemu aku penatai?”

¹²Bala David lalu pulai, lalu madahka ngagai iya semua utai nya.

¹³David lalu bejaku ngagai bala iya, “Tangkin pedang kita!” Semua sida lalu nangkin pedang magang. David mega nangkin pedang iya; kira empat ratus iku orang nitihka David. Iya ninggalka dua ratus iku ngibun bekal sida.

¹⁴Tang siku ari bala Nabal bejaku enggau bini Nabal, Abigail, “Dinga nuan, David bisi ngirumka bala seruan ari menua puang mai pesan tabi basa ngagai tuan kami, lalu iya ngeleseka sida,

¹⁵taja pen bala orang tu udah manah amat enggau kami, sida nadai kala ngachau kami, lalu nadai kala ngenchuri utai kami sekumbang kami ke begulai enggau sida.

¹⁶Sida nyaga kami siang malam, sekumbang kami ke begulai enggau sida, lebuh kami ngibun bedus kitai.

¹⁷Nya alai nuan enda tau enda nemu tu, lalu bekiraka utai ti patut dikereja; laban penusah ti besai deka ninggang tuan kami enggau ruang bilik iya. Iya kelalu jai perangai datai ke nadai siku orang ulih bejaku enggau iya.”

¹⁸Abigail lalu beguai-guai ngambi dua ratus iti tuku roti, dua iti kambut ti penuh laban wain, lima iku bedus ti udah disediaka, tujuh belas kilogram kemping, seratus iti gupung buah anggur ti udah disalai, enggau dua ratus igi roti buah ara, lalu ngundanka semua utai nya ba berapa iku keledai.

¹⁹Udah nya iya bejaku enggau bala orang gaji iya, “Kita bejalai dulu. Lagi aku nitihka kita.” Tang iya enda madahka nya ngagai laki iya Nabal.

²⁰Lebuh iya nepan keledai iya musin serimbing bukit, David, enggau bala iya mansang ngagai iya, lalu iya betemu enggau sida.

²¹Nyadi David udah bejaku, “Lebu ngapa aku udah nyaga utai orang tu di menua puang tu. Utai iya nadai kena churi; lalu iya malas pemanah aku ngena penyai.

²²Awakka Allah Taala munuh aku[37] enti aku enda munuh semua bala orang nya sebedau rerak tawas pagila!”

²³Lebuh Abigail meda David, iya lalu beguai-guai nurun ari keledai iya, lalu nyungkurka diri ke tanah

²⁴semak kaki David, lalu bejaku enggau iya, “Tuan, aku minta nuan mendingka aku! Awakka penyalah nya ninggang aku.

²⁵Anang bedulika Nabal ti nadai guna nya! Reti nama iya nya beli lalu iya empu endang beli![38] Lebuh bala ke dikirumka nuan datai, aku nadai betemu enggau sida.

²⁶TUHAN Empu ti udah nagang nuan malas lalu munuh munsuh nuan. Nya alai, diatu aku besumpah dalam nama Allah Taala ti idup, awakka munsuh nuan enggau semua orang ke deka ngemediska nuan, diukum baka Nabal.

²⁷Nyadi diatu awakka pemeri ti udah dibai aku ngagai nuan, tuan, diberi ngagai bala nuan.

²⁸Aku minta nuan, tuan, ngampun penyalah aku; laban TUHAN tetap deka ngaga nuan, enggau peturun nuan, nyadi raja, laban nuan beperang ngarika TUHAN. Lalu nadai penusah deka ninggang nuan sepemanjai umur nuan.

²⁹Enti orang angkat ngelaban nuan, begagaika nuan, lalu nguji munuh nuan, TUHAN Allah Taala nuan deka nyaga nuan, baka ke nyaga pesaka ti berega. Tang bala munsuh nuan deka dibuai TUHAN, baka ke nikauka batu ngena pangwang.

³⁰Lalu lebuh TUHAN udah ngereja semua utai ti manah ti udah disemaya Iya ngagai nuan, lalu udah ngaga nuan nyadi raja menua Israel,

³¹nuan nadai agi kebuah tusah tauka nesal ati ketegal nuan udah munuh orang enggau nadai kebuah, tauka ngiga balas. Lalu lebuh TUHAN udah merekatka nuan, tuan, anang enda ingatka aku.”

³²David lalu bejaku enggau Abigail, “Puji TUHAN Allah Taala ke disembah orang Israel ti udah ngasuh nuan betemu enggau aku sehari tu!

³³Awakka Allah Taala merekatka nuan, laban sehari tu nuan udah nagang aku munuh orang, sereta nagang aku malas ngena jari aku empu.

³⁴TUHAN udah nagang aku ngemediska nuan. Tang aku besumpah dalam nama Allah Taala ke disembah orang Israel ti idup, enti nuan enda udah jampat betemu enggau aku, semua bala Nabal tetap mati magang tumu pagila!”

³⁵Udah nya David lalu nyambut ari Abigail utai ti dibai Abigail ngagai iya. Lalu ku iya bejaku enggau Abigail, “Pulai meh nuan enggau selamat. Aku udah mendingka nuan, lalu aku udah ngereja utai ti dipinta nuan.”

³⁶Abigail lalu pulai ngagai Nabal, ke benung rami makai besai baka raja. Nabal balat amat ngelantangka diri, laban iya mabuk, sereta bebuti enggau orang. Nya alai Abigail enda madahka utai ngagai iya nyentuk ngagai pagi hari siti.

³⁷Pagi hari siti, lebuh Nabal udah gerai mabuk, Abigail lalu madahka semua utai nya ngagai iya. Iya lalu mati tubuh, lalu enda ulih engkebut.

³⁸Kira sepuluh hari udah bekau nya, TUHAN munuh Nabal, lalu iya mati.

³⁹Lebuh David ninga Nabal udah mati, iya lalu bejaku, “Puji TUHAN ti udah malas Nabal laban Nabal udah ngeleseka aku, lalu udah nagang aku ngereja utai ti salah. TUHAN udah ngukum Nabal ketegal penyai ti udah dikereja iya empu.” Udah nya David lalu ngirumka pesan minta Abigail jadi enggau iya.

⁴⁰Lebuh bala orang gaji David betemu enggau Abigail di Karmel, sida lalu nyebut ngagai iya, “David udah ngasuh kami betemu enggau nuan, lalu mai nuan nyadika bini iya.”

⁴¹Abigail lalu nyungkurka diri ke tanah, lalu bejaku, “Aku tu ulun iya. Aku sedia deka masu kaki bala orang gaji iya.”

⁴²Iya lalu beguai-guai angkat, lalu nepan keledai iya, disempulang lima iku orang gaji iya, mupuk enggau bala orang gaji David, lalu nyadi bini David.

⁴³David udah mega jadi enggau Ahinoam ari Jesril. Diatu Abigail seduai Ahinoam sama nyadika bini iya.

⁴⁴ Laban Saul udah meri anak indu iya Mikal, ti udah nyadi bini David, ngagai Palti anak Lais, ke datai ari nengeri Galim.