Read Iban 1 Samuel 26 Bible Online

1 Samuel 26 - Iban bible

1 Samuel 26

¹ Sekeda orang ari Sip datai ngagai Saul di Gibe-ah, lalu madahka ngagai iya pasal David ke belalai ba Bukit Hakilah, ba tisi menua puang menua Judea.

²Saul lalu angkat tekala nya, lalu mansang ngagai menua puang Sip, mai tiga ribu iku bala soldadu ke pemadu kering di menua Israel, ngiga David.

³Iya lalu nirika kem ba tisi jalai ba Bukit Hakilah. Tang David mengkang diau di menua puang, lalu lebuh iya ninga Saul nyau deka datai ngiga iya,

⁴iya lalu ngasuh bala pematau nentuka Saul amat bisi dia.

⁵David lalu mupuk ngagai endur alai Saul udah nirika kem iya, lalu David tepedaka endur alai Saul tinduk enggau Abner anak Ner, ti nyadi tuai soldadu. Saul tinduk dalam kem nya, dikelingi bala soldadu iya.

⁶Udah nya David lalu nanya ngagai Ahimelek, orang Iti, enggau ngagai menyadi Joap, Abisai anak Seruiah, “Sapa deka enggau aku mansang ngagai kem Saul?” “Aku,” ku Abisai nyaut.

⁷Nya alai, malam nya David seduai Abisai mansang ngagai kem Saul, lalu nemu Saul tinduk dalam kem nya. Sangkuh iya diunjamka iya ba tanah semak puchuk pala iya; lalu Abner enggau bala soldadu tinduk ngelingi iya.

⁸Ku Abisai bejaku enggau David, “Allah Taala udah nyerahka munsuh nuan ngagai jari nuan malam tu. Awakka aku ngentumka sangkuh iya empu ngagai iya, sekali aja, enda ibuh ditandu.”

⁹Tang ku David bejaku ngagai Abisai, “Anang munuh iya, laban TUHAN deka ngukum orang ke ngenataika jari ba raja ti udah dipilih Iya.”

¹⁰Lalu ku David, “Aku besumpah dalam nama TUHAN ti idup, TUHAN Empu deka munuh iya, nemuka lebuh iya mati tuai, tauka mati beperang.

¹¹ TUHAN enda ngasuh aku ngenataika jari ngagai orang ke udah ditata TUHAN nyadi raja! Tang awakka tua semina ngambi sangkuh enggau tepayan ai iya, lalu mupuk ari tu.”

¹²David lalu ngambi sangkuh, enggau tepayan ai ari semak pala Saul; lalu seduai iya mupuk. Nadai orang meda tauka nemu utai nya udah nyadi, tauka tedani; laban TUHAN udah ngasuh semua sida tinduk jenak magang.

¹³David lalu meraka ke seberai, lalu bediri ba tuchung bukit, jauh ari Saul.

¹⁴David lalu ngangauka bala soldadu Saul, enggau Abner, ku iya, “Abner! Kati nuan ulih ninga aku?” Abner lalu nyaut, “Sapa nuan nya ke ngangauka raja?”

¹⁵David lalu nyaut, “Abner, kati nuan ukai anak lelaki? Sapa orang bisi baka nuan di menua Israel? Nya alai nama kebuah nuan enda nyaga raja nuan? Laban siku orang udah tama ngagai kem kita, deka munuh tuan nuan.

¹⁶Utai ti dikereja nuan nya enda manah. Aku besumpah dalam nama TUHAN ti idup, nuan patut diukum bunuh, laban nuan enda nyaga tuan nuan, ti udah ditata TUHAN. Uji peda nuan diatu, dini alai sangkuh raja enggau tepayan ai ti ngimbai pala iya?”

¹⁷Saul ngelala munyi nyawa David, lalu iya nanya, “David, kati nya nuan, anak?” “Aku meh tu, Tuan Raja,” ku David nyaut.

¹⁸Lalu ku David bejaku, “Tuan, nama kebuah nuan begagaika nembiak nuan? Nama utai ti udah dikereja aku ngagai nuan? Nama penyalah aku?

¹⁹Nya alai awakka Tuan Raja, mendingka jaku aku. Enti sema TUHAN udah nyungkak nuan ngelaban aku, awakka Iya nerima siti piring; tang enti nuan disungkak mensia, awakka orang nya kena sumpah di mua TUHAN, laban sida sehari tu udah muru aku ari menua TUHAN, lalu ngasuh aku nyembah petara orang bansa bukai.

²⁰Nya alai, anang munuh aku jauh ari TUHAN; laban raja orang Israel keras deka munuh aku, baka ke ngasu burung ba sebelah bukit.”

²¹Disaut Saul, “Aku udah salah. Pulai kitu, David, anak aku, laban aku enggai agi ngemediska nuan, laban nuan sayauka nyawa aku sehari tu. Dinga nuan, aku udah beli, lalu udah ngereja utai ti balat jai!”

²²Disaut David, “Tu sangkuh nuan, Tuan Raja. Asuh siku ari bala nuan mansang kitu, ngambi sangkuh tu.

²³TUHAN ngupah genap iku orang ke tetap ati sereta lurus; laban sehari tu TUHAN udah nyerahka nuan ngagai jari aku, tang aku enda ngenataika jari ngagai orang ke udah ditata TUHAN.

²⁴Dinga nuan, laban sehari tu aku udah sayauka nyawa nuan, awakka TUHAN mega sayauka nyawa aku, lalu awakka Iya ngelepaska aku ari semua penusah.”

²⁵Lalu ku Saul bejaku enggau David, “Beberekat meh nuan, David, anak aku! Nuan deka ngereja mayuh macham utai, lalu nuan deka mujur dalam semua utai nya.” David mupuk, lalu Saul pulai ke rumah.