Read Iban 1 Samuel 28 Bible Online

1 Samuel 28 - Iban bible

1 Samuel 28

¹Nyau kelama udah bekau nya, orang Pilistin ngempuruka bala soldadu sida, deka nyerang orang Israel, lalu ku Akis bejaku enggau David, “Nuan nemu, nuan enggau bala nuan, deka enggau aku mansang beperang.”

²Ku David bejaku enggau Akis, “Barang ku jaku; ila baru nuan meda jamah aku.” Lalu ku Akis bejaku enggau David, “Manah nya! Aku deka ngasuh nuan nyadi jejaga aku seumur idup.”

³ Lebuh maya nya Samuel endang udah mati. Lalu semua orang Israel udah ngulit lalu nguburka iya di nengeri iya empu di Ramah, lalu Saul endang udah muru semua orang ke tau tujum enggau semua manang ari menua Israel.

⁴Bala soldadu orang Pilistin begempuru lalu nirika kem sida di Sumen. Saul lalu ngempuruka orang Israel lalu nirika kem ba Bukit Gilboa.

⁵Lebuh Saul meda bala soldadu orang Pilistin, iya balat takut.

⁶ Lalu lebuh Saul betanya ngagai TUHAN, TUHAN enda nyaut iya, nemuka dalam mimpi, tauka ngena Urim enggau Tumim, tauka ngena[39] nabi.

⁷Udah nya Saul lalu bejaku enggau bala pemesai iya, “Giga siku indu ke tau tujum, ngambika aku betanya ngagai iya.” “Bisi siku di Endor,” ku sida nyaut iya.

⁸Saul lalu nukar gari diri, kena iya nyaru diri baka gamal orang bukai. Lebuh hari nyau petang, iya mai dua iku orang ari bala iya, lalu mansang betemu enggau indu nya. “Tanyaka ngagai semengat orang ke udah mati, lalu padahka ngagai aku utai ti deka nyadi,” ku iya bejaku enggau indu nya. “Kangauka semengat orang ke disebut aku nama.”

⁹Ku indu nya nyaut, “Nuan tentu nemu utai ti udah dikereja Saul, pasal iya ke muai semua orang ke tau tujum, enggau sida manang ari menua Israel. Nya alai, nama kebuah nuan deka manjuk aku, lalu ngasuh aku diukum bunuh?”

¹⁰Udah nya Saul lalu besumpah. “Aku besemaya dalam nama TUHAN ti idup, nuan enda kena ukum ketegal utai tu,” ku iya madahka ngagai indu nya.

¹¹ “Sapa orang ke patut dikangauka aku?” ku indu nya nanya. “Samuel,” ku Saul nyaut.

¹²Lebuh indu nya meda Samuel, iya nyerauh, lalu bejaku enggau Saul, “Nama kebuah nuan nipu aku? Nuan tu Raja Saul!”

¹³“Anang takut!” ku Saul bejaku enggau iya. “Nama utai ti dipeda nuan?” “Aku meda semengat siku orang pansut ari dalam tanah,” ku indu nya nyaut.

¹⁴“Baka ni ku gamal semengat orang nya?” ku Saul nanya. “Orang nya tuai,” ku indu nya nyaut. “Iya ngena siti baju ti panjai.” Nya baru Saul nemu orang nya Samuel. Iya lalu nyungkurka diri ke tanah, masa iya.

¹⁵Ku Samuel bejaku enggau Saul, “Nama kebuah nuan ngachau aku, lalu ngasuh aku pulai baru?” Disaut Saul, “Aku balat kena laban penusah! Orang Pilistin nyerang aku, lalu Allah Taala udah ninggalka aku. Iya nadai agi nyaut aku, nemuka ngena sida nabi tauka ngena mimpi. Nya alai aku ngangauka nuan, minta nuan madahka utai ti patut dikereja aku.”

¹⁶Ku Samuel bejaku, “Nama kebuah nuan ngangauka aku lebuh TUHAN udah ninggalka nuan, lalu nyadi munsuh nuan?

¹⁷ TUHAN udah ngereja ngagai nuan, utai ti diasuh Iya padahka aku ngagai nuan. Iya udah ngambi perintah ari jari nuan, lalu udah meri perintah nya ngagai David.

¹⁸ Nuan enda ngasika pesan TUHAN, lalu enda ngeluska orang Amalek, sama enggau semua utai ti dikembuan sida. Nya kebuah TUHAN ngereja utai tu ngagai nuan diatu.

¹⁹Iya deka nyerahka nuan enggau orang Israel ngagai orang Pilistin. Pagila nuan enggau bala anak nuan deka begulai enggau aku, lalu TUHAN mega deka nyerahka bala soldadu orang Israel ngagai orang Pilistin.”

²⁰Saul lalu tekala nya rebah lalu garing-garing ba tanah, laban iya takutka utai ti udah disebut Samuel. Iya lembut tulang, laban iya nadai makai utai sehari nya, enggau semalam-malam nya.

²¹Indu nya lalu mansang ngagai iya, lalu lebuh iya meda Saul balat amat takut, iya lalu bejaku enggau Saul, “Tuan, aku berambunka nyawa ngereja utai ti diasuh nuan.

²²Aku diatu minta nuan ngereja utai ti dipinta aku; awakka aku nyendiaka pemakai ke nuan. Nuan enda tau enda makai, ngambika nuan ulih bejalai.”

²³Saul lalu madahka diri enggai makai, ku iya, “Aku enggai makai.” Tang bala pemesai iya, enggau indu nya mujuk iya makai. Nyau kelama, nya baru iya nurutka jaku sida, angkat ari tanah, lalu duduk ba katil.

²⁴Indu nya lalu beguai-guai munuh siku anak sapi, ti udah digalau iya. Udah nya iya lalu ngambi tepung, nyendiaka tepung nya, lalu manggang roti ti enda beragi.

²⁵Iya lalu ngenahka pemakai nya di mua Saul enggau bala pemesai iya makai. Sida lalu makai. Malam nya sida lalu mupuk.